Тус хэлтэс энэ онд Хүний нөөцийн менежментийн олон улсын стандарт, ажилтны хөгжил, чадамжийн үнэлгээ, байгууллагын соёл, дижитал шийдлүүдийн хэрэгжилтээр жишиг тогтоосон онцгой амжилтуудтай нэг жилийг үджээ. Хэлтсийн дарга О.Отгонбаярын хэлснээр “Энэ жил бол Эрдэнэт үйлдвэрийн хүний нөөцийн систем олон улсын түвшний тогтолцоо болон төлөвшиж, ажилтны хөгжлийн шинэ экосистем бүрэн идэвхэжсэн жил" байлаа гэдгээрээ онцлог юм.
ISO 30400: Хүний нөөцийн тогтолцоо олон улсын түвшинд баталгаажлаа
Эрдэнэт үйлдвэр Хүний нөөцийн менежментийн ISO 30400 стандартаа давтан баталгаажуулах аудитад үл тохиролгүйгээр, 85 хувь нийцэлтэй дүгнүүлж, олон улсын түвшний HR системтэй байгууллага гэдгээ нотлов. Францын “AFNOR” группийн аудитор багийн зүгээс: Эрдэнэт үйлдвэр хүний нөөцийн менежментийн шинэлэг, тогтвортой хөгжлийн загвар болж байна. HR тогтолцоо нь “зүрх шиг эрүүл, хүчтэй хөгжиж байна” хэмээн үнэлсэн нь онцгой амжилт боллоо.
Ажилтны хөгжлийн томоохон хөтөлбөрүүд хэрэгжлээ
“Talk Talk English” ахисан түвшний сургалт
2025 онд инженер, техникийн 39 ажилтан ахисан түвшний англи хэлний сургалтад хамрагдав. Ерөнхий захирал Г.Ёндон: “Энэхүү сургалт нь Олон улсын технологи, шинэ төслүүдийг хэрэгжүүлэхэд шаардлагатай хүний нөөцийг бэлтгэх оюуны хөрөнгө оруулалт” хэмээн онцолж, ажлын байран дахь хэлний сургалтын тогтолцоо нэг шат ахисан жил боллоо.
“Менторшип–2025” хөтөлбөр
12 ментор 12 шинэ ажилтантай багш-шавийн гэрээ байгуулж, 6 сарын хугацаанд байгууллагын соёл, стандарт, мэргэжлийн чадвар дамжуулсан бөгөөд энэ жилээс шавь нь ментороо өөрөө сонгодог шинэ систем нэвтэрснээр илүү үр дүнтэй болжээ.
Хүний нөөцийн мэргэжилтнүүдийн хөгжлийн хөтөлбөр
Хүний нөөцийн цогц системийг бэхжүүлэх ажлын хүрээнд HR мэргэжилтнүүдийн ур чадварыг ахисан түвшинд хүргэх “Хөгжлийн хөтөлбөр”-ийн II шат эхэлж, мэргэжлийн чадавхыг системтэйгээр дээшлүүлэх сургалтууд хэрэгжиж байна.
Чадамжид суурилсан удирдлагын тогтолцоо бэхэжлээ
Шинэ Хөдөлмөрийн хуулийн дагуу үйлдвэрийн хэмжээнд анх удаа 1548 ажлын байр, 26 мэргэжлийн чиглэлд чадамжийн үнэлгээг хийж, ажлын байрны стандарт-ур чадвар-цалин урамшууллын уялдааг зохион байгуулсан нь хүн төвтэй менежментийг бодитоор бэхжүүлсэн чухал ажил боллоо. Үнэлгээнд үйлдвэрчний эвлэл, сургалтын байгууллага, цалин урамшууллын хэлтсийн төлөөлөл оролцсон нь ил тод, нээлттэй үнэлгээний жишгийг тогтоов.
HR инновац, дижитал шийдэл - “SMART SPACE–2025” уралдаан
“Миний ажлын байр - бидний илэрхийлэл” уриатай инновацын уралдаанаар дараах дижитал шийдлүүд амжилттай хэрэгжив:
HR чатбот-ажилтанд автомат, хурдан мэдээлэл өгөх систем нэвтэрлээ.
“Ажлын байрнаасаа аз жаргал мэдэрье” дотоод аян - байгууллагын эерэг орчныг бий болгож, ажилтны туршлагыг мэдэгдэхүйц сайжруулав.
Эдгээр шийдэл нь Хүний нөөцийн ажлын процессыг автоматжуулж, мэдээллийн хүртээмж, үйлчилгээний чанарыг шинэ түвшинд гаргахад түлхэц болсон.
Архив, албан хэрэг хөтлөлт - Улсын хэмжээнд жишиг тогтоолоо
Эрдэнэт үйлдвэрийн архив, албан хэрэг хөтлөлтийн үйл ажиллагаа тасралтгүй 11 жил улсын үзлэгт 2015, 2019, 2025 онуудад дараалан “Маш сайн” дүн авсан нь хууль тогтоомжийн хэрэгжилт, мэдээллийн ил тод байдал, цахим гарын үсгийн хэрэглээ өндөр түвшинд хүрч, тогтвортой байнгын өөрчлөлтийн баталгаа боллоо. Мөн зориулалтын төрөлжсөн архивын байр нь улсын хэмжээнд жишиг байгууламж хэмээн онцлогдсон байна.
Мэдлэг түгээх экосистемийг хөгжүүлсэн он
Хүний нөөцийн мэргэжилтнүүдийн дунд олон улсын туршлага судлах, байгууллагуудын мэдлэг солилцох өдөрлөгүүдийг тогтмол зохион байгуулж, мэдлэг түгээх, харилцан суралцах экосистемийг байнгын ажиллагаатай болгосон нь энэ оны бас нэгэн томоохон амжилт байлаа. Хэлтсийн дарга О.Отгонбаярын хэлснээр: “2025 он бол хүний нөөцийн тогтолцоогоо олон улсын түвшинд баталгаажуулж, ажилтны хөгжлийн экосистемээ шинэ шатанд гаргасан, Эрдэнэт үйлдвэрийн ирээдүйн хөгжилд суурь болсон онцгой жил байлаа.”
Эдгээр амжилтууд нь Эрдэнэт үйлдвэрийн хүний нөөцийн бодлого шинэлэг, тогтвортой, олон улсын жишигт нийцсэн менежмент болж төлөвшиж буйг харуулж байна.
Нар минутад мандаж минутад жаргана.
Үс засуулвал: 
Суудал: 
