Эрдэнэт үйлдвэр хүнээр дамжуулан ухаалаг, нэгдсэн тогтвортой хөгжлийн Монгол загварыг бүтээж байна

Энэ сарын 21-24-ний өдрүүдэд Эрдэнэт үйлдвэрт явагдсан “Хүний нөөцийн менежментийн тогтолцооны ISO 30400” багц стандартын давтан баталгаажуулалтын аудитын хаалтын хурлын үеэр Франц Улсын "Афнор" группийн бүсийн менежер, Монгол дахь албан ёсны төлөөлөгч Монсерфт компанийн үүсгэн байгуулагч Г.Билгүүн энэ үгийг хэлсэн юм. Тэрээр, аливаа байгууллагыг амьд организм гэж харах хэрэгтэй. Хэрвээ чанарын тогтолцоог бие махбод гэж үзвэл хүний нөөцийн менежмент тэр байгууллагын зүрхний цохилт юм. Өнөөдөр Эрдэнэт үйлдвэрийн зүрх эрүүл, хүчтэй байгааг харахад таатай байна. Хөндлөнгийн аудит нь байгууллагын сул талыг хайдаггүй, харин боломж, шинэчлэл, хүний нөөцийн үйл ажиллагааг илүү сайжруулахад чиглэдэг. "Афнор" групп болон Монсерфт компанийн хамтарсан аудитын дүгнэлтээр Эрдэнэт үйлдвэрийг зөвхөн стандарт хэрэгжүүлэгч биш, харин стандартаар хөгжил бүтээдэг байгууллага гэдгийг баталлаа” хэмээн онцлов.

Франц улсын “Афнор” группийн Олон улсын аудитор Андрей Оленков "Эрдэнэт үйлдвэр" ТӨҮГ-т хэрэгжиж буй “Хүний нөөцийн менежментийн тогтолцоо ISO 30400” багц стандартын хэрэгжилтэд сэтгэл хангалуун байгаагаа илэрхийлэн, шалгалтаар үл тохирол илрээгүйн дээр 85 хувьтай үнэлэгдсэнийг танилцууллаа. Энэхүү стандартын нийцэл 85 хувьтай байна гэдэг Эрдэнэт үйлдвэрийн ил тод байдал, хамтын уялдаа, хүний хөгжлийг дээдэлсэн соёлын тогтолцоо сайн байгааг харуулж байна хэмээн тодотгосон юм.

 “Хүний нөөцийн менежментийн тогтолцоо ISO 30400” багц стандартын давтан баталгаажуулалтын аудит Эрдэнэт үйлдвэрийн Ерөнхий захиргаа болон Баяжуулах үйлдвэр, Ил уурхай, Үйлдвэрлэл, технологийн парк, “Ногоон хөгжил” төслийн нэгж, Төрөлжсөн архив зэрэг хүдрийн нөөцийн хайгуул, уурхайн олборлолт, баяжмалын үйлдвэрлэл, дэмжих нэгжүүд болон засаглалын үйл явцын хүний нөөцийн менежментийн тогтолцоог хамарсан юм.

Эрдэнэт үйлдвэр "Дэлхийн жишиг, Монголын бахархал" байх алсын хараа, эрхэм зорилгодоо нийцсэн хүний нөөцийн цогц бодлоготой, олон улсын жишиг стандарт хэрэгжүүлэгч уул уурхайн тэргүүлэх үйлдвэр гэдгээ ийнхүү дахин баталлаа.