МУССХ-ны гишүүн "Сэлэм Загас" клубын нэрэмжит "Open Swimming Cup 2026" Олон Улсын усанд сэлэлтийн тэмцээн Улаанбаатар хотноо 05 дугаар сарын 29-нөөс 06 дугаар сарын 01-ний өдрүүдэд амжилттай зохион байгуулагдлаа.
Тус тэмцээнд Монгол Улс, БНХАУ, ОХУ, Канад, БНСУ зэрэг таван улсын 35 клубын 725 тамирчин оролцов. Тамирчид 7–12 болон 13-аас дээш насны ангиллаар ар, өврөөр даллах, мэлхий, далайн гахай, холимог сэлэлтийн төрлөөр 50 м, 100 м-ын зайд хурд, хүч, техник ур чадвараа сорин өрсөлдсөн юм.
"Эрдэнэт үйлдвэр" ТӨҮГ-ын Спорт цогцолборын дэргэдэх "Хангарди" усанд сэлэлтийн клуб энэ удаагийн тэмцээнд багш С.Алтантуяа, Д.Оюун-Эрдэнэ нарын удирдлага, зохион байгуулалтаар өсвөрийн 60 тамирчин оролцов. "Хангарди"-чууд нийт 14 алт, 14 мөнгө, 19 хүрэл, нийт 47 медаль хүртэж, багийн дүнгээр 7-12 насны ангилалд дөрөвдүгээр байр, 13-аас дээш насны ангилалд тавдугаар байр эзэлж, тэмцээнийг амжилттай өндөрлүүллээ. Мөн тус клубын тамирчин н.Хулан 12 насны ангилалд ур чадвар, гүйцэтгэлээрээ бүх өрсөлдөгчдөөсөө ялгарч, "Шилдэг эмэгтэй" тамирчнаар шалгарав.
"Сэлэм Загас" клуб 5 дахь жилдээ зохион байгуулсан уг тэмцээний онцлог нь оролцогч тамирчдыг нэгдсэн журмаар Олон Улсын "Найрамдал" хүүхдийн зусланд тав хоног байрлуулж, бүлгийн зохион байгуулалтаар өдөр бүр өөр өөр хөтөлбөрт хамруулсан явдал байв. Хүүхдүүд тэмцээнд өрсөлдөхийн зэрэгцээ өөр өөр улс, клубын үе тэнгийнхэнтэйгээ танилцаж, шинэ найз нөхөдтэй болж, мартагдашгүй дурсамж бүтээсэн нь энэхүү тэмцээнийг илүү утга агуулгатай болгосон юм.
Нар минутад мандаж минутад жаргана.
Үс засуулвал: 
Суудал: 
