“Байгууллагын хөгжил-Тасралтгүй сайжруулалт” уулзалт хэлэлцүүлэг өрнөж байна

Эрдэнэт үйлдвэрийн тасралтгүй сайжруулалтын ажлыг хэлэлцэх, бүтээмжийг дээшлүүлэх бодлого, стратеги, журмыг шинэчлэн боловсруулахад ажилтнуудын идэвхтэй оролцоог дэмжин, тэдний санал санаачилгыг тусгахад чиглэсэн “Байгууллагын хөгжил-Тасралтгүй сайжруулалт” уулзалт хэлэлцүүлэг “Оюу” танхимд өрнөж байна. 
Энэхүү хэлэлцүүлэгт “Эрдэнэт үйлдвэр” ТӨҮГ-ын Ерөнхий захирал Г.Ёндон, Ерөнхий инженер Т.Батмөнх болон газар, хэлтэс, цех, нэгжийн удирдлагууд, сайн саналын системийн манлайлагчид, бүтээмж чанарын дугуйлангийн ахлагч, гишүүд, саналын үнэлгээчид гээд 230 гаруй ажилтан оролцож байна.

“Эрдэнэт үйлдвэр” ТӨҮГ-ын Ерөнхий захирал Г.Ёндон хэлэлцүүлгийг нээж хэлсэн үгэндээ, энэ уулзалт нь үйлдвэрийн газрын хөгжил дэвшил, бүтээмжийг дахин нэмэгдүүлэх, шинэ шатанд гаргах нэгэн чухал алхам гэж үзэж байгаагаа илэрхийлээд цаашид ажилтны оролцоог дэмжих, бизнес процессыг сайжруулах, хөрөнгө оруулалтын үр ашгийг нэмэгдүүлэх, нөөцийн удирдлагыг сайжруулах, удирдах ажилтны манлайллыг дээшлүүлэх, дэвшилтэт технологи нэвтрүүлэх зэрэг чиглэлээр өргөн хүрээнд санаачилгатай ажиллаж, бүтээмжийг шинэ түвшинд хүргэх хэрэгтэйг онцоллоо. Тэрээр мөн цахим шилжилт, хиймэл оюун, өгөгдөлд суурилсан шийдэл боломжуудыг түлхүү ашиглах цаг нэгэнт ирснийг онцлоод, дэлхий дээр хэрэгжиж буй тэргүүн туршлага, ижил салбарын томоохон өрсөлдөгчдийн арга барилаас суралцаж, бүтээмжийг дээшлүүлэх арга, аргачлалуудыг Эрдэнэт үйлдвэрийнхээ хөрсөнд нутагшуулж, улмаар ажилчдадаа эзэмшүүлж, эрдэс баялаг, эрдэнэс хайх, олборлох, баяжуулах, боловсруулах үйл ажиллагаандаа ашиглах нь зүйтэй гэв. 
Эрдэнэт үйлдвэр Монгол Улсдаа анхдагч болж, 2005 оноос бүтээмжийн асуудлыг дэвшүүлэн судалж, тодорхой хөтөлбөртэйгөөр арга хэмжээнүүд авч, тогтмол сайжруулалт хийж ирсэн туршлагатай. Хэлэлцүүлгийн үеэр сайн туршлагаа танилцуулахын зэрэгцээ ойрын жилүүдэд бүтээмж, инновацын чиглэлээр хэрэгжүүлэх бодлого, стратегийг оролцогчид хамтдаа тодорхойлж, цаашид хэрхэн илүү бүтээмжтэй, үнэ цэнтэй, ухаалаг ажиллах вэ гэдэг асуултад хамтдаа хариулт хайх юм.  
2024 онд “Эрдэнэт үйлдвэр” ТӨҮГ-ын ажилтнууд сайн саналын системээр өдөр бүр 21 санал дэвшүүлж, тэдгээрийн 18 нь хэрэгжсэнээр үйлдвэрлэлийн бүхий л талбарт байнгын дэвшил гарч ирсэн. Тодруулбал, нийт ажилтны 30,2 хувь нь саналын системд оролцож, 7796 сайжруулалтын санал гаргаснаас 85 орчим хувь нь амжилттай хэрэгжсэн байна.