Итали Улсын Турин хотноо энэ сарын 06-наас 16-ны өдрүүдэд болсон Дэлхийн Тусгай олимпын “Турин-2025” Өвлийн наадамд оролцсон “Эрдэнэт үйлдвэр” ТӨҮГ-ын “Сэлэнгэ” амралт, аялал жуулчлалын цогцолборын ажилтан Амаржаргалын Идэр Гүйлтийн цанын төрөлд мөнгөн медаль хүртлээ.
Тус наадамд Орхон аймгаас Гүйлтийн цанын төрөлд гурван тамирчин маань дасгалжуулагч багш, Эрдэнэт хотын хүүхэд, залуучуудын “Гэрэл” төвийн захирал Д.Одгэрэлийн хамт оролцож, бахдам сайхан амжилт үзүүлсэн юм.
“Эрдэнэт үйлдвэр” ТӨҮГ-ын “Сэлэнгэ” амралт, аялал жуулчлалын цогцолборын ажилтан А.Идэр Олимпын мөнгөн медаль хүртсэнээс гадна ойрын зайн төрөлд шагналт 4-р байр, тамирчин Э.Анхзул Олимпын хүрэл медалиар энгэрээ мялааж, мөн 100 метрийн зайд шагналт 5-р байр, тамирчин А.Бүрэнтогтох гүйлтийн цанын хоёр төрөлд тус тус шагналт 5-р байранд шалгарсан амжилттайгаар Эх орондоо, Эрдэнэт хотдоо өчигдөр ирлээ.
Дэлхийн Тусгай олимпын “Турин-2025” Өвлийн наадмаас мөнгөн медаль зүүгээд, төрөлх Эрдэнэт хотдоо ирж буй тамирчдыг хамт олон, гэр бүлийнхэн нь угтан авч, баяр хүргэлээ. Энэ үеэр “Эрдэнэт үйлдвэр” ТӨҮГ-ын “Сэлэнгэ” амралт, аялал жуулчлалын цогцолборын ажилтан А.Идэрээс сэтгэгдлийг нь хуваалцсан юм.
-Би 2016 оноос эхлэн гүйлтийн цанын спортоор хичээллэж байна. Өмнө нь энэ төрөлдөө шалгараад, ОХУ руу тэмцээнд явахаар бэлтгэж байсан ч тодорхой шалтгааны улмаас цуцлагдаж байсан. Харин энэ удаа аймгуудаас ирсэн шилдэг тамирчидтай дахин өрсөлдөөд шалгарч, Тусгай олимпод оролцох эрхтэй болсон.
-Дэлхийн том тэмцээнд оролцож, ширүүн өрсөлдөөнд хүч самбаагаа сорьж мөнгөн медалийн болзол хангасандаа үнэхээр баяртай байна. Тэмцээний зам халтиргаатай, авхаалж самбаа, арга техник, ур чадвар сорьсон сайхан уралдаан болсон. Тусгай олимпын алтан медаль ч ойрхон санагдаж байлаа.
-Миний хувьд, тэмцээний бэлтгэл сургуулилалтаа ажлын өдөр бол ихэвчлэн цайны цагаараа хийдэг. Харин амралтын өдрүүдэд өглөөнөөс орой бүрий тасартал бэлтгэлээ үргэлжлүүлж байлаа.
-Энэ амжилтыг үзүүлэхэд үргэлж тусалж дэмжиж байсан багшдаа, ажлын хамт олон, гэр бүл гээд бүх хүмүүст баярлаж талархсанаа илэрхийлье. Дараагийн тэмцээнд илүү холын зайн уралдааны төрөлд бэлтгэлээ сайн хангаж, хүч хурдаа сорино гэсэн бодолтой байна.
Нар минутад мандаж минутад жаргана.
Үс засуулвал: 
Суудал: 
