“Сэтгэц эрүүл бол бие эрүүл” өдөрлөг боллоо

Сэтгэцийн эрүүл мэндийг дэмжих сарын аяны хүрээнд “Ажлын байран дахь сэтгэцийн эрүүл мэндийг тэргүүлэх чиглэл болгоё” уриан дор “Сэтгэц эрүүл бол бие эрүүл” өдөрлөг өнөөдөр Хүүхдийн ордонд боллоо. 
Энэ үеэр Сэтгэцийн эрүүл мэндийн төвийн зөвлөх эмч, Анагаах ухааны доктор Т.Ганцэцэг “Донтолтоос сэргийлэх ба донтолттой тэмцэх нь хэр амархан бэ”, Хоёрдугаар клинкийн тасгийн эрхлэгч, сэтгэцийн эмч Г.Гантулга “Стресс нь гэр бүл, хосын харилцаанд нөлөөлөх нь”, “Эрдэнэт” сувиллын цогцолборын сэтгэл засалч эмч Б.Хишигжаргал “Булчин суллах дасгал” зэрэг сэдвээр тус тус лекц уншив. 
Мөн Сэтгэцийн эрүүл мэндийн тусламж үйлчилгээ үзүүлдэг эмч, эмнэлэг, төвүүдийн үйл ажиллагааны танилцуулгыг дэлгэн үзүүлсэн юм. Түүнчлэн, сургалтад оролцогчид сэтгэл зүйч, сэтгэл засалчийн тест, оношилгоонд хамрагдлаа. 
“Эрдэнэт үйлдвэрийн хэмжээнд Сэтгэцийн эрүүл мэндийг дэмжих өдрүүдийг жил бүр тэмдэглэн өнгөрүүлдэг. Харин сарын хугацаатай аян зарлаж байгаагүй. Энэ удаа Улаанбаатараас Сэтгэцийн эрүүл мэндийн төвөөс эмч нарыг урьж, танин мэдэхүйн болон мэдлэг олгох зорилгоор лекц уншсан нь онцлог байлаа. Нийгмийн цех, нэгжүүд хамтран Сэтгэл зүйн эрүүл мэндийг дэмжих зорилгоор ажлын хэсэг байгуулсан. Энэ ажлын хэсэг цех, нэгжийнхээ онцлогт тохирсон ажлууд зохион байгуулаад байна. Өнөөдрийн сургалтад 200 гаруй ажилтан оролцлоо” гэж “Эрдэнэт” сувиллын цогцолборын Сэтгэл засалч эмч Б.Хишигжаргал ярилаа.