“Эрдэнэт үйлдвэр” ТӨҮГ, “Дэлхийн Ур Чадвар Монгол” нийгэмд үйлчлэх төрийн бус байгууллагатай хамтран ажиллах санамж бичигт гарын үсэг зурах ёслол өнөөдөр боллоо. Тус үйл ажиллагаанд “Эрдэнэт үйлдвэр” ТӨҮГ-ын Ерөнхий захирал Г.Ёндон, Бүтээмжийн асуудал хариуцсан менежер Г.Цогнэмэх, Засвар, механикийн заводын дарга Т.Ариунсан, Баяжуулах үйлдвэрийн дарга М.Отгон, Хүний нөөц, захиргааны хэлтсийн Хүний нөөцийн албаны дарга Б.Одгарьд, “Дэлхийн Ур Чадвар Монгол” НҮТББ-ын Гүйцэтгэх захирал Д.Энхжаргал, тус байгууллагын Монгол Улсын техникийн төлөөлөгч Э.Энхболд, Удирдах зөвлөлийн гишүүн Ц.Чадраабал нар оролцлоо.
“Дэлхийн ур чадвар Монгол” НҮТББ нь залуучуудын мэргэжлийн ур чадварыг олон улсын түвшинд хүргэх, Дэлхийн ур чадварын тэмцээнд амжилттай оролцох, сургалтын чанарыг дээшлүүлэх зорилгоор "Монгол ур чадвар" тэмцээнийг тогтмол зохион байгуулж иржээ. Түүнчлэн, 2026 онд БНХАУ-ын Шанхай хотод болох Дэлхийн ур чадварын тэмцээнийг угтаж, "Монгол ур чадвар-2025" тэмцээнийг зохион байгуулах бэлтгэл ажлаа хангаад байгаа аж.
“Эрдэнэт үйлдвэр” ТӨҮГ-ын Ерөнхий захирал Г.Ёндон хэлсэн үгэндээ, “Монгол Улс Дэлхийн ур чадварын олон улсын байгууллагад 2014 онд гишүүнээр элссэн бол 2015 оноос хойш Дэлхийн ур чадварын олон улсын тэмцээнд токарь, гагнуур, өрөг угсралт, сантехник, цахилгаан зэрэг 9 хүртэлх нарийн мэргэжлээр тогтмол оролцож, гагнуурын болон токарийн төрөлд "Medallion of Excellence" буюу "Дэлхийн стандартыг хангасан шилдэг гүйцэтгэл", мөн “Шилдэг оролцогч” шагнал хүртэж байсан. Дэлхийн ур чадварын тэмцээнд оролцсоноор олон улсын туршлага, ноу-хау, технологи, үйлдвэрлэлийн инновац, мэргэжлийн боловсрол, сургалтын хөгжлийн чиг хандлагатай танилцаж, үе тэнгийн залуустай өрсөлдөн, туршлага судлах, монгол залуусын ур чадварыг дэлхийд таниулах зэрэг олон давуу талтай. Эдгээр олон улсын тэмцээнд манай баг оролцохдоо өмнөх удаагийнхаа амжилтыг тухай бүр ахиулсан нь Монгол залуучуудын мэргэжлийн ур чадвар өндөр байсныг харуулдаг. Дэлхийн хэмжээний дээрх үйл ажиллагаануудад оролцсон Монгол Улсын багт манай Засвар, механикийн заводын инженерүүд дэмжиж туслан, идэвхтэй хамтран ажилласныг тэмдэглэхэд таатай байна. Та бүхний үйл хэргийг “Эрдэнэт үйлдвэр” ТӨҮГ бүх талаар дэмжиж оролцдог. Санамж бичгийн хүрээнд манай хоёр байгууллага мэргэжлийн болон техникийн боловсролын ур чадварын уралдааны журмын хэрэгжилтийг хангах, үндэсний болон бүсийн хэмжээний ур чадварын уралдааныг зохион байгуулах, Төрийн болон хувийн хэвшлийн түншлэлийг хөгжүүлэхэд тус тусын эрх мэдлийн хүрээнд манлайлан, хамтран ажиллахаар төлөвлөж байна. Бидний хамтын ажиллагаа нь манай үйлдвэрийн инженер техникийн ажилтнуудын мэдлэг, боловсрол, мэргэжлийн ур чадварыг өсгөх, өндөр ур чадвартай, чадварлаг залуу инженер техникийн ажилтнуудаар эгнээгээ өсгөх зэрэг олон сайн үр дүн өгнө гэдэгт итгэл төгс байна” хэмээн онцлов.
Харин “Дэлхийн Ур Чадвар Монгол” НҮТББ-ийн Гүйцэтгэх захирал Д.Энхжаргал хэлэхдээ, “Дэлхийн олон улсын ур чадварын байгууллага нийт 89 гишүүнтэй. Бид Монголын үндэсний ур чадварын шилдэг туршлага, хөгжлийг дэлхийн жишигт хүргэж хамтран ажиллах зорилготой юм. Энэ байгууллага 2015 оноос Монгол Улсын ур чадварыг хөгжүүлэх зорилгоор судалгаа, сургалт, үнэлгээний ажил хийж байна. Монгол залуусын мэргэжлийн ур чадварыг хөгжүүлэх үйлс нь үндэсний эдийн засагт оруулж буй чухал хүчин зүйлийн нэг. Нөгөө талаар олон улсын ур чадвараас суралцаж, өөрсдийн ажлын арвин туршлага, ур чадвараа таниулах ёстой. Дэлхийн ур чадварын тэмцээн ойрын гурван жил Азийн бүсэд болно. 2025 онд Тайванд Азийн бүсийн аварга шалгаруулах тэмцээн зохион байгуулагдана. 2026 онд Шанхайд Дэлхийн аваргын тэмцээн болно. Дараа нь Токиод болох тов гарсан. Тиймээс та бүхнийг эдгээр тэмцээн, уралдаанд идэвхтэй оролцохыг урьж байна. Тэмцээнд түрүүлж, медаль авахаас илүүтэйгээр мэргэжил бүрээр ур чадвараа жилээс жилд өсгөж, 700 гэдэг босго оноог давж авах үндсэн зорилготой. Иймээс бид үйл ажиллагаагаа нийгэм рүү чиглүүлж ажиллана. Тэгэхээр ур чадварын үр дүнг хүртэгч нь аж ахуйн нэгж, хувь хүн хоёр. Дэлхийн жишигт ч ийм байгаа. Эцэст нь Монгол Улсын баатар Эрдэнэт үйлдвэртэй хамтран ажиллах анхныхаа гэрээг байгуулсандаа маш их бэлгэшээж байна” гэв.
Нар минутад мандаж минутад жаргана.
Үс засуулвал: 
Суудал: 
