Хүдэр нунтаглалтын тээрмүүд бүрэн шинэчлэгдэнэ

Энэ оны хоёрдугаар хагаст Баяжуулах үйлдвэрийн Өөрөө нунтаглах хэсгийн II секцийн, 1989 оноос ажиллаж эхэлсэн, МШЦ 5,5х6,5 бөмбөлөгт тээрмийг БНХАУ-ын "CITIC" компанийн шинэ тоног төхөөрөмжөөр шинэчлэх бэлтгэл хангаж байна. Шинэчлэлийн ажил ирэх 11 дүгээр сарын 01-нээс эхлэх бөгөөд шинэ тээрэм үйлдвэрлэгдээд, наашаа ачигджээ. Энэ тээрмийг сольсноор Баяжуулах үйлдвэрийн хүдэр нунтаглалтын үндсэн тээрмүүд бүрэн шинэчлэгдэх юм. Мөн Бутлан тээвэрлэх хэсгийн 2 дугаар шатны бутлалтын КСД-6 бутлуурыг "Metso" компанийн орчин үеийн, өндөр бүтээмжтэй MP-800 бутлуураар солих ажлыг төлөвлөжээ. Уг тоног төхөөрөмжийн нийлүүлэлт ихэнх нь хийгдсэн байна. Шинээр суурилуулах MP-800 бутлуур нь бүтээмж өндөр, цахилгаан эрчим хүчний хувийн зарцуулалт бага, бүрэн автоматажсан, найдвартай ажиллагаа илүү сайжирсан зэрэг олон давуу талтай юм. Түүнээс гадна, сүүлийн хоёр жил нийлүүлэгдээгүй, конвейерын лент ирэх тул үндсэн том конвейеруудын лентийг шинэчилнэ, гэж Баяжуулах үйлдвэрийн Механикийн товчооны дарга Б.Болор-Эрдэнэ мэдээллээ. Сүүлийн жилүүдэд хүдэр боловсруулалтын тоног төхөөрөмжүүд эрчимтэй шинэчлэгдэж, үүний үр дүнд үйлдвэрлэлийн найдвартай ажиллагаа хангагдаж, ашигт үйлийн коэффициент 092-т хүрчээ. Мөн засварын ажлын цаг багасаж, ажлын байрны эрсдэл буурч байгааг тэрээр онцоллоо.