“Эрдэнэт үйлдвэр” ТӨҮГ шинээр ажилд орсон залуу ажилтнуудаа нэгтгэн, үйлдвэрлэлийн гол дамжлага, байгууллагын соёл, үнэт зүйлстэй нь ойртуулсан, танилцах аяллыг амжилттай зохион байгууллаа. 2025 оны 10 дугаар сараас хойш ажилд орсон 62 ажилтан энэхүү аялалд хамрагдав.
Аялал өглөөний 08:00 цагт эхэлж, оролцогчдод Хөдөлмөрийн аюулгүй байдал, эрүүл ахуйн зааварчилгаа өгснөөр хөтөлбөр нээгдэв. Үүний дараа тэд Ил уурхайн талбайд очиж, олборлолтын бодит үйл явцтай газар дээр нь танилцлаа. Уурхайн хяналтын инженер Н.Цогтбаяр технологийн дамжлага, үйлдвэрлэлийн онцлогийг дэлгэрэнгүй тайлбарласан юм.
Дараагийн зогсоол Баяжуулах үйлдвэр байв. Энд Өөрөө нунтаглах хэсгийн өргөтгөлийн ажлыг танилцуулж, хэсгийн дарга Р.Эрдэнэ-Очир үйлдвэрлэлийн хүчин чадлыг нэмэгдүүлэх шинэ шийдэл, технологийн дэвшлийг онцлон хүргэлээ.
Мөн оролцогчид Авто тээврийн цехийн үйл ажиллагаа болон Ногоон хөгжил төслийн нэгжийн “Эрдэнэт” төвтэй танилцав. Ойн инженер У.Уянсанаа нөхөн сэргээлт, мод үржүүлгийн ажлуудаа танилцуулж, уул уурхайн салбарт байгаль орчны хариуцлага ямар чухал болохыг тодотгосон юм.
Аяллын дараагийн хэсэг Соёл, урлагийн цогцолборт үргэлжилж, шинэ ажилтнууд үйлдвэрийн түүхэн музейгээр зочиллоо. Энэ үеэр Хүний нөөц, захиргааны хэлтсийн дарга О.Отгонбаяр 2026 оны үйл ажиллагааны зорилт, чиглэлийг товч танилцуулж, “Шинэ ажилтны багц”-ыг гардуулан өгсөн юм. Тэрээр хэлэхдээ, “Монгол Улсын эдийн засгийн тулгуур болсон энэ их айлын нэг хэсэг болж буй та бүхэнд амжилт хүсье. Өв уламжлалаа хадгалж, шинэ үеийн мэдлэгээр ирээдүйг бүтээнэ гэдэгт итгэлтэй байна” хэмээн онцоллоо.
Танилцах аялал Ил уурхайн сүр хүчит тэсэлгээний үйл явцыг шууд үзэж сонирхсоноор өндөрлөсөн бөгөөд энэ нь шинэ залуу боловсон хүчнүүдэд үйлдвэрийнхээ цар хүрээг мэдэрч, бахархах сэтгэгдэл төрүүлсэн ач холбогдолтой үйл явдал боллоо.
Нар минутад мандаж минутад жаргана.
Үс засуулвал: 
Суудал: 
