Удирдах ажилтны шуурхай зөвлөгөөний тойм

Эрдэнэт үйлдвэрийн удирдах ажилтны ээлжит шуурхай зөвлөгөөн өнөөдөр болж, бүтцийн нэгжүүд өнгөрсөн долоо хоногийн мэдээллээ танилцуулан хэлэлцэж, Ерөнхий инженер Т.Батмөнх цаашид анхаарах ажлуудад тодорхой чиглэл өглөө.
Байгаль орчин, ногоон хөгжлийн хэлтсээс өнгөрсөн долоо хоногт үйлдвэрийн хэмжээнд байгаль орчны чиглэлээр ямар нэгэн зөрчилгүй хэвийн ажилласныг мэдээллээ. Цаг уур, орчны шинжилгээний газраас 6, 7 дугаар сард ихэнх нутгаар олон жилийн дунджаас ахиу бороо орох төлөвтэй байгааг анхааруулжээ. Уг мэдээлэлд үндэслэн Эрдэнэт үйлдвэрийн бүсэд үйл ажиллагаа явуулдаг гаднын компаниудад бэлэн байдлыг хангаж ажиллах талаар албан тоот хүргүүлсэн байна. Мөн Ил уурхайн хүчиллэг усны бассейнуудад хяналт тавьжээ. Өнөөдрийн байдлаар 12 дугаар овоолгын бассейн 15 хувийн дүүргэлттэй, 5000 м3-ын бассейн 37, наймдугаар дугаар овоолго дээрх 54, есдүгээр овоолгын хоёр бассейн 7-11 хувийн дүүргэлттэй байна.
Ерөнхий инженер Т.Батмөнх “Хур бороо элбэг зун болох төлөвтэй байгаа тул  хүчиллэг усыг байгаль орчинд алдахаас хамгаалах, сэргийлэх үүднээс мэргэжлийн байгууллагуудтай холбогдож арга хэмжээ авч ажиллах”-ыг Байгаль орчин, ногоон хөгжлийн хэлтэст үүрэг болголоо.  
Эрдэнэт үйлдвэр хаврын мод тариалалтаар зургаан байршилд найман төрлийн 100,584 мод тарьсан байна. Түүнээс гадна цагаан тоосны нөлөөллийн бүсийн иргэдийн эрүүл мэндийн үзлэгт одоогоор 375 иргэн хамрагджээ. Энэ ажил 75 хувийн гүйцэтгэлтэй явна. 
Эрдэнэтийн Овоо ордыг ашиглах явцад үүссэн бага агуулгатай хүдрийн овоолгыг ашиглаж, эдийн засгийн эргэлтэд оруулах үйлдвэр барьж байгуулах гүйцэтгэгчийг сонгон шалгаруулах ажлын техникийн даалгаврыг Үйлдвэрлэл, технологийн парк төслийн нэгж боловсруулан холбогдох бүтцийн нэгжүүдэд санал авахаар хүргүүлсэн байна. Энэ асуудлыг Техникийн зөвлөлийн хурлаар хэлэлцүүлэх гэж буйг Үйлдвэрлэл, техникийн хэлтсээс мэдээллээ. Мөн 2026 оны хөрөнгө оруулалтын төлөвлөгөөний боловсруулалтыг наймдугаар сарын нэгний дотор хийж батлуулахад өөрийн бүтцийн нэгжийн төлөвлөлт, холбогдох материалуудаа бэлтгэхэд онцгой анхаарч ажиллахыг нийт бүтцийн нэгжийн удирдлагуудад анхаарууллаа. 
Баяжуулах үйлдвэрийн технологийн процесст молибдены циклийг өнгөрсөн мягмар гарагт залгажээ. Одоогоор процесс жигдрээгүй ч, үйлдвэрлэлийн үйл ажиллагаа хэвийн үргэлжилж байна. Баяжуулагчид амралт болон ажлын өдрүүдээр 24 цагийн хариуцлагатай жижүүрийн хуваарь гарган ажиллалаа. Мөн хам баяжуулалтын 2 дугаар секцийн угсралтын ажил төлөвлөгөөний дагуу үргэлжилж байна. Хавар, зуны бэлтгэл ажлын хүрээнд 13 ажил хийхээр төлөвлөснөөс 82 хувийн гүйцэтгэлтэй явна. Түүнээс гадна эрүүл мэндийн урьдчилан сэрийлэх үзлэгт 667 ажилтан буюу нийт ажилчдын 56 хувь нь хамрагдсан талаар цехийн дарга М.Отгон танилцууллаа. 
Эрдэнэт үйлдвэрийн Гэрээт дотоодын цэргийн 816 дугаар ангийн захирагч, хурандаа Д.Гантөмөр үйлдвэрийн хэмжээнд хүний эрүүл мэндийн эсрэг гэмт хэргээс урьдчилан сэргийлэх, таслан зогсоох чиглэлээр цогц арга хэмжээ хэрэгжүүлэх талаар мэдээлэл хүргэлээ. Тэрээр энэ сарын 12-ны өдөр Соёл, урлагийн цогцолборт болох нэгдсэн нээлтээр уг ажлын албан ёсны эхлэлийг тавихаар төлөвлөж байгаагаа мэдэгдэв. Энэ хүрээнд "Хүний эрүүл мэндийн эсрэг гэмт хэрэгтэй тэмцэх аян" зарлаж, 2025 оныг дуустал хэрэгжүүлэх хөтөлбөр, төлөвлөгөө боловсруулсан байна.