Эрдэнэт үйлдвэрийн Хүний нөөцийн хөгжлийн цогц хөтөлбөрийн хүрээнд хэрэгжүүлж буй “Залуу ажилтныг дэмжих хөтөлбөр”-ийн энэ оны үйл ажиллагааны нээлт, өнгөрсөн оны нөлөөллийн ажлын шилдгүүдийг шалгаруулах ёслол өнөөдөр Ерөнхий захиргааны II байрны “Оюу” танхимд боллоо. Тус үйл ажиллагаанд уг хөтөлбөрт шалгарсан 100 залуу ажилтан оролцож, өнгөрсөн жилийн үр дүнгээ дүгнэж, цаашдын зорилго, чиглэлээ тодорхойлсон нь онцлог байв.
Энэхүү үйл ажиллагааг нээж, Хүний нөөц, захиргааны хэлтсийн дарга О.Отгонбаяр хэлсэн үгэндээ “Хүний нөөцийн хөгжлийн цогц хөтөлбөрийг 6 дахь жилдээ амжилттай хэрэгжүүлж байна. Өнгөрсөн хугацаанд нийт 2830 ажилтан буюу үйлдвэрийн нийт ажилтны 40 гаруй хувь хамрагдсан нь хөтөлбөрийн үр өгөөжийг илтгэж байна” хэмээн онцоллоо. Мөн 2025-2026 онд хөтөлбөрийг ахисан түвшинд хэрэгжүүлж, илүү гүнзгий хөгжих боломжийг залууст олгож буйг дурдсан юм.
Үүний дараа “Эрдэнэт үйлдвэр” ТӨҮГ-ын Ерөнхий захирал Г.Ёндон оролцогчдод хандан үг хэлж, залуу ажилтнуудыг байгууллагын ирээдүйн манлайлагчид хэмээн тодорхойллоо. Тэрбээр, “Та бүхэн бол үйлдвэрийн өнөөдөр төдийгүй маргаашийн хөгжлийг тодорхойлох үнэт нөөц юм. Хүний нөөцийн хөгжил бол байгууллагын хамгийн чухал хөрөнгө оруулалт” гэдгийг онцлон тэмдэглэв. Мөн залуусыг идэвх санаачилгатай оролцож, өөрийгөө тасралтгүй хөгжүүлэн, мэдлэг туршлагаа хамт олонтойгоо хуваалцахыг уриалсан юм.
Энэ үеэр, 2025 онд хэрэгжүүлсэн нөлөөллийн ажлуудын үр дүнг танилцуулж, шилдэг багуудыг шалгаруулан шагнал гардууллаа. Тухайлбал, “Hakuna Matata” баг автобусны маршрутыг цахимжуулах төслөөр тэргүүн байр эзэлж, “Mine-Up” баг цахим мөрийтэй тоглоомоос урьдчилан сэргийлэх нөлөөллийн ажлаар дэд байр, “Alpha” баг санамсрын бясалгалын нөлөөллийн ажлаар гуравдугаар байрт тус тус шалгарсан байна.
Шалгарсан багууд өөрсдийн хэрэгжүүлсэн ажлын үр дүн, туршлагаасаа хуваалцаж, оролцогчдод шинэ санаа, урам зориг өглөө. Түүнчлэн, 2026 онд хэрэгжүүлэх үйл ажиллагааны төлөвлөгөөг танилцуулж, хөтөлбөрийн хоёрдугаар үе шат эхэлж байгааг албан ёсоор зарлалаа. Энэ шатанд илүү өргөн хүрээтэй сургалт, хөгжлийн үйл ажиллагаа, шилдэг төсөл, контентын уралдаануудыг зохион байгуулахаар төлөвлөж байна. Тус хөтөлбөр нь залуу ажилтнуудын мэдлэг, ур чадвар, хандлагыг хөгжүүлэх, манлайлах чадамжийг төлөвшүүлэх зорилготой бөгөөд байгууллагын тогтвортой хөгжилд чухал хувь нэмэр оруулж буй юм.
Нар минутад мандаж минутад жаргана.
Үс засуулвал: 
Суудал: 
