“Өрсөлдөөний асуудал хариуцсан Төрийн захиргааны байгууллагын үйл ажиллагаа ба захиалагч, сонирхогч этгээдтэй холбоотой эрх зүйн зохицуулалт, түүнд тулгамдаж буй асуудал” сэдэвт сургалт өнөөдөр боллоо. Уг сургалтыг Засгийн газрын хэрэгжүүлэгч агентлаг Монополын эсрэг газраас Эрдэнэт үйлдвэртэй хамтран зохион байгуулав.
Сургалтад “Эрдэнэт үйлдвэр” ТӨҮГ-ын Ерөнхий инженер Т.Батмөнх, Монополын эсрэг газрын Өрсөлдөөний зохицуулалт, зах зээлийн судалгааны газрын дарга П.Номин-Эрдэнэ, “Эрдэнэт үйлдвэр” ТӨҮГ-ын Захиргаа, удирдлага, санхүүгийн газрын дарга Д.Баярбат, Хөрөнгө оруулалт, худалдан авах ажиллагааны бодлогын газрын дарга С.Энхмандах, Хяналтын асуудал хариуцсан менежер И.Мөнхжаргал, Монополын эсрэг газрын Өрсөлдөөний зохицуулалт, зах зээлийн судалгааны газрын ахлах мэргэжилтэн О.Мөнхбат, мэргэжилтэн Д.Буянжаргал, Э.Энхсарнай болон Эрдэнэт үйлдвэрийн үйлдвэрлэл, санхүү, эдийн засаг, хууль, дотоод хяналт, нийгэм, худалдан авах ажиллагаа хариуцсан бүтцийн нэгжүүдийн ажилтнууд, Орхон аймгийн худалдан авах ажиллагааны газар, Баян-Өндөр, Жаргалант сумын ЗДТГ-ын төлөөлөл оролцлоо.
“Эрдэнэт үйлдвэр” ТӨҮГ-ын Ерөнхий инженер Т.Батмөнх сургалт, үйл ажиллагааг нээж хэлсэн үгэндээ, “Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн шинэчилсэн найруулгыг Монгол Улсын Их Хурлаас баталж, өнгөрсөн оны нэгдүгээр сарын 01-нээс мөрдөгдсөнөөс хойш жил гаруй хугацаа өнгөрөөд байна. Мөн хууль батлагдсантай холбоотойгоор Санхүү, төсвийн асуудал эрхэлсэн Засгийн газрын гишүүн энэ хуулийн холбогдох заалтуудын дагуу 2023 оны 12-р сарын 25-ны өдрийн холбогдох тушаалуудаар тендер шалгаруулалтын жишиг баримт бичиг, гэрээний нөхцөл, аргачлал, дэг, заавар, журмуудыг баталсан. “Эрдэнэт үйлдвэр” ТӨҮГ-аас Монополын эсрэг газарт хүсэлт хүргүүлсний дагуу өрсөлдөөнийг дэмжих, хэрэглэгчийн эрхийг хамгаалах чиглэлээр холбогдох хууль тогтоомжийн хүрээнд үйл ажиллагаа эрхэлж буй Монополын эсрэг газрын Өрсөлдөөний зохицуулалт, зах зээлийн судалгааны газрын дарга, мэргэжилтнүүд өнөөдрийн сургалтыг зохион байгуулахаар ирсэнд уурхайчин хамт олныхоо нэрийн өмнөөс талархал илэрхийлье. Уул, уурхайн хүнд үйлдвэрийн үйлдвэрлэлийн үйл ажиллагааны найдвартай, тасралтгүй үйл ажиллагааг хангах, техник, тоног төхөөрөмжийн шинэчлэлийн ажлыг хийж гүйцэтгэхэд хөрөнгө оруулалт, түүнийг дагаад худалдан авах ажиллагааг хууль тогтоомжийн хүрээнд түргэн, шуурхай, зөрчил, дутагдалгүй зохион байгуулах нь өндөр ач холбогдолтой байдаг. Иймээс худалдан авах ажиллагаа, тендер шалгаруулалттай холбоотой хууль тогтоомжийг хэрэгжүүлэхэд хүндрэл, бэрхшээлтэй, эргэлзээтэй зүйлсийг энэ сургалтын үеэр тодруулах, нэгдсэн ойлголттой болох боломж бүрдэж байна” хэмээн онцлов.
Тус сургалтын эхэнд Монополын эсрэг газраас “Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хууль”-ийн зүйл заалтын талаар дэлгэрэнгүй мэдээлэл хийв. Түүнчлэн, сургалтад оролцогчид Өрсөлдөөний тухай хууль, Хэрэглэгчийн эрхийг хамгаалах тухай хууль, Тендер шалгаруулалтын талаарх гомдол, маргаан, Тендер шалгаруулалтын баримт бичиг боловсруулалттай холбоотой асуудлын талаар хэлэлцэж, санал бодлоо солилцлоо.
Нар минутад мандаж минутад жаргана.
Үс засуулвал: 
Суудал: 
