“Бүх хайраа гэр бүлдээ” өдөрлөг болов

Эрдэнэт үйлдвэрийн ажилтнуудын “Сэтгэл зүйн эрүүл мэндийг хамгаалах” сарын аяны хүрээнд “Бүх хайраа гэр бүлдээ” сэдэвт өдөрлөг өнөөдөр боллоо. Үйлдвэрийн газрын “Оюу” танхимд болсон тус өдөрлөгт бүтцийн нэгжийн ажилтнуудын төлөөлөл оролцсон юм.  
Өдөрлөгийг нээж, ХАБЭА-н хэлтсийн дарга Д.Мөнхболд хэлсэн үгэндээ, “Эрдэнэт үйлдвэрийн ажилтнуудын дунд 2023 оноос сэтгэл зүйн байдлын судалгаа хийсэн. Энэ судалгаанаас үзвэл, 10 ажилтны нэг нь сэтгэл зүйн ямар нэгэн дарамттай байгааг харж болно. Нийгмээс болон ажлын байранд үүсэж буй стресс гэр бүлд нөлөөлдөг. Гэр бүлийн амар тайван бус байдал ч эргээд ажилтны сэтгэл зүйд сөргөөр нөлөөлж, ажлын бүтээмж, цаашлаад аюулгүй ажиллагаанд ч муугаар нөлөөлөх талтай. Иймээс Эрдэнэт үйлдвэр ажилтнуудынхаа сэтгэл зүйн эрүүл мэндэд анхаарал хандуулж, сарын аян өрнүүлэн, олон ажил зохион байгуулж буй. Өнөөдрийн өдөрлөгөөр мэргэжлийн хүмүүс сургалт мэдээлэл хийж байна. Ерөнхий захиргааны нэгдүгээр байранд Сэтгэл заслын танхим бий болгож, сэтгэл зүйч, сэтгэл засалчтай хамтран бүлгийн болон ганцаарчилсан уулзалт, ярилцлага хийх боломжтой болсон. Ажилтан бүр өөрсдийн сэтгэл зүйн асуудлаа тандаж мэддэг, мэргэжлийн хүмүүст хандаж, зөвлөгөө авдаг болох нь энэхүү хөтөлбөрийн зорилго юм” гэж онцлов. 
Эрдэнэт үйлдвэрийн сэтгэл зүйн эрүүл мэндийн хөтөлбөр боловсруулахтай холбогдуулан, сэтгэл зүйн эрүүл мэндийн баг 1109 хүнийг оролцуулан сэтгэл зүйн эрүүл мэндийн суурь судалгаа хийжээ. “Эрдэнэт цогцолбор” дээд сургуулийн сэтгэл судлаач багш Х.Уламбаяр дээрх судалгааны үр дүнг танилцуулсан. 
Түүнчлэн, Гэр бүл судлаач Ж.Баясгалан “Яг өнөөдрөөс гэр бүлдээ”, “Гэр бүл дэх хүүхэд хамгаалал, үр дүнтэй цаг” сэдвээр, Сэтгэцийн эмч, донтох эмгэг судлаач, сэтгэл заслын ахлах зэргийн эмч Ц.Батаа “Өв тэгш бус гэр бүл, зөрүү тавилан”, “Гэр бүл дэх бэлгийн харилцаа” сэдвээр, “Эрдэнэт цогцолбор” дээд сургуулийн Эрдэм шинжилгээ, хамтын ажиллагааны тэнхимийн мэргэжилтэн Д.Оюу-Эрдэнэ “Гэр бүлийн санхүү төлөвлөлт” сэдвээр илтгэл толилууллаа.