“Эрдэнэт үйлдвэр” ТӨҮГ-ын удирдах ажилтнуудын даваа гаргийн ээлжит шуурхай зөвлөгөөн өнөөдөр болж, цаг үеийн мэдээлэл, үйлдвэрлэлийн явц, хэрэгжиж буй төслүүд болон төлөвлөгөөт ажлуудын талаар хэлэлцлээ.
Зөвлөгөөний эхэнд “Улаанбаатар төмөр зам” хувь нийлүүлсэн нийгэмлэгээс зохион байгуулсан “Хамтын ажиллагаа–2025” зөвлөгөөнд “Эрдэнэт үйлдвэр” ТӨҮГ “Экспортын бүтээгдэхүүнээ тээвэрлүүлэгч Шилдэг байгууллага”-аар шалгарсан баярт мэдээг дуулгав. Уг шагналын цомыг Тээвэр, ложистикийн төвийн дарга Х.Олзбаатар Ерөнхий захирал Г.Ёндонд гардуулсан юм.
Үйлдвэрлэлийн төлөвлөгөөт үзүүлэлтүүд биелжээ
Үйлдвэрлэл, техникийн хэлтсийн мэдээлснээр сарын эхнээс үйлдвэрлэлийн төлөвлөгөө бүх үзүүлэлтээр биелжээ. Тухайлбал, уулын цул гаргалт 56.4 мянган м³, хөрс хуулалт 128.2 мянган м³-ээр тус тус давсан бол хүдэр боловсруулалт одоогийн байдлаар 15.4 мянган тонноор илүү явж байна. Зэсийн баяжмал гаргалт ч мөн төлөвлөгөөг 903 тонноор давжээ. Мөн зэсийн ачилт 13 вагоноор илүү гарсан бөгөөд сарын эхнээс нийт 86 контейнер молибденын баяжмал ачиж тээвэрлэсэн байна.
Геотехникийн хөтөлбөр амжилттай хэрэгжжээ
“Эрдэнэтийн Ил уурхайд геотехникийн цогц хөтөлбөр нэвтрүүлэх” төсөл амжилттай хэрэгжиж дууссан талаар Ерөнхий уурхайчин Д.Эрдэнэбаатар мэдээлэв. Тус төслийн ажлыг Австралийн “Cartledge Mining and Geotechnics” компани гүйцэтгэж, өнгөрсөн онд нийт 4500 уртааш метр өрөмдлөг хийсэн байна. Өрөмдлөгийн ажилд Ил уурхай болон Геологи, хайгуулын экспедицийн геологич, геотехникийн инженерүүд оролцож, гүйцэтгэгч компанийн мэргэжилтнүүдтэй хамтран ажилласан юм. Эдгээр цооногийн өгөгдлүүд дээр үндэслэн 700 метр гүн Ил уурхайн ерөнхий хажуугийн өнцгийг оновчлохоос гадна, Эрдэнэтийн-Овоо ордын ашиглалтын ТЭЗҮ боловсруулж буй компанид уурхайн төлөвлөлтийн геотехникийн шаардлагатай мэдээллийг нийлүүлжээ.
“Алхам бүрийн амт” алхалт энэ сарын 25-нд болно
Спорт цогцолбор “Алхан бүрийн амт” ажилтан, албан хаагчдын уламжлалт алхалтыг энэ сарын 25-нд зохион байгуулахаар төлөвлөснөө танилцууллаа. Үүнд үйлдвэрийн газрын бүтцийн нэгжүүд өргөн бүрэлдэхүүнтэй оролцохыг уриалав. Мөн “Удирдлага-2025” спортын цуврал үйл ажиллагааны волейболын тэмцээнийг дөрөвдүгээр сарын 26-ны амралтын өдөр зохион байгуулах ажээ.
Зам засварын ажил эхэлнэ
Энэ сарын 17-ноос ирэх даваа гараг хүртэл Ерөнхий захиргааны нэгдүгээр байрны урд уулзвараас Нунтаглан баяжуулах хэсэг хүртэлх авто замын засварын ажлыг Барилга засварын цех гүйцэтгэхээр болжээ. Иймээс пүрэв гаргийн үдээс өмнө амжиж ачаа бараа зөөх, төв гарц хаагдах учраас II постоор тээврийн хэрэгслийн хөдөлгөөнийг зохицуулахыг анхааруулав.
Нар минутад мандаж минутад жаргана.
Үс засуулвал: 
Суудал: 
