Эрдэнэт үйлдвэрт 2025 онд хийгдсэн томоохон шинэчлэл:
“Эрдэнэт үйлдвэр” ТӨҮГ 2025 онд үйлдвэрлэлийн тогтвортой ажиллагааг хангах, хүчин чадлыг нэмэгдүүлэх, өртөг зардлыг бууруулах зорилтын хүрээнд тоног төхөөрөмжийн шинэчлэл болон өргөтгөл, шинэчлэлийн томоохон төслүүдийг амжилттай хэрэгжүүлж байна. Хүдэр бэлтгэл, баяжуулалт, хаягдлын менежмент гэсэн гурван багц чиглэлд хийгдэж буй ажлууд үйлдвэрлэлийн бүтээмжийг өсгөх, технологийн дэвшлийг нутагшуулах чухал алхам боллоо.
Тоног төхөөрөмжийн шинэчлэл амжилттай үргэлжилж байна
Энэ оны 10 дугаар сарын 8-нд Нунтаглан баяжуулах хэсгийн элэгдэж ашиглалтын хугацаа нь дууссан МШЦ-5.5х6.5 №5 тээрмийг БНХАУ-ын CITIC компанийн шинэ тоног төхөөрөмжөөр амжилттай сольж, ашиглалтад орууллаа. Энэ нь үйлдвэрт өндөр ачаалалтай ажилладаг үндсэн нэгжийн найдвартай, тасралтгүй ажиллагааг хангах стратегийн ач холбогдолтой шинэчлэл болов.
Гидросульфид натри урвалжийг амжилттай нутагшууллаа
Баяжуулах үйлдвэрийн Нунтаглан баяжуулах хэсгийн зэс, молибдений баяжуулалтын дамжлагад гидросульфид натри дарагч урвалжийг туршиж нэвтрүүлэн, 2025 оны наймдугаар сараас тогтмол хэрэглэж эхэлсэн. Шинэ урвалж нэвтрүүлснээр:
-Урвалж болон уурын зарцуулалт буурч, жилд 16 тэрбум төгрөгийн хэмнэлт гаргах боломж бүрдэв.
-Тээрмийн хуяг солих хийн түлхүүрийг өргөх ENDO ELF-22 тэнцвэржүүлэгч өргүүрийг нэвтрүүлснээр ажилтны биеийн хүчний ачааллыг 60–70 хувь бууруулж, хөдөлмөрийн аюулгүй ажиллагааны нөхцөл эрс сайжирч байна.
SIEMENS GH-180 VDF давтамж хувиргагчийг 9 тээрэмд суурилуулав
Нэгдүгээр шатны 9 тээрмийг SIEMENS GH-180 VDF давтамж хувиргагчаар тоноглолоо. Энэхүү систем нь өндөр чадлын тоног төхөөрөмжид зориулагдсан, гэмтэл илрүүлэх хамгаалалтын ухаалаг системтэй бөгөөд үйлдвэрлэлийн бүтээмжийг сайжруулах, тоног төхөөрөмжийн ашиглалтын хугацааг уртасгах давуу талтай юм.
Төслийн багцуудаар хэрэгжиж буй өргөтгөл, шинэчлэлийн ажлууд
Засгийн газар болон Төрийн өмчийн бодлого, зохицуулалтын газрын тогтоолын дагуу Эрдэнэт үйлдвэр хүдэр бэлтгэл, хүдэр баяжуулалт, хаягдлын менежментийн 3 чиглэлийн өргөтгөл, шинэчлэлийн төслүүдийг хэрэгжүүлж байна.
Хүдэр бэлтгэл:
-ӨНХ-ийн өргөтгөлийн төсөл бүрэн хэрэгжсэн. Хүдэр бэлтгэлийн I шугамын шинэчлэлийн ажил гүйцэтгэлийн шатанд явж байна.
Хүдэр баяжуулалт:
-Хам баяжуулалтын 2, 3, 5-р секцийн шинэчлэл хийгдсэн. Дараагийн секцийн судалгааны ажил үргэлжилж байна.
Хаягдлын менежмент:
-Хаягдал өтгөрүүлэгч технологи нэвтрүүлэх төсөл тендерийн шатанд.
-Шинэ хаягдлын сангийн ТЭЗҮ, зураг төслийг боловсруулж байна.
Хүдэр бэлтгэлийн I шугамын шинэчлэлийн онцлох мэдээлэл
Энэ төслийн хүрээнд Ил уурхайгаас 2056 он хүртэл боловсруулах хүдрийн дээжийг олон улсын лабораториудад шинжлүүлэхэд хүдрийн хатуулаг огцом өссөн нь одоогийн тоног төхөөрөмжийн хүчин чадлыг шинэчлэх шаардлагыг бий болгожээ.
Шинжилгээний дүнгээс:
-Бондын индекс 13.65 → 16.12 кВт*цаг/тн, цаашид 18.3 хүртэл өсөх хандлагатай
-Тээрмийн цагийн бүтээмж 3 хувь буурсан.
-Шинэчлэл хийлгүйгээр хүчин чадал 10 хувь буурч, жилд 17.93 сая тн-оос дээш хүдэр боловсруулах боломжгүй болох эрсдэлтэй. Мөн 47 жил ашигласан ККД-1 бутлуурын барилгын элэгдэл ихсэж, мэргэжлийн байгууллагууд засварын дараах баталгааг өгөх боломжгүй гэсэн дүгнэлт гарсан.
Төсөл хэрэгжсэнээр:
-Ашиглалтын хувьсах зардал 7 хувь буурна.
-Борлуулалтын орлого 2.5 сая ам.доллараар өснө.
-Үйл ажиллагааны зардал 614.28 сая ам.доллараар буурна.
-Нэг тонн хүдэр боловсруулах өртөг 6 хувь буурна.
-Хөрөнгө оруулалтаа 7.6 жилд нөхөх юм. Одоогийн байдлаар төслийн гүйцэтгэл 52 хувьтай явж буй. Эрдэнэт үйлдвэр 2025 онд үйлдвэрлэлийн хөгжил, технологийн шинэчлэлийн томоохон ажлуудыг амжилттай хэрэгжүүлж, үйлдвэрлэлийн аюулгүй ажиллагаа, бүтээмж, өртгийн үр ашигт илт мэдрэгдэх ахиц гаргаснаар олон улсын шаардлагад нийцсэн, орчин үеийн уулын баяжуулах үйлдвэрийн хөгжлийн чиг хандлагыг тодорхойлон ажиллаж байна.
Нар минутад мандаж минутад жаргана.
Үс засуулвал: 
Суудал: 
