“Эрдэнэт үйлдвэр” ТӨҮГ-ын удирдлага, худалдан авах ажиллагаанд шууд оролцдог ажилтнуудтай өнөөдөр уулзалт хийлээ. Уулзалтад Ерөнхий захирал Г.Ёндон, Хяналтын асуудал хариуцсан менежер И.Мөнхжаргал нар оролцож, худалдан авах ажиллагааны үнэлгээний хороонд орж ажилладаг нийт бүтцийн нэгжийн удирдлага, мэргэжилтнүүдэд Үйлдвэрийн газрын баримталж буй бодлого чиглэл, стратеги төлөвлөгөө болон цаг үеийн чухал асуудлуудын талаар мэдээлэл өгч, санал бодлоо солилцлоо.
Ерөнхий захирал үйлдвэрийн газарт хэрэгжиж буй төсөл хөтөлбөр, үр ашиг, техник технологийн шинэчлэл, нөөцөө өсгөх, зардлаа хэрхэн бууруулах чиглэлээр олон талын мэдээлэл хийсэн. Тэрээр, “Бид хүдрийн агуулга буурах тутамд металл авалтаа хэмжээнд нь барьж ажилладаг. Цаашид агуулга буурахад хүдэр олборлолтоо нэмэгдүүлнэ. Аливаа уул уурхайн компанийн геологийн нөөц маш сайн байх ёстой. Дээр нь хүний нөөцийн асуудал чухал. Эрдэнэт үйлдвэрийн хүний нөөцийг чадварлаг баг хамт олноор бүрдүүлж чадсан. Манай үйлдвэр цаашид 55 жил ашиглах геологийн нөөцтэй. Энэ нөөцөө ашиглах чадвартай хүний нөөц байна. Ийм хоёр нөөцтэй байхад ямар ч шинэ техник, технологийг үйлдвэрлэлд нэвтрүүлэх чадвар, чадамж бидэнд бий. Нөгөө талаар тендерийн худалдан авалт хугацаандаа хийгдэх, төсөвтөө багтах, техникийн тодорхойлолтын үзүүлэлтүүдийг бүрэн хангасан байхыг Захиалагчийн зүгээс шаардаж ажилладаг. Эрдэнэт үйлдвэр санаачлан, Монгол Улсын Засгийн газрын шийдвэрийн дагуу анх удаа, өнгөрсөн онд зэсийн баяжмалаа биржээр худалдах үйл ажиллагааг зохион байгуулсан. Энэ жил 10 сая тонныг биржээр худалдахаар төлөвлөөд байна. Мөн хиймэл оюунд суурилсан “TenderEval 1.0” системийг боловсруулж, худалдан авах ажиллагааны тендерийн үнэлгээнд нэвтрүүлж байна. Цаашид ERP системийг хөгжүүлнэ. Ингэснээр та бүхний ажлын ачаалал багасна. Худалдан авах ажиллагаанд орчин үеийн дэвшилтэт технологи болох хиймэл оюун ухаан ашигласнаар хүний оролцоо багасах, нээлттэй байх, тендер ямар нэгэн будилаангүй явах олон давуу тал бий болно” хэмээн онцолсон.
Үйлдвэрийн газрын Хяналтын асуудал хариуцсан менежер И.Мөнхжаргал “Захиалагчийн хяналт хэрэгжүүлэхэд тулгамдаж буй асуудлууд” сэдвээр хийсэн мэдээлэлдээ, ”Бид хуульд заасан хэм хэмжээг мөрдөж ажиллах ёстой. Хуулийн хэллэгийг дагахгүйгээр өөрсдийн үзлээр зөв мэт асуудалд хандаж болохгүй. Ижил төстэй бараа, ажил үйлчилгээ шаардсан. Боловсролын яамны бичиг баримтад байхгүй мэргэжил шаарддаг. Ийм байдлаас үүдэлтэйгээр тендер хүчингүй болдог. Мөн Сангийн яамнаас өгч байгаа бичиг баримтыг тендерийн хороо хуралдаад олонхоороо хүлээж авахгүй байж болно. Ийм тохиолдолд яагаад хүлээж аваагүй үндэслэлээ бичээд Сангийн яаманд хандах ёстой. Тэнд хүлээж авахгүй бол Шүүхэд хандах хэрэгтэй. Иймээс бид процессоо зөв явуулах ёстой. Тэгэхээр ижил төстэй ажил үйлчилгээ эрхлэхтэй, Боловсролын системд байдаггүй мэргэжил заадагтай, Сангийн яамны зөвлөмжийг хүлээж авахгүйтэй холбоотой тендерийн асуудлуудад хууль, эрх зүйн хүрээнд зөв хандах хэрэгтэй байна. Нийт 271 тендерийн материалтай танилцлаа. Үүний 68 тендерт нь дүгнэлт гаргасан. Үндэслэлгүй найм, дахин нягтлах 17, үндэслэлтэй гэж 43 тендерийг дүгнээд байна” гэв.
Уулзалтад оролцсон ажилтнууд Ерөнхий захирал болон Хяналтын асуудал хариуцсан менежер нараас танилцуулсан мэдээллүүдтэй нь холбогдуулан сонирхсон зүйлээ асууж, Эрдэнэт үйлдвэрийн Худалдан авах үйл ажиллагаанд гарч буй сайн жишиг, анхаарч, шийдвэрлүүлэх шаардлагатай асуудлуудыг хөндөн, халуун яриа өрнүүлсэн. Зөв, буруу ойлголтуудаа нэгтгэж, санал бодлоо чөлөөтэй ярилцсан уулзалтаас цаашид авч, хэрэгжүүлэх санал, санаачилгуудыг тэмдэглэж, улирал тутам үр дүн, сайжруулалтуудаа ярилцаж байхаар төлөвлөж буйгаа Хяналтын асуудал хариуцсан менежер онцоллоо.
Нар минутад мандаж минутад жаргана.
Үс засуулвал: 
Суудал: 
