“Уураар бус ухаалгаар” тусгай ажиллагааны нээлт боллоо

Орхон аймгийн Гэмт хэргээс урьдчилан сэргийлэх ажлыг зохицуулах салбар зөвлөл, “Эрдэнэт үйлдвэр” ТӨҮГ-ын гэрээт Дотоодын цэргийн 816 дугаар анги, Гамшгаас хамгаалах штаб болон Хөдөлмөрийн аюулгүй байдал, эрүүл ахуйн хэлтэс хамтран зохион байгуулж буй “Уураар бус ухаалгаар” тусгай арга хэмжээний нээлт Соёл, урлагийн цогцолборын их танхимд өчигдөр боллоо.
Уг үйл ажиллагаа нь үйлдвэрийн газрын ажилтнуудыг хүний эрүүл мэндийн халдашгүй байдлын эсрэг гэмт хэрэгт өртөж хохирохоос урьдчилан сэргийлэх, хуулийн мэдлэг ойлголтыг нэмэгдүүлэх зорилготой юм. Нээлтийн үйл ажиллагаанд Орхон аймгийн Прокурорын газрын хяналтын прокурор, хууль цаазын зөвлөх Г.Дэлгэрмэнд, Цагдаагийн газрын Хэрэг бүртгэх тасгийн дарга, цагдаагийн дэд хурандаа Б.Мөнхтулга, Шүүх шинжилгээний шинжээч эмч, цагдаагийн дэслэгч Э.Батбаяр нар оролцож, хүний эрүүл мэндийн халдашгүй байдлын эсрэг гэмт хэргийн тоо баримт, шалтгаан нөхцлийн талаар мэдээлэл өгч, танилцуулга хийв. 
Нээлтэд Эрдэнэт үйлдвэрийн 416 орчим ажилтан оролцсон бөгөөд Дотоодын цэргийн 816 дугаар ангиас боловсруулсан 420 гарын авлага, сэрэмжлүүлэг бүхий зургаан төрлийн 400 зурагт хуудас тараалаа.
Мөн энэ үеэр Гэмт хэргээс урьдчилан сэргийлэх салбар зөвлөлийн туг аялуулах ёслол болж, тугийг тус ангийн захирагч хурандаа Д.Гантөмөр болон “Эрдэнэт үйлдвэр” ТӨҮГ-ын Ерөнхий инженер Т.Батмөнх нарт салбар зөвлөлийн нарийн бичгийн дарга Б.Болортунгалаг хүндэтгэлтэйгээр гардуулсан юм.