Архивын зориулалтын байртай болж, стандартыг ахисан түвшинд хэрэгжүүлж буйгаа хүний нөөцийнхөн тайландаа онцлов

Эрдэнэт үйлдвэрийн Хүний нөөц, захиргааны хэлтсийн хамт олон өнгөрсөн 2024 онд хийж хэрэгжүүлсэн төсөл хөтөлбөр, ажлын тайлангаа хэлэлцэж, дүгнэсэн байна. Тус хэлтсийнхэн сүүлийн жилүүдэд ажлын төлөвлөгөөгөө боловсруулахдаа нийт ажилтнуудынхаа санал бодлыг тасралтгүй сонсож, үйл ажиллагаандаа үнэлэлт дүгнэлт өгөхийн зэрэгцээ түүнд тулгуурлан зорилго зорилтоо тодорхойлон, хэрэгжүүлж хэвшжээ. Хүний нөөц, захиргааны хэлтсийн харьяанд ажилладаг Бичиг хэрэг, дотоод зохион байгуулалтын алба, Төрөлжсөн архив, Хүний нөөцийн алба тус тусдаа тайлангаа хэлэлцүүлж, удирдлага, хамт олноороо үнэлүүлж, дүгнүүлсэн байна. 
Төрөлжсөн архивын албаныхан мэргэжлийн архивын зориулалтын барилгыг ашиглалтад хүлээн авч, нүүн орсон нь өнгөрсөн онд хийгдсэн хөрөнгө оруулалт, бүтээн байгуулалтын том ажил болжээ. Төрийн архивын хууль дүрмийн хүрээнд Дотоодын цэрэг, Цагдаа, Онцгой байдлын алба, Гамшгаас хамгаалах штаб зэрэг нэгж байгууллагуудын тусламжтайгаар архивын шинэ байрандаа нүүж, үйл ажиллагаагаа амжилттай үргэлжлүүлж буйг тайландаа онцлов. Түүнчлэн, үйлдвэрийн хэмжээнд хэрэгжүүлж буй хүний нөөцийн ISO 30400 багц стандартын баталгаажуулалтын хоёр дахь аудитад амжилттай оролцож, улсын хэмжээнд ахисан түвшний баталгаажуулалтын гэрчилгээг гардаж авсан байна. 
2024 онд Эрдэнэт үйлдвэрийн хамт олон хүний нөөцийн бодлого, үйл ажиллагаагаараа улсын хэмжээнд шалгарч, хүний нөөцийн салбарын экспертүүдийн дүгнэлтээр Монгол Улсад Хүний нөөцийн бодлогоор тэргүүлэгч брэнд байгууллага боллоо. Үйлдвэрийн удирдлага, уурхайчдын хамтын хичээл зүтгэлийг үнэлсэн энэхүү шагнал нь цаашдын үйл ажиллагаанд урам зориг өгсөн гэж хүний нөөцийнхөн дүгнэжээ. 
“Энэ жилийн тайлангийн хурлын хэлэлцүүлгээс харахад, манай Хүний нөөцийн болон бусад албад үйл ажиллагаандаа судалгаа тооцоолол, хүчин зүйлийн шинжилгээ, эрсдэлээ тодорхойлох, төлөвлөлт хийх зэргээр илүү мэргэшиж, ур чадвараа ахиулсан нь харагдлаа. Аливаа байгууллагын хүний нөөцийн мэргэжилтнүүд хэдий чинээ чадавхажна, тэр хэрээр хүний нөөцийн бодлого, хөтөлбөр сайн хэрэгждэг учраас манай мэргэжилтнүүд мэргэжлийн түвшнээ дээшлүүлэхэд манлайлж буйд баяртай байна” гэж Хүний нөөц, захиргааны хэлтсийн дарга О.Отгонбаяр онцоллоо.