Орхон аймгийн Нутгийн удирдлагын ордны “Амарын нэрэмжит танхим”-д “Хуульчдын нийгэмд гүйцэтгэх үүрэг” сэдэвт чуулган өнөөдөр амжилттай зохион байгуулагдлаа. Тус чуулганыг Монголын хуульчдын холбооны Орхон аймаг дахь салбар санаачлан, аймгийн Иргэдийн Төлөөлөгчдийн Хурал, Засаг даргын Тамгын газар болон Гэмт хэргээс урьдчилан сэргийлэх зөвлөл хамтран дэмжиж ажилласан байна.
Чуулганы нээлтэд Орхон аймгийн ИТХ-ын дарга Д.Мөнхбат, Засаг дарга Б.Зоригтбаяр нар оролцож, хуульчдын нийгэмд гүйцэтгэх үүрэг, хариуцлагын талаар онцлон тэмдэглэн үг хэллээ. Мөн Монголын хуульчдын холбооны Тамгын газрын дарга Ш.Жолбарс мэндчилгээ дэвшүүлж, энэхүү чуулган нь хөдөө орон нутагт анх удаа зохион байгуулагдаж буйгаараа онцлогтойг дурдсан юм.
Чуулганд Орхон аймгийн шүүх, прокурор, өмгөөлөгч, нотариат, “Эрдэнэт үйлдвэр” ТӨҮГ болон бусад байгууллагад ажиллаж буй 138 хуульч оролцож, салбар бүрийн тулгамдсан асуудал, шийдэл, хөгжлийн чиг хандлагын талаар илтгэл хэлэлцүүлэг өрнүүллээ.
Илтгэлүүдэд нутгийн өөрөө удирдах байгууллагын эрх зүйн орчин, хуульчийн хараат бус байдал, нотариатын цахим системийн хөгжил, прокурорын байгууллагын цахим шинэчлэл, өмгөөлөгчийн нийгмийн оролцоо, эвлэрүүлэн зуучлах ажиллагаа, хуульч бэлтгэх тогтолцоо зэрэг өргөн хүрээний асуудлыг хөндөв.
Чуулганы зохион байгуулагч, Монголын хуульчдын холбооны зөвлөлийн гишүүн, Орхон аймаг дахь салбарын зохицуулагч Б.Алтансүх “Хуульчид нь нийгэмд шударга ёсыг тогтоох, эрх зүйн орчныг бэхжүүлэхэд чухал үүрэгтэй. Энэ удаагийн чуулган нь хуульчдын оролцоог нэмэгдүүлэх, салбарын хөгжлийг дэмжихэд бодит хувь нэмэр оруулна” хэмээн онцоллоо. Мөн тэрбээр Монгол Улсад цахим шилжилт эрчимжиж буй энэ үед хууль зүйн байгууллагууд ч мөн адил дэвшилтэт технологийг үйл ажиллагаандаа нэвтрүүлж байгааг дурдсан юм. Тухайлбал, төрийн үйлчилгээний e-Mongolia систем нэвтэрснээр иргэдэд үзүүлэх үйлчилгээ илүү хүртээмжтэй, шуурхай болсон бол нотариат, прокурор, шүүхийн байгууллагуудын үйл ажиллагаанд цахим системүүд үе шаттайгаар нэвтэрч эхэлжээ.
Энэ хүрээнд хэрэг, маргааныг шийдвэрлэхдээ цахим системийг ашиглах боломж нэмэгдэж, мэдээллийн аюулгүй байдал, үйлчилгээний хурд, ил тод байдалд эерэг өөрчлөлт гарч буйг оролцогчид онцолж байв.
Чуулганы төгсгөлд оролцогчид санал солилцож, цаашид хууль зүйн салбарын чадавхыг нэмэгдүүлэх, орон нутгийн түвшинд хуульчдын оролцоог бэхжүүлэх, шинэ технологийг үр дүнтэй ашиглах чиглэлээр хамтран ажиллахаар санал нэгдлээ. Мөн шагнал гардуулах ёслол болж, идэвхтэй оролцсон хуульчдыг урамшуулсан юм.
Энэхүү чуулган нь хуульчдын үүрэг, оролцоог тодорхойлох, орон нутгийн хэмжээнд эрх зүйн салбарын хөгжлийг шинэ шатанд гаргах ач холбогдолтой үйл ажиллагаа боллоо.
Нар минутад мандаж минутад жаргана.
Үс засуулвал: 
Суудал: 
