Удирдах ажилтнуудын шуурхайн тойм

Эрдэнэт үйлдвэрийн удирдах ажилтнуудын ээлжит шуурхай зөвлөгөөн өнөөдөр болж, бүтцийн нэгжүүд өнгөрсөн долоо хоногт хийсэн ажлаа танилцуулж, үйлдвэрлэлийн үйл ажиллагаа, бараа материалын ханган нийлүүлэлт болон цаг үеийн асуудлаар мэдээлэл хийв. 
Шуурхайн эхэнд Ерөнхий инженер Т.Батмөнх: Монгол Улсын Боловсролын сайдын 311 тоот тушаалаар ШУТИС-ийн харъяа Эрдэнэт цогцолбор дээд сургуулийг Мэргэжлийн их сургуулийн ангилалд хамруулсан талаар танилцууллаа. Тус сургууль цаашид Мэргэжлийн их сургуулийн ангилалд орсноор Эрдэнэт цогцолбор их сургууль нэртэйгээр үйл ажиллагаагаа явуулахаар болсон байна. 
ХАБЭАХ-ийн дарга Д.Мөнхболд: Өндөр эрсдэлтэй 14, галын таван ажил хийж, хоёр аюулыг илрүүллээ. Хувцас, хамгаалах хэрэгслийн ханган нийлүүлэлт нэмэгдэж байна. Дөрөвдүгээр шатны хяналт шалгалт Сэлэнгэ амралт аялал жуулчлалын цогцолборт явагдаж, сайн үнэлгээ авсан. Сөрөг хүчин зүйлсийн 103 хэмжилт хийснээс долоо нь зөвшөөрөгдөх хэмжээнээс хэтэрсэн байна. Энэ асуудлаар албан тоот хүргүүлэн ажиллаж байна. Хөдөлмөр хамгааллын чиглэлээр нийт 275 хүнд сургалт явууллаа. Жолоочийн аюулгүй системийн тоног төхөөрөмжийг 17 машинд суурилуулан ажиллаж байна гэж мэдээлэв. 
Цагаан тоосны нөлөөлийн бүсийн эрүүл мэндийн үзлэгт нийт 392 иргэн хамрагджээ. Орхон аймгийн Байгаль орчны газраас ирүүлсэн албан бичгийн дагуу нийгмийн хариуцлагын хүрээнд Хангал голын дагуу 12 км, 270 га талбайн хогийг 26 бүтцийн нэгжийн 318 ажилтан 13 тээврийн хэрэгсэлтэй цэвэрлэж, 33,4 тн хогийг хогийн цэгт буулгаж ажиллажээ. Мөн аюултай хог хаягдлыг 7 хоног бүр тусгай зөвшөөрөлтэй аж ахуйн нэгжид шилжүүлэн ажилласан байна. 
Өнгөрсөн долоо хоногт Монгол Улсын Ерөнхийлөгч У.Хүрэлсүх Хархорум хотын бүтээн байгуулалтын ажлыг эхлүүлж, энэхүү ёслолд Эрдэнэт үйлдвэр ТӨҮГ-ын Ерөнхий захирал Г.Ёндон оролцжээ. Эрдэнэт үйлдвэр Хархорум хотын ногоон байгууламж, хамгаалалтын зурвас байгуулах ажилд 150.000 мод тарих үүрэг авч, хаврын мод тарих хугацаанд 84.280 навчит модыг Зэвсэгт хүчний 256 ангийн бие бүрэлдэхүүнтэй хамтран тарьсан байна.