Удирдах ажилтнуудын даваа гарагийн шуурхай зөвлөгөөнийг Ерөнхий инженер Т.Батмөнх удирдлаа. Өнгөрсөн долоо хоногт Байгаль орчин, ногоон хөгжлийн хэлтсээс үйлдвэрийн бүсэд хяналт шалгалт хийж ажилласан байна. Хүчиллэг усны шүүрлийн хэмжээ багассан. Ил уурхайн 12-р овоолгын дэргэдэх 40000 м3-ын бассейн 80 хувийн дүүргэлттэй, 8-р овоолгын адил хэмжээний багтаамжтай бассейн 82 хувийн дүүргэлттэй байгааг тус хэлтсийн дарга Ж.Жавхланбат мэдээллээ. 9А овоолгын нэгдүгээр бассейны хүчиллэг усыг соруулж суллажээ. Мөн Эрдэнэт үйлдвэрийн санаачилга, дэмжлэгээр Сэлэнгэ аймгийн Ерөө суманд хийж буй техникийн нөхөн сэргээлтийн ажил хэвийн үргэлжилж байгааг мэдээллээ. Өнөөдрийн байдлаар 500 гад нөхөн сэргээлт хийсэн нь 64,5 хувийн гүйцэтгэлтэй байна. 10-р сарын 01-нд Байгаль орчин, уур амьсгалын өөрчлөлтийн яамны болон Эрдэнэт үйлдвэрийн холбогдох албаны мэргэжилтнүүд, Сэлэнгэ аймгийн байгаль орчны байцаагч нар техникийн нөхөн сэргээлтийн ажилтай газар дээр нь танилцах юм.
Эрдэнэт үйлдвэр өнгөрсөн долоо хоногт уулын цул гаргалт +90 000, хөрс хуулалт +20 000 м3, хүдэр өгөлт +150 000 тонн байж, +250 000 тонн хүдэр боловсруулжээ. Тайлант хугацаанд 22,33 хувийн агуулгатай 10817 тонн цэвэр зэс агуулсан 48435 тонн зэсийн баяжмал, молибдены баяжмал 161 багц илүү үйлдвэрлэж, ачилтын төлөвлөгөөг биелүүлсэн байна.
Ил уурхайн Тэсрэх бодисын шинэ үйлдвэр өнгөрсөн пүрэв гарагт 30 тонн эмульс үйлдвэрлэснийг тэсэлгээнд туршжээ. Тэсэлгээний өргөлт сайн болсныг Ил уурхайгаас мэдээллээ. Шинэ Тэсрэх бодисын үйлдвэрийн барилгын ажил ерөнхийдөө дууссан, станц хоорондын конвейер суурилуулалт, гадна гагнуур, металл хийцлэлийн ажлууд явагдаж байна. Үйлдвэр хүлээн авах мэргэжлийн комисс ирэх сард Ил уурхайд ажиллана.
Ган бөөрөнцгийн цехэд 40-ийн бэлдэц 475 тонн, 40 мм-ийн голчтой ган бөөрөнцөг 1071 тонн байгаа нь 134 хоногийн нөөц юм. Тус хамт олон 2024 онд үйлдвэрлэх 40-ийн ган бөөрөнцгийн төлөвлөгөөг хугацаанаас нь өмнө бүрэн биелүүлсэн амжилттай ажиллаж байна. Харин 80-ийн бэлдэц 5789 тонн, шаар 6173 тонн буюу 100 хоногийн нөөцийг бүрдүүлжээ.
“Эрдэнэт үйлдвэр” ТӨҮГ-т гаднын байгууллагаас нийлүүлэгдэх бараа, материалын чанарыг хянах журам шинэчлэгдэн батлагдсаныг Чанарын хяналтын хэлтсээс мэдээллээ. Ингэснээр, нийлүүлэгдэж буй бараа, материалд чанарын хяналт хийх үйл ажиллагаа, хугацаа, акт гаргаж ажиллах комиссын үүрэг хариуцлага илүү тодорхой болжээ. Мөн бараа дүйцүүлж авах боломжгүй болсныг мэдэгдэв. Түүнээс гадна тендерт санал болгосноос өөр төрлийн бараа нийлүүлсэн тохиолдолд тухайн компанийн тендерт оролцох эрхийг хязгаарлах санал өгөх гэх мэт зохицуулалт нарийн тусгагдсан байна. Худалдан авалтын захиалга хийдэг, Үнэлгээний хороонд ажилладаг, бараа материал хүлээн авдаг ажилтнууддаа тус журмаар танилцуулга хийж, мэдээлэл хүргэх тал дээр хамтран ажиллахыг хүссэн юм.
Нар минутад мандаж минутад жаргана.
Үс засуулвал: 
Суудал: 
