Эрдэнэт үйлдвэрийн удирдах ажилтнуудын ээлжит шуурхай зөвлөгөөнийг өнөөдөр Ерөнхий инженер Т.Батмөнх удирдлаа. Тэрээр баяр наадмын урт амралтын өдрүүдэд үйлдвэрлэлийн тасралтгүй үйл ажиллагааг хангах, бараа материал, сэлбэг хэрэгсэл татан авалттай холбоотой асуудлыг яаралтай шийдвэрлэх, хариуцлагатай жижүүр, засварчид, дуудлагын баг ажиллуулах, Эрдэнэт хотын 50 жилийн ойн баярын бэлтгэл хангах талаар үүрэг чиглэл өгснөөр “шуурхай” эхэллээ.
Долдугаар сар гарсаар үйлдвэрлэлийн төлөвлөгөө бүрэн биелж явааг Үйлдвэрлэл, техникийн хэлтээс мэдээллээ. Тухайлбал, уулын цул гаргалт +49,000м3, хөрс хуулалт +27,000м3, хүдэр боловсруулалт +-15,000 тонн байна. Хүдэр дэх зэсийн агуулга 0369, молибденых 0,016, технологийн балансаар зэсийн металл авалт 88,2, молибден 43,5 хувийн гүйцэтгэлтэй байв. Тайлант хугацаанд 22,37 хувийн агуулгатай 1891 тонн цэвэр зэс агуулсан, 8454 тонн зэсийн баяжмал бүрдүүлсэн. Харин молибдены баяжмал сарын эхнээс 22 контейнер үйлдвэрлэжээ. Зэсийн баяжмалын ачилтыг нэмэгдүүлж, өдөр бүр 31 вагон ачиж байна.
Ил уурхайд Мөчлөгт урсгалт тээврийн технологи нэвтрүүлэх төслийн ажил төлөвлөгөөний дагуу урагшилж байгааг мэдээлсэн. Одоогоор бутлуурын байгууламжийн гадна барилга, дам нурууны угсралт явагдаж байна. Мөн овоолго үүсгэгч болон машинд ачих байгууламж дээр туршилт тохируулгын ажил хийгдээд дуусчээ. Одоо конвейрууд дээр туршилт тохируулга үргэлжилнэ гэж Ил уурхайгаас мэдээллээ.
Технологийн тээвэр хэвийн явагдаж байгааг Автотээврийн цехээс мэдээллээ. Энэ онд нийлүүлэгдсэн Японы HD 1500 маркийн хоёр дахь Комацу-г амжилттай угсарч, өнөө оройноос ажилд гаргахаар бэлтгэж хангажээ. Гурав дахь өөрөө буулгагч техникийн угсралт одоогоор 45 хувийн гүйцэтгэлтэй байна.
Баяр наадмын өдрүүдээр Баяжуулах үйлдвэрийн Өөрөө нунтаглах хэсгийн хоёрдугаар секцийн тээрмүүд хуяг солих засварт 48 цаг зогсоно. Мөн энэ сарын 17-ноос төв корпусын 5 дугаар тээрэм хуяг солих засварт зогсох тул зохион байгуулалт хийж, хариуцлагатай ажиллаж байгаа талаар тус цехийн Ерөнхий инженер мэдээлсэн.
Долдугаар сарын 01-ний шөнө Ус хангамжийн цехийн I өргөх станц орчимд аянга бууснаас 10 худгийн цахилгаан тоноглолууд гэмтжээ. Үүнээс таван худгийг сэргээсэн байна. Үлдсэн таван худгийг сэргээхийн тулд шаардлагатай цахилгаан тоноглолуудыг яаралтай худалдан авах асуудлыг шийдвэрлэж өгөхийг Эрчим хүчний хэлтсийн дарга-Ерөнхий эрчим зүйч хүссэн.
Хүний нөөц, захиргааны хэлтэс өнгөрсөн 7 хоногт 10 бүтцийн нэгжийн 28 ажлын байранд сонгон шалгаруулалт зарлаж, нийт 1211 иргэн бүртгүүлсэн байна. Үүнээс 11 ажлын байран дээр сонгон шалгаруулалт амжилттай явагджээ. Харин найман ажлын байранд сонгон шалгаруулалтын шаардлага хангасан ажил горилогч байхгүйгээс цуцлагдсан байна. Учир нь бүтцийн нэгжүүд ажлын байрны сонгон шалгаруулалтын захиалга өгөхдөө Эрдэнэт үйлдвэрийн дотоод журмаар авдаг нарийн шалгуур тавьснаар цуцлагдах үндэслэл үүсч байгааг тус хэлтсээс анхааруулав.
Нар минутад мандаж минутад жаргана.
Үс засуулвал: 
Суудал: 
