Хуурайшилтын улирал эхэлж байгаатай холбогдуулан Эрдэнэт үйлдвэр цагаан тоос дарах ажлаа эрчимжүүлж байна. Хаягдлын аж ахуйг тойруулан усан хангамжийн систем тавихаар 20 гаруй км газар шугам татаад эхэлжээ. Хуурайшилт ихтэй, салхи хүчтэй хөдөлсөн үед усан мананцар үүсгэх уламжлалт аргыг тоос дарах хучилттай давхар хэрэглэхээр зорьж байна. Мөн Хаягдлын аж ахуйн 15-р далангийн нэгдүгээр хэсэг дээр хоёр эгнээ, 32-ын голчтой “намираа хоолой” тавьж усалгаа байнга хийж байна, гэж Баяжуулах үйлдвэрийн Цагаан тоос дарах товчооны Тэргүүлэх инженер Л.Оюунтунгалаг ярилаа.
Баяжуулах үйлдвэрийн Цагаан тоос дарах товчооны мэргэжилтнүүд өдөрт 20-30 га талбайд хучилт хийж байна. Ингэхдээ кальцийн хлоридыг устай найруулан тусгай техникээр шүршиж, мөн Ил уурхайн хайрга цацагч ашиглан кальцийн хлорид бодисыг хуурайгаар цацаж, дээрээс нь норгон гадаргууг чийгтэй байлгах бүх талын арга хэмжээ авч ажиллаж байгааг Байгаль орчин, ногоон хөгжлийн хэлтсийн инженер Н.Наранчимэг мэдээлсэн юм. Түүнээс гадна өнгөрсөн жилийн хавар, намрын мод тариалалтаар Хаягдлын аж ахуйн ойр орчмын нийт 34 га газарт хоёр сая орчим мод үрээр болон суулгацаар тарьж, цагаан тоосны дэгдэлт бууруулах арга хэмжээ авсан. Энэ жил Ногоон хөгжил төслийн нэгжийнхэн Хангал голын эргийн дагуу бургас тариалахаар бэлтгэл хангаж байна.
2023-03-27
Билгийн тооллын 6
Нар 06:42 минутад мандаж 19:14 минутад жаргана.
Үс засуулвал: Өнгө зүс сайжирна
Суудал: Гал
