Эрдэнэт үйлдвэр мэдээллийн технологийн дэд бүтцээ шинэчлэн сайжруулж, үндсэн болон дэд системүүдийн тасралтгүй, найдвартай ажиллагаа, мэдээллийн аюулгүй байдлыг илүү өндөр түвшинд хангах зорилгоор олон улсын TIER II стандартад нийцсэн “Дата төв”-ийг ашиглалтад орууллаа.
Нээлтийн ажиллагааны эхэнд Эрдэнэт үйлдвэрийн Ерөнхий захирал Г.Ёндон хэлсэн үгэндээ, “Бид өнөөдөр мэдээллийн технологийн шинэчилсэн дэд бүтэц, шинэ “Дата төв”-өө нээж, ашиглалтад хүлээн авч байна. Энэ бол манай үйлдвэрийн мэдээллийн технологийн хөгжлийг шинэ шатанд гаргаж буй чухал ач холбогдолтой үйл явдал юм. Монгол Улсын Засгийн газраас хэрэгжүүлж буй бодлого хөтөлбөрийн хүрээнд Эрдэнэт үйлдвэр өөрийн бүхий л үйл ажиллагааг бүрэн цахимжуулах зорилт дэвшүүлсэн. Энэ дагуу баримт бичгийг цахимаар шийдвэрлэн, тэдгээрийг иргэний тоон гарын үсгээр баталгаажуулан архив үүсгэж байна. Мөн уул уурхайн үйлдвэрлэлд орчин үеийн дэвшилтэт техник технологи, тоног төхөөрөмжүүдийг нэвтрүүлж, үйл ажиллагаагаа зайнаас удирдах боломжтой илүү ухаалаг цахим системийг эрчимтэй хөгжүүлж байна. Эдгээр асар их мэдээллийг хадгалж, тасралтгүй хөгжүүлж боловсруулах найдвартай ажиллагаатай, аюулгүй байдлыг хангасан системтэй байх нь нэн тэргүүний, чухал зорилт юм. Энэ зорилтын биелэл нь шинэ Дата төв болж байна. Сүлжээний шинэчилсэн дэд бүтцэд суурилсан Дата төв нь үйлдвэрлэлийн бүх мэдээллийн системийн тасралтгүй найдвартай ажиллагааг хангахын зэрэгцээ мэдээлэл боловсруулах дамжуулалтыг хурдасгаж, шинэ технологи шийдлүүд хиймэл оюун ухааны боловсруулалт, байгууллагын нөөц төлөвлөлтийн ERP системийг нэвтрүүлэх суурь боломж нөхцөлийг бүрдүүлж байна. Дата төв нь Эрдэнэт үйлдвэрийн хөгжлийн хүчирхэг хөдөлгөгч хүч болно гэдэгт итгэлтэй байна” хэмээн онцоллоо.
Түүнчлэн “Энэхүү төслийн судалгааг хийж, сүлжээний хамгийн дэвшилтэт болох олон улсын TIER II стандартын Дата төвийн техник эдийн засгийн үндэслэлийг боловсруулан мэдээллийн технологийн дэд бүтцийн орчин үеийн шийдлээр Монгол улсын уул уурхайн салбарт Дата төвийг нэвтрүүлж чадсан Эрдэнэт үйлдвэрийн Мэдээллийн технологийн хэлтэс, Холбоо мэдээллийн технологи, автоматжуулалтын цехийн мэргэжлийн баг хамт олондоо халуун баяр хүргэж, талархал илэрхийлье. Энэхүү төслийг дэмжиж, хамтран ажилласан гүйцэтгэгч компани, мэргэжлийн байгууллагуудад талархаж байна. Бид зэс молибдены баяжмалаас гадна мэдээллийг үнэт баялаг болгон түүчээлэн ажилласнаар хөгжлийн шинэ шат өөд амжилттай алхана” гэсэн юм.
Дата төв байгуулах төслийн гүйцэтгэгчээр “Бодь Электроникс” ХХК ажилласан бөгөөд нэгдсэн хяналт удирдлагын самбар, автомат нэвтрэх систем, хөргөлтийн систем, найдвартай цахилгаан тэжээлийн систем, хийн гал унтраагуурын систем, кибер аюулгүй байдал болон сүлжээний удирдлагын 24/7 системийн бүрэн хяналтын төв зэргээс бүрдэж байна. Мөн цахилгаан эрчим хүчний кабелийн хоёр оруулгатай ба тог тасарсан үед тоног төхөөрөмжүүдийг тасралтгүй найман цаг хэвийн ажлуулах чадалтай, нөөц хоёр тэжээлийн үүсгүүртэй, цахилгаан эрчим хүчний ашигт үйлийн коэффициент хамгийн өндөр байхаар зохион байгуулсан байна.
Ингэснээр тэжээлийн блок, батерей, хөргүүрийн сэнс зэрэг гэмтсэн тохиолдолд тоног төхөөрөмжийг унтраалгүй солих боломжтойгоос гадна хөргөлтийн болон тог баригчийн систем нь хамгийн бага цахилгааны зарцуулалт ашиглах бүтэцлэгдсэн, мобайл төхөөрөмж, алсын зайн хяналт, удирдлагыг ухаалгаар шийдвэрлэснээрээ онцлогтой. Тус төвийн дэргэдэх мэдээллийн аюулгүй байдал, сүлжээний аюулгүй байдлыг хангах 24/7 хяналтын төв нь үйлдвэрийн газрын хэвийн, найдвартай байдлыг ханган ажиллах юм.
Нар минутад мандаж минутад жаргана.
Үс засуулвал: 
Суудал: 
