“Эрдэнэт үйлдвэр” ТӨҮГ-ын Улаанбаатар дахь Төлөөлөгчийн газар болон түүний харьяаны Хэвлэл мэдээлэл, олон нийттэй харилцах албаны ажилтнуудын дунд спортын нөхөрсөг тэмцээн, уулзалт зохион байгуулагдлаа. Тус газрын ажилтнууд гурван багт хуваагдан, волейбол, ширээний теннис, шатар, корнхолл зэрэг спортын дөрвөн төрлөөр өрсөлдөж, хурд хүч, авхаалж самбаагаа сорив. Нөхөрсөг тэмцээнийг нээж, Улаанбаатар дахь Төлөөлөгчийн газрын дарга М.Энхмэнд нийт баг тамирчдад амжилт хүсэхийн зэрэгцээ спорт бол хамт олныг нэгтгэж, нэгэн зорилгод хөтлөх үндэс болдог хэмээн онцолсон бол Хэвлэл мэдээлэл, олон нийттэй харилцах албаны дарга Д.Ганчимэг тус арга хэмжээнд идэвх санаачилгатай оролцож буй нийт ажилтнуудад талархал илэрхийлсэн юм.
Энэ оны 11 сарын 1-нд Эрдэнэт үйлдвэрийн Улаанбаатар дахь Төлөөлөгчийн газрын 47 жилийн ой тохиосон бол 11 сарын 5-нд Хэвлэл мэдээлэл, олон нийттэй харилцах алба 38 дахь жилтэйгээ золгож байна. Түүхэн ойн хүрээнд тус газрын захиргаанаас нийт ажилтнуудынхаа чөлөөт цагийг үр дүнтэй, өгөөжтэй өнгөрөөх зорилгоор ийнхүү нэг өдрийн нөхөрсөг тэмцээнийг зохион байгуулав.
1978 оны 11-р сарын 1-нд Монгол Зөвлөлтийн хамтарсан Уул уурхайн баяжуулах Эрдэнэт үйлдвэрийн Ерөнхий захирлын тушаалаар, Ерөнхий захирлын туслах Семенов Николай Матвеевичийг Улаанбаатар хот дахь Төлөөлөгчийн газрын даргын албан тушаалд томилсноор өнөөгийн “Эрдэнэт үйлдвэр” ТӨҮГ-ын Улаанбаатар дахь Төлөөлөгчийн газар үүсэн байгуулагдсан түүхтэй. Тус газар нь Эрдэнэт үйлдвэртэй холбоотой гадаад, дотоод олон талын харилцаа холбоог төлөөлөн ажиллах чиг үүрэг бүхий нэгж бол Хэвлэл мэдээлэл, олон нийттэй харилцах алба нь Эрдэнэт үйлдвэрийн үйл ажиллагааг олон нийтэд мэдээлэх, уурхайчдын ажил үйлсийг мэргэжлийн түвшинд сурталчлан таниулах үндсэн үүрэгтэй ажилладаг алба юм.
Нар минутад мандаж минутад жаргана.
Үс засуулвал: 
Суудал: 
