Монгол Улсын Их Хурлын гишүүн, Засгийн газрын гишүүн, Эрчим хүчний сайд Б.Найдалаа тэргүүтэй ажлын хэсэг энэ сарын 3, 4-ний өдрүүдэд Орхон аймаг, Эрдэнэт үйлдвэрт ажиллаж, эрчим хүчний салбарын өвөлжилтийн бэлтгэл ажил, үйлдвэрлэлийн найдвартай ажиллагаа болон өвлийн оргил ачааллыг даван туулах бэлэн байдалтай танилцлаа.
Ажлын хүрээнд “Эрдэнэтийн дулааны цахилгаан станц” ТӨХК болон “Эрдэнэт-Булганы цахилгаан түгээх сүлжээ” ТӨХК-ийн 2026-2027 оны өвөлжилтийн бэлтгэл ажлын явц, техник тоног төхөөрөмжийн шинэчлэл, эрсдэлийн удирдлага, үйлдвэрлэлийн тасралтгүй ажиллагааны нөхцөл байдалд үнэлгээ хийж, холбогдох удирдлагуудад чиглэл, зөвлөмж өгсөн байна.
Түүнчлэн, Засгийн газрын 2026 оны 17 дугаар хуралдааны тэмдэглэлээр эрчим хүчний салбарын засаглалыг сайжруулах, үр ашгийг нэмэгдүүлэх чиглэлээр хэрэгжүүлэх арга хэмжээний талаар хэлэлцэж, салбарын санхүүгийн тогтвортой байдал, өвөлжилтийн бэлтгэлийг хангах асуудлыг онцгойлон авч үзэж буйг талууд онцоллоо.
Уулзалтын үеэр, Эрчим хүчний сайд Б.Найдалаа эрчим хүчний салбарт суурь шинэчлэл хийх шаардлага үүссэнийг тэмдэглэж, 2050 он хүртэлх хөгжлийн бодлогыг тодорхой болгож байгааг дурдав. Тэрээр үнэ тарифын бодлого, салбарын засаглал, хүний нөөцийн төлөвлөлт, шинэ технологи нэвтрүүлэх эрх зүйн орчныг цэгцлэх нь салбарын тогтвортой хөгжлийн гол нөхцөл болохыг онцолсон юм.
Мөн “Эрдэнэт үйлдвэр” ТӨҮГ нь эрчим хүчний салбарын томоохон хэрэглэгч төдийгүй тодорхой хэмжээнд дэмжигч, хамтрагч байгууллага болж ирснийг дурдан, цаашид үнэ тарифын шинэчлэл, хамтын ажиллагааны зөв тогтолцоог бүрдүүлэх чиглэлээр санал солилцон ажиллах шаардлагатай байгааг илэрхийллээ.
Энэ үеэр “Эрдэнэт үйлдвэр” ТӨҮГ-ын Ерөнхий захирал Г.Ёндон үйлдвэрийн зүгээс эрчим хүчний импортын хамаарлыг бууруулах, дотоодын эх үүсвэрийг нэмэгдүүлэх чиглэлээр өмнөх жилүүдэд тодорхой хөрөнгө оруулалт, бодит ажил хэрэгжүүлснийг танилцууллаа. Тэрээр, Эрдэнэт үйлдвэр Монгол Улсын эдийн засаг, эрчим хүчний системийн тогтвортой ажиллагаанд чухал үүрэг гүйцэтгэж ирснийг онцлохын зэрэгцээ сүүлийн жилүүдэд цахилгааны тариф үе шаттайгаар нэмэгдэж, үйлдвэрийн санхүүгийн ачаалал эрс өссөнийг хэлэв.
Тухайлбал, зөвхөн нэг жилийн дотор цахилгааны төлбөрийн зардал 200 гаруй тэрбум төгрөгөөр өссөн талаар мэдээллээ. Иймд эрчим хүчний салбарын шинэчлэлийг зах зээлийн бодит зарчимд тулгуурлан хэрэгжүүлэх, төр-хувийн хэвшлийн хамтын ойлголцлыг сайжруулах шаардлагатай байгааг тэрээр онцолсон юм.
Мөн уулзалтын үеэр, “Эрдэнэт үйлдвэр” ТӨҮГ-аас эрчим хүчний системийн тогтвортой ажиллагааг хангах хүрээнд өмнөх жилүүдэд хэрэгжүүлсэн хөрөнгө оруулалт, дэмжлэгийн талаар танилцуулж, төвийн бүсийн эрчим хүчний системд үзүүлж буй ач холбогдлыг мэдээлэв.
Түүнчлэн, цахилгаан эрчим хүчний тариф, борлуулалтын орлого, хэрэглээний бүтэц, үйлдвэрлэлийн зардлын үзүүлэлтүүдийг танилцуулсан юм. “Эрдэнэт үйлдвэр” ТӨҮГ-ын зүгээс 2026 оны зургаагаас арваннэгдүгээр сарын цахилгаан эрчим хүчний төлбөрийг урьдчилан төвлөрүүлэх шийдвэр нь компанийн санхүүгийн ачааллыг нэмэгдүүлж байгааг уламжилж, Дулааны цахилгаан станцын цахилгаан эрчим хүч борлуулах тарифыг өөрийн өртөгт тулгуурлан тогтоох, бусад аж ахуйн нэгж болон айл өрхөд мөрдөх тарифын зохицуулалтыг бодлогын түвшинд тусгах шаардлагатай байгааг танилцууллаа.
Уулзалтын үеэр талууд эрчим хүчний салбарын найдвартай, тасралтгүй ажиллагааг хангах, өвөлжилтийн бэлтгэлийг хугацаанд нь бүрэн хангах, санхүүгийн хүндрэлээс урьдчилан сэргийлэх чиглэлээр хамтын ажиллагааг эрчимжүүлэхээр санал нэгдэв.
Нар минутад мандаж минутад жаргана.
Үс засуулвал: 
Суудал: 
