“Эрдэнэс Монгол” нэгдлийн харьяа төрийн өмчит компаниуд оны эхний хагас жилийн ажлынхаа тайлан, өвөлжилтийн бэлтгэлээ Монгол Улсын сайд, Засгийн газрын Хэрэг эрхлэх газрын дарга С.Бямбацогт, Засгийн газрын дэд дарга болон зөвлөхүүд, мөн “Эрдэнэс Монгол” нэгдлийн удирдлагуудад танилцуулж байна.
Хэлэлцүүлгийн салхийг “Эрдэнэт үйлдвэр” ТӨҮГ-ын Ерөнхий захирал Г.Ёндон хагалж, үйлдвэрлэл, эдийн засаг, хөрөнгө оруулалт, бүтээн байгуулалт, өвөлжилтийн бэлтгэлийн явцаа дэлгэрэнгүй танилцууллаа.
Зэс хайлуулах үйлдвэр барих мөрөөдөл биелэхэд ойртлоо
Тэрээр зэс хайлуулах үйлдвэр барих Эрдэнэтчүүдийн төдийгүй нийт Монголчуудын мөрөөдлийг биелүүлэх боломж энэ цаг үед тохиож байгааг онцлоод, Үйлдвэрлэл, технологийн паркийн дэд бүтцийн бүтээн байгуулалт урагштай явааг танилцуулав. Тухайлбал, төмөр зам 97 хувьтай, усан хангамж, ариутгал татуургын асуудал 100 хувь шийдэгджээ. Харин авто замын ажил 60, цахилгаан хангамжийн ажил 15 орчим хувийн гүйцэтгэлтэй явна. Энэ бүтээн байгуулалт Монгол Улсыг аж үйлдвэржсэн орон болгох, импортын хамаарлыг бууруулах, эдийн засгийг төрөлжүүлэх, өнгөт металлургийн үйлдвэрлэлийг хөгжүүлэх стратегийн зорилттой уялдаж байгаа юм.
Уул уурхайн компанид мод үржүүлгийн газар хэрэгтэй
Эрдэнэт үйлдвэрийн дараагийн томоохон төсөл бол Хангайн бүсэд мод үржүүлгийн газар байгуулах ажил. Энэ нь “Тэрбум мод” үндэсний хөдөлгөөнд нэгдэж, 100 сая мод тарьж ургуулах амлалтаа хэрэгжүүлэх нөхцөл бүрдүүлэхийн зэрэгцээ байгаль орчны нөхөн сэргээлт, уур амьсгалын өөрчлөлтийн эсрэг тэмцэлд чухал хувь нэмэр оруулах юм. Цаашилбал, карбон кредитийн зах зээлд оролцох боломжийг ч нээж өгнө гэж Ерөнхий захирал Г.Ёндон онцоллоо.
Зэсийн баяжмал хайлуулах үйлдвэр хөрөнгө оруулалтаа 8.8 жилийн хугацаанд нөхнө
Зэсийн баяжмал хайлуулах, боловсруулах үйлдвэрийн төслийн хөрөнгө оруулалт 772.9 сая ам.доллар бөгөөд 8.8 жилийн дотор нөхөх тооцоотой. Үйлдвэр ашиглалтад орсноор нэмүү өртөг шингэсэн эцсийн бүтээгдэхүүн үйлдвэрлэж, өнгөт металлургийн салбарыг шинэ шатанд гаргана.
Тасралтгүй ажиллагааг хангах шинэчлэл
Эрдэнэт үйлдвэр 55 жил ашиглах хүдрийн нөөцтэй. Үйл ажиллагаагаа хэвийн үргэлжлүүлэхийн тулд Хүдэр бэлтгэлийн I шугамын шинэчлэл, Хаягдал өтгөрүүлэх технологи нэвтрүүлэх, Хаягдал хураах шинэ сан байгуулах зэрэг томоохон бүтээн байгуулалтын ажлуудыг үе шаттай хэрэгжүүлж байгааг энд дурдлаа. Баяжуулах үйлдвэрийн Хүдэр бэлтгэлийн I шугамын тоног төхөөрөмжийг шинэчилснээр цахилгаан зарцуулалт, хуяг, ган бөөрөнцөг зэрэг ашиглалтын хувьсах зардал долоон хувиар, хүдэр боловсруулалтын өртөг зургаан хувиар буурна. Харин Хаягдал өтгөрүүлэх технологи нэвтрүүлснээр эргэлтийн ус хангамжийн найдварт байдал хадгалагдахаас гадна үйлдвэрийн хаягдал булингыг 60 хувь хүртэл өтгөрүүлснээр шинэ хаягдлын сангийн далангийн тогтворжилт сайжирч, цагаан тоосны дэгдэлт эрс буурах юм. Мөн цэвэр усны зарцуулалтыг жилд 5.2 сая.м3-р бууруулна гэж тооцжээ.
Баяжуулах үйлдвэрийн хаягдлын шинэ сан байгуулах зориулалт бүхий 7048 га газарт бүтээн байгуулалт өрнүүлснээр Эрдэнэт үйлдвэр ирэх 60 жил найдвартай ажиллах нөхцөл бүрдэнэ. Мөн мөчлөгт урсгалт тээврийн технологи нэвтрүүлэх, олон улсын стандартын шаардлага хангасан лабораторийн шинэ барилга, Соёл спортын Эрдэнэт цогцолбор, Засвар механикийн заводын өргөтгөл зэрэг төслүүд ч хэрэгжиж байгааг танилцуулав.
Өвөлжилтийн бэлтгэл эрчимтэй байна
Эрдэнэт үйлдвэр улс, орон нутгийн төсөвт жилд дунджаар 1.8 их наяд төгрөг төвлөрүүлдэг. Энэ үүргээ найдвартай биелүүлэхийн тулд 26 бүтцийн нэгжийг хамарсан, 305 ажил, арга хэмжээ бүхий намар-өвлийн бэлтгэлийн төлөвлөгөө батлан хэрэгжүүлж байгааг Ерөнхий захирал мэдээллээ.
Нар минутад мандаж минутад жаргана.
Үс засуулвал: 
Суудал: 
