Эрдэнэт үйлдвэрийн удирдах ажилтны даваа гарагийн ээлжит шуурхай зөвлөгөөнийг Ерөнхий инженер Т.Батмөнх удирдан явууллаа. Өнгөрсөн долоо хоногт үйлдвэрийн хэмжээнд Хөдөлмөрийн аюулгүй байдал, эрүүл ахуйн чиглэлээр үйл ажиллагаа хэвийн явагдсан бөгөөд ажилтнуудад хувийн хамгаалах хэрэгслийг хуваарийн дагуу олгожээ. Мөн энэ долоо хоногийн баасан гарагт ХАБЭА-н ээлжит бага хурлыг зохион байгуулахаар төлөвлөснийг мэдээллээ.
-БОНХХ-ээс үйлдвэрийн газрын Байгаль орчны 2025 оны ажлын тайлан, 2026 оны төлөвлөгөөний төсөл, холбогдох бичиг баримт болон байгаль орчин, уур амьсгалын өөрчлөлтийн талаарх мэдээллийг хүргүүлжээ. Өнгөрсөн долоо хоногт аюултай хог хаягдал устгах тусгай зөвшөөрөлтэй аж ахуйн нэгжид 42.1 кг устгал шаардлагатай химийн бодис, 136 кг принтерийн хор, 1.6 тонн фильтр, 17 тонн тортгийг шилжүүлсэн байна. Мөн тусгай зөвшөөрөлтэй гурван аж ахуйн нэгжийн гэрээний гүйцэтгэлийг дүгнэжээ.
-Үйлдвэрлэл, техникийн хэлтэс үйлдвэрлэлийн үндсэн үзүүлэлтүүдийг танилцуулахдаа уулын цул гаргалт 101.1 хувь, хөрс хуулалт 98.9 хувь, хүдэр дамжуулалт 99.4 хувь, хүдэр боловсруулалт 105.7 хувийн гүйцэтгэлтэй байгааг онцлов. Одоогийн байдлаар өвлийн дизель түлшний долоо, моторын маслын 23, хүхэрт натрийн 14, урвалжийн 15 хоногийн нөөцтэй байна.
Шуурхайн төгсгөлд Ерөнхий инженер Т.Батмөнх дараах чиглэл, үүргүүдийг өглөө. Үүнд:
-Энэ долоо хоногт ХАБЭАХ-ээс үйлдвэрийн хэмжээнд Хөдөлмөрийн аюулгүй байдлын бага хурлыг зохион байгуулж, бүх цех, хэлтсүүд жилийн эцсийн дүнгээ танилцуулах бөгөөд тулгамдсан асуудлаа хэлэлцэн, алдаа давтахгүй байх арга хэмжээг ярилцаж, хийсэн ажлаа дүгнэнэ. Тиймээс цехийн удирдлагууд бага хуралд онцгой ач холбогдол өгч оролцохыг анхааруулав.
-Гэмт хэргээс урьдчилан сэргийлэх салбар зөвлөл өнгөрсөн оны ажлаа дүгнэсэн бөгөөд Дотоодын цэрэг, Гэрээт цагдаагийн хэлтэс болон цех, хэлтсүүд хамтран зохион байгуулсан “Уураар биш ухаалгаар шийдье” арга хэмжээ өндөр үнэлгээ авсныг онцоллоо.
-Үйлдвэрлэлийн үндсэн төлөвлөгөөг биелүүлэхийн зэрэгцээ уурхайн ам тэлэх, шинэ ТЭЗҮ-тэй уялдсан уулын ажил, уулын цул тээвэрлэлтээр нөөц бүрдүүлэх зэрэг томоохон ажлууд өрнөж байна. Техникийн шинэчлэлийн хүрээнд тоног төхөөрөмжүүд ирж эхэлсэн бөгөөд нийт 8 комацу машин ашиглалтад орно. Мөн конвейерын систем хугацааны дагуу ашиглалтад орох бөгөөд хугацаа сунгах боломжгүй. Эхний улиралд уулын цул тээвэрлэлт эхлүүлэхээр төлөвлөсөн.
Эдгээр хоёр том төсөл хэрэгжсэнээр шинэ ТЭЗҮ-ийн дагуу уурхайн шинэ үе шат эхэлж, хүдрийг шинээр нээх боломж бүрэн бүрдэх бөгөөд энэ бүх ажлын амжилт нь ил уурхайн удирдлагын зохион байгуулалт, хугацаа баримтлах чадвараас шууд хамаарахыг тэмдэглэлээ.
-Дараагийн чухал чиглэл нь нүүрс болон технологийн материалын нөөц бүрдүүлэх ажил. Техникийн зөвлөлийн шийдвэрүүд гарч, худалдан авалтууд эхэлсэн бөгөөд бүх ажлыг тодорхой хугацаатай төлөвлөж, долоо хоногийн протокол дээр тогтмол дүгнэн ажиллахыг үүрэг болголоо. Мөн Ерөнхий инженер Т.Батмөнх үйлдвэрлэлийн тасралтгүй найдвартай ажиллагааг хангахын тулд зайлшгүй шаардлагатай бараа материалын ханган нийлүүлэлт, экспортын бүтээгдэхүүний баяжмал ачилтад анхаарал хандуулж, нөөц бүрдүүлэх ажлыг шуурхай зохион байгуулахыг холбогдох нэгжүүдэд даалгав.
Нар минутад мандаж минутад жаргана.
Үс засуулвал: 
Суудал: 
