Эрдэнэт үйлдвэрийн Сэлэнгэ амралт, аялал жуулчлалын цогцолборын Сэлэнгэ амралтын баазын дарга Ж.Гэрэл-Эрдэнэтэй “Найрамдлын эрдэнэс” хүүхдийн зуслангийн энэ жилийн үйл ажиллагаа, хүүхдийн аюулгүй байдал, эрүүл мэнд, хөгжлийн хөтөлбөрүүдийн талаар ярилцлаа.
-Энэ жилийн зуслангийн үйл ажиллагаа хэрхэн үргэлжилж байна вэ?
-“Найрамдлын эрдэнэс” зуслан зургаадугаар сарын 20-ноос үйл ажиллагаагаа эхлүүлсэн. Үйл ажиллагаагаа эхлэхийн өмнө Орхон аймгийн Хүүхэд, гэр бүлийн хөгжил, хамгааллын газар, Эрүүл мэндийн газар, Стандарт, хэмжил зүйн газар, Хүнс, хөдөө аж ахуйн газрын хамтарсан шалгалтад хамрагдаж, шаардлагатай бүх шалгуурыг ханган албан ёсоор хүүхдүүдээ хүлээн авсан. Одоогоор гурав дахь ээлжийн хүүхдүүд амарч байна. Нэгдүгээр ээлж “Найз нөхөдтэйгээ өнгөрүүлэх 72 цаг”, хоёрдугаар ээлж “Эко элч”, гуравдугаар ээлж “Бяцхан санхүүч” сэдэвт хөгжлийн хөтөлбөрөөр үргэлжилж байна. “Бяцхан санхүүч” хөтөлбөр нь тоглоом, дадлагаар дамжуулан хүүхдүүдэд санхүүгийн анхан шатны мэдлэг олгох зорилготой. Өнөөдрийн байдлаар манай зусланд нийт 351 хүүхэд амраад байна.
-Өдөр тутмын үйл ажиллагаа хэрхэн зохион байгуулагдаж байна?
-Эрдэнэт үйлдвэрийн Хөдөлмөрийн аюулгүй байдал, эрүүл ахуйн албаны мэргэжилтнүүд хоёр хоног тутамд хяналт тавин ажиллаж байна. Хүүхдүүд өглөөний 07:00 цагаас дасгал хөдөлгөөнөөр өдрөө эхлүүлж, хөтөлбөрийн дагуу төрөл бүрийн сургалт, хөгжүүлэх үйл ажиллагаанд хамрагдан оройн 21:00 цаг хүртэл идэвхтэй оролцдог.
-Хүүхдийн эрүүл мэндэд хэрхэн анхаарч байна вэ?
-Эрүүл мэндийн байгууллагаас өгсөн зөвлөмжийн дагуу эцэг, эхээс хүүхдийн эрүүл мэндийн мэдээллийг урьдчилан авч, цахим бүртгэлээр хяналт тавьж байна. Мөн хүүхэд бүрийг зусланд ирсэн эхний өдөр эмчийн үзлэгт хамруулж, амралтын хугацаанд тогтмол хяналтанд байлгаж ажиллаж байна.
-Хүүхдийн амьдрах орчин, тав тухын нөхцөл хэрхэн сайжирсан бэ?
-Энэ жил Эрдэнэт үйлдвэрийн хөрөнгө оруулалтын хүрээнд хүүхдийн өрөөнүүдийг шинэчилж, хувцасны шүүгээ, ширээ, сандал зэрэг шаардлагатай тавилгыг бүрэн шинэчилсэн. Ингэснээр хүүхдүүд илүү тохилог, тав тухтай орчинд амарч байгаа бөгөөд шинэ тохижилтод сэтгэл хангалуун байна.
-Байрны стандарт шаардлага хангагдаж байгаа юу?
-Тийм. Холбогдох байгууллагууд газар дээр нь хэмжилт хийж, нэг хүүхдэд ногдох талбай, өрөөний нөхцөл, байршуулалтыг шалгасан. Амрагчдын хоёрдугаар байрны 34 өрөөнд нийт 184 хүүхдийг стандартын дагуу байрлуулсан бөгөөд хүүхдийн амьдрах орчин бүх шаардлагыг бүрэн хангасан гэсэн дүгнэлт гарсан.
-Ийнхүү “Найрамдлын эрдэнэс” хүүхдийн зуслан энэ зуны турш хүүхэд бүрийн аюулгүй байдал, эрүүл мэнд, хөгжлийг эрхэмлэсэн хөтөлбөрүүдийг хэрэгжүүлж, стандарт шаардлага хангасан тав тухтай орчинд амралтыг нь зохион байгуулж байна.
Нар минутад мандаж минутад жаргана.
Үс засуулвал: 
Суудал: 
