Эрдэнэт үйлдвэрийн Эмэгтэйчүүдийн холбоо, Орхон аймгийн Улаан загалмайн хороо хамтран “Эмэгтэйчүүдийн оролцоо ба хүмүүнлэгийн үйл ажиллагаа” сэдэвт сургалт өнөөдөр зохион байгууллаа.
Энэ сургалтад Эрдэнэт үйлдвэрийн бүтцийн 29 нэгжийн 350 эмэгтэй ажилтан хамрагдаж, Олон улсын улаан загалмай нийгэмлэгийн үйл ажиллагаа, түүний онцлог, хүмүүнлэгийн үйл ажиллагааны ач холбогдол, сэтгэл зүйн анхны тусламж, халдварт болон халдварт бус өвчлөлд хүргэх хүчин зүйлс, гамшиг ослын үед хэрэгжүүлэх өрхийн төлөвлөгөө зэрэг чухал сэдвээр мэдээлэл авч, мэдлэгээ тэллээ.
Сургалтын эхэнд Эрдэнэт үйлдвэрийн Эмэгтэйчүүдийн холбооны Тэргүүн Х.Оюунтунгалаг, нийгмийн хариуцлагын хүрээнд уурхайчид, тэр дундаа эмэгтэй ажилчид хүмүүнлэгийн үйл ажиллагааг санаачлан зохион байгуулахаас гадна идэвхтэй оролцдогийг онцлон тэмдэглэсэн юм.
Өнөөдрийн байдлаар Эрдэнэт үйлдвэрт ажиллаж байгаа болон гавьяаныхаа амралтад гарсан 30-аас 83 насны нийт 80 "Хүндэт донор" байна. Энэ оны эхэнд Баяжуулах үйлдвэрийн 1000 гаруй ажилтан хүмүүнлэгийн үйлсэд нэгдэн, Улаан загалмайн хороонд гишүүнээр элсжээ.
Өнөөдрийн сургалтад Улаан загалмайн "Хүндэт донор"-ууд оролцож, улаан загалмайн үйл ажиллагаа яагаад чухал вэ гэдгийг товч, тодорхой сэтгэгдлээр илэрхийлсэн.
Мөн Донорын зөвлөлийн дарга Н.Гансүх зөвлөлийнхөө үйл ажиллагааны чиглэл, цаашдын зорилтын талаар мэдээлэл хийсэн бол БОЭТ-ийн Цусны салбар төвийн тасгийн эрхлэгч С.Уранчимэг үйл ажиллагаагаа танилцуулж, донорт тавигдах шаардлагын талаар бүсгүйчүүдэд мэдлэг олголоо.
Түүнээс гадна Орхон аймгийн Улаан загалмайн хорооны дарга Д.Тунгалаг Монголын улаан загалмай нийгэмлэгээс олгодог хүнсний болон хүмүүнлэгийн тусламж, үйлчилгээ, хүүхэд залуучуудын хөдөлгөөн, ирэх гуравдугаар сард зохион байгуулах “Гамшгийн эрсдэлийг бууруулахад эмэгтэйчүүдийн оролцоо” сэдэвт зөвлөгөөний талаар дэлгэрэнгүй мэдээлэл хийж, Уурхайчин бүсгүйчүүдийг хүмүүнлэгийн үйлсэд нэгдэхийг уриалснаар сургалт өндөрлөлөө.
Нар минутад мандаж минутад жаргана.
Үс засуулвал: 
Суудал: 
