“Эрдэнэт үйлдвэр” ТӨҮГ-ын үйлдвэрлэлийн технологийн хаягдал булинга хаягдлын санд элс болон хуримтлагдаж, эндээс дэгддэг цагаан тоос ойр орчмын бүсэд суурьшдаг иргэдийн ахуй байдалд таагүй нөлөө үзүүлдэг. Иймээс Эрдэнэт үйлдвэр 2006 оноос цагаан тоосны нөлөөллийн бүсэд амьдардаг иргэдийг эрүүл мэндийн урьдчилан сэргийлэх үзлэгт удаа дараа хамруулсаар ирсэн. Сүүлийн үед эрүүл мэндийн энэхүү үзлэгийг тогтмолжуулж жил бүр зохион байгуулах болсон.
Цагаан тоосны нөлөөллийн бүсэд амьдардаг иргэдийн энэ удаагийн эрүүл мэндийн хяналтат үзлэг дөрөвдүгээр сарын 07-ны өдрөөс эхэллээ. Өнгөрсөн жил Орхон аймгийн Жаргалант сумын Улаантолгой, Дулаан-Уул, Жаргалант, Баян-Өндөр сумын Баянцагаан, Говил багийн 1866 иргэн эрүүл мэндийн энэхүү үзлэгт хамрагдсан бөгөөд эндээс уушгины эмгэгтэй, архаг суурь өвчлөлтэй, эрсдэлтэй дүгнэгдсэн 500 хүнийг сонгон энэ жил хяналтат үзлэгт хамруулж байгаагаараа онцлог гэж “Эрдэнэт медикал” эмнэлгийн тусламж үйлчилгээ хариуцсан орлогч Б.Мөнхжаргал ярилаа.
Хяналтат үзлэгийн хүрээнд компьютер томограф болон хэвлийн хэт авиан шинжилгээ, зүрхний цахилгаан бичлэг зэрэг нарийн үзлэг оношилгоо хийгдэхээс гадна мэдээллийн сан үүсгэх, судалгаа боловсруулалтын ажлууд давхар хийгдэж байгаа юм.
2024 оны эрүүл мэндийн урьдчилан сэргийлэх үзлэгт хамрагдсан цагаан тоосны нөлөөллийн бүсийн иргэдийн 67 хувь нь илүүдэл жинтэй болон таргалалттай, үүнээс улбаалсан зүрх судасны өвчлөл үүсгэх артерийн даралт ихсэлт, төвийн таргалалт, цусны өөх, тосны үзүүлэлт, сахар ихсэлт зэрэг эрсдэлт хүчин зүйлс өндөр байгаа тул үйлчлүүлэгчдийн эрүүл мэндийн боловсролыг дээшлүүлэх, эрсдэлээс хамгаалах арга замуудыг таниулах, урьдчилан сэргийлэх дадлыг төлөвшүүлэх шаардлагатай гэж мэргэжилтнүүд үзжээ. Иймээс тус багуудад эрүүл мэндийн өдөрлөг, үйл ажиллагааг зохион байгуулахаар төлөвлөсөн байна.
Нар минутад мандаж минутад жаргана.
Үс засуулвал: 
Суудал: 
