Эрдэс баялгийн мэргэжлийн зөвлөлийн өнөөдрийн өргөтгөсөн хуралдаанаар “Эрдэнэтийн-Овоо зэс, молибденын ордыг ашиглах техник, эдийн засгийн үндэслэлийн тодотгол-II” баримт бичгийг хэлэлцэн баталлаа. Хуралдааныг Аж үйлдвэр, эрдэс баялгийн яамны Төрийн нарийн бичгийн дарга, Эрдэс баялгийн мэргэжлийн зөвлөлийн дарга Б.Дашпүрэв удирдсан бөгөөд ТЭЗҮ-ийг “Эс Ар Ди Констракшн” ХХК болон Их Британийн Олон улсын зөвлөх “SLR Consulting Limited” компани хамтран, дотоод, гадаадын нийт 60 гаруй инженер оролцон боловсруулсныг танилцуулав.
Уг хуралд “Эрдэнэт үйлдвэр” ТӨҮГ-ын зүгээс Үйлдвэрлэл, техникийн бодлогын газрын дарга П.Батболор, Хүний нөөц, захиргааны хэлтсийн дарга О.Отгонбаяр, Хөгжлийн хэлтсийн дарга Ц.Цэнд-Аюуш, Хөгжлийн хэлтсийн Ерөнхий геологич Д.Алтанхуяг, Эрчим хүчний хэлтсийн дарга-Ерөнхий эрчим зүйч Л.Ариунболд, Ил уурхайн даргын ажил үүргийг түр орлон гүйцэтгэгч, Үйлдвэрлэл, техникийн хэлтсийн Ерөнхий уурхайчин Д.Эрдэнэбаатар нарын холбогдох газар, хэлтсийн дарга, мэргэжилтнүүд оролцлоо.
Тодотголд, Эрдэнэт үйлдвэрийн дараагийн хагас зууны хөгжлийн стратеги, технологийн шинэчлэл, хөрөнгө оруулалтын дараалал, байгаль орчны хариуцлага, олон улсын түвшинд өрсөлдөх чадварыг нэгтгэсэн урт хугацааны хөгжлийн төлөвлөлтийг тусгажээ.
Эрдэнэтийн-Овоо ордод 4.618 тэрбум тонн геологийн нөөц баталгаажсанаас 2.209 тэрбум тонн нь үйлдвэрлэлийн нөөцөд хамаарч буй юм. Энэхүү нөөцөд түшиглэн, жилд 40 сая тонн хүдэр боловсруулах хүчин чадлаар 56 жилийн турш тогтвортой ажиллах боломж бүрдэж байгааг энэ үеэр онцоллоо. Төслийн хугацаанд “Эрдэнэт үйлдвэр” ТӨҮГ нийт 7.17 сая тонн зэс, 361.8 мянган тонн молибден агуулсан хүдэр боловсруулах бөгөөд жилд дунджаар 110 мянга гаруй тонн зэс, 3.0 мянга гаруй тонн молибден үйлдвэрлэн, Монгол Улсын эдийн засагт бодит хувь нэмэр оруулан ажиллана.
Эрдэс баялгийн мэргэжлийн зөвлөлөөс, “Эрдэнэт үйлдвэр” ТӨҮГ 2080 он хүртэл оновчтой хөрөнгө оруулалт, үр ашигтай технологи, сайн засаглал, олон улсын стандартыг нэвтрүүлэн, уул уурхайн салбарыг дэлхийн түвшинд хүргэх үндэсний загвар үйлдвэрийн нэр хүндээ хадгалан хөгжих бүрэн боломжтойг ийнхүү баталгаажуулав.
Нар минутад мандаж минутад жаргана.
Үс засуулвал: 
Суудал: 
