“Эрдэнэт үйлдвэр” ТӨҮГ-ын Гамшгаас хамгаалах штаб, Орхон аймгийн Онцгой байдлын газар хамтран, гамшиг ослоос урьдчилан сэргийлэх, хамгаалах, эрсдэлийг бууруулах сургалт дадлага зохион байгууллаа.
Аливаа гал түймэр, гэнэтийн ослын үед шуурхай арга хэмжээ авах, удирдлагын манлайлал үзүүлж, аврах үйл ажиллагааг зохион байгуулах гамшиг ослын үед хэрэглэгдэх анхан шатны багаж зэвсэглэмжийг зүй зохистой ашиглах, өөрийгөө болон бусдыг аврах, анхны тусламж үзүүлэх, харилцан хамтын ажиллагааг хангах, үүссэн нөхцөл байдлыг хохирол багатай даван туулах зэрэг үйл ажиллагаанд суралцахад Гамшиг ослоос урьдчилан сэргийлэх сургалтын зорилго оршдог. Энэхүү сургалт, дадлага болон гамшиг, аюул ослоос урьдчилан сэргийлэх чиглэлийн ажлуудыг Эрдэнэт үйлдвэрийн Гамшгаас хамгаалах штаб төлөвлөн, жилийн турш хэрэгжүүлж байна. Энэ удаагийн сургалт нь 2026 онд хэрэгжүүлэх ажлын төлөвлөгөөнд тусгагдсан ээлжит сургалтын нэг юм.
Сургалтад, Онцгой байдлын газар,“Эрдэнэт үйлдвэр” ТӨҮГ-ын Гамшгаас хамгаалах штабын алба хаагчид болон үйлдвэрийн бүтцийн нэгжийн удирдлага, ерөнхий инженер, ХАБЭА хариуцсан ажилтнууд оролцож, үйлдвэрийн бүсийн аль нэг объектод цагийн байдал өгсний дагуу шуурхай арга хэмжээг хэрхэн зохион байгуулах, анхны тусламж үзүүлэх, багаар ажиллах зэрэг хэлбэрээр дадлага сургуулилт хийлээ.
“Гамшиг, ослоос хамгаалах сургалтаар байгалийн гамшиг, аюулт үзэгдлийг эрсдэл багатай даван туулахад бэлэн байх чиглэлээр мэдлэг мэдээлэл, заавар чиглэл өгч, эзэмшүүлдэг. Ингэснээр хүн амын аюулгүй байдлыг хангах, албан хаагчдыг чадавхжуулах өндөр ач холбогдолтой” гэж “Эрдэнэт үйлдвэр ТӨҮГ-ын Гамгаас хамгаалах штабын дарга Л.Ганбаатар сургалтын үеэр онцлов.
Гамшиг ослоос урьдчилан сэргийлэх, хамгаалах тухай хууль тогтоомжийг хэрэгжүүлэх хүрээнд Эрдэнэт үйлдвэрийн 24 бүтцийн нэгжид гамшгийн дадлага, сургуулилтыг сар тутамд ээлжлэн явуулж, хэвшсэн байна. Он гарсаар үйлдвэрийн таван бүтцийн нэгжид гамшгийн дадлага, сургуулилт явагджээ. Мөн энэ сарын 13-15-ны өдрүүдэд Орхон аймагт команд штабын сургуулилт зохион байгуулагдах бөгөөд үүнд Эрдэнэт үйлдвэрийн Гамшгаас хамгаалах штаб, химийн хорт бодис алдагдсан тохиолдолд хэрхэн ажиллах чиглэлээр оролцох юм.
Нар минутад мандаж минутад жаргана.
Үс засуулвал: 
Суудал: 
