Авто тээврийн цехийн Хөдөлмөрийн аваргууд тодорлоо

XVII жарны “Сүрээр дарагч” хэмээх Гал морин жилийн сар шинийн баярыг тохиолдуулан Авто тээврийн цех улирч буй Модон могой жилд цехийн төлөвлөгөөт зорилтыг ханган биелүүлэхэд идэвх санаачилга гаргаж, өндөр үр бүтээлтэй ажилласан эрдэнэсийн тээвэрчдээ “Хөдөлмөрийн аварга”-аар өргөмжлөх ёслол, хүндэтгэлийн үйл ажиллагаа өнөөдөр “Оюу” танхимд боллоо.

Энэхүү үйл ажиллагааг нээж, Авто тээврийн цехийн дарга Я.Дамдиндорж үг хэлэхдээ, өнгөрсөн онд нийт 35.6 сая м³ уулын цул тээвэрлэж, 347.8 сая т/км ачаа эргэлт хийхийн зэрэгцээ тээврийн хэрэгслийн бэлэн байдал, парк ашиглалт, төрөл бүрийн тээврийн хэсгийн машин цагийн үйлчилгээ зэрэг олон үзүүлэлт 100 давсан хувиар биелсэн бахдам амжилтыг онцлон дурдлаа. Түүнчлэн, уурхайн зориулалттай 142 тонны даацтай KOMATSU HD-1500-8 загварын гурван өөрөө буулгагчийг хүлээн авч, амжилттай угсарч, ашиглалтад оруулсан бөгөөд дараагийн таван автомашины нийлүүлэлт энэ оны эхний хагас жилд хийгдэх талаар мэдээлэв.

Авто тээврийн цехийн Хөдөлмөрийн аваргаар Уулын технологийн тээврийн хэсгийн хүнд даацын машины жолооч Сүхбатын Эрдэнэбаяр, Цэрэнжавын Мөнх-Ирээдүй, Дэндэвийн Батболд, Технологийн тээврийн автомашины засварын хэсгийн засварчин Баярсайханы Батбилэг, Мягмаржавын Энхмэл, Тусгай зориулалтын машин механизмын засварын хэсгийн засварчин Жавзангийн Баяраа, Төрөл бүрийн маркийн автомашины засварын хэсгийн мастер Хүрлээгийн Баярсайхан, Ачаа тээвэр, шуурхай үйлчилгээний хэсгийн автобусны жолооч Энэбишийн Энхболд, Тусгай зориулалтын тээврийн хэсгийн жолооч Алтанхуягийн Содномжамц, Зорчигч тээврийн хэсгийн автобусны жолооч Жамсрангийн Жамъяндаш, Хүнд машин механизмын хэсгийн жолооч Чойжилсүрэнгийн Эрдэнэцогт, Хөнгөн тэрэгний тээврийн хэсгийн жолооч Батсуурийн Батмөнх, Үйлдвэр техникийн товчооны инженер технологич Доржсүрэнгийн Цогт, Эрчим зүйн товчооны засварчин Ханддоржийн Эрдэнэдаваа, Механикийн товчооны цахилгаан ба хийн гагнуурчин Сүхбаатарын Түмэннаст нар тодорч, шагналаа гардав.

Мөн энэ үеэр Уулын технологийн тээврийн хэсгийн хүнд даацын машины жолооч Нэргүйн Пүрэв “Онц тээвэрчин”, Технологийн тээврийн аж ахуйн хэсгийн үйлдвэрлэлийн байрны цэвэрлэгч Лхагвын Отгонсүрэн “Нийтийн аж ахуйн Тэргүүний ажилтан” хүндэт тэмдэг хүртсэн юм.