Уул уурхайн салбарт анх удаагаа Эрдэнэт үйлдвэр Эрчим хүчний удирдлагын тогтолцооны ISO 50001 стандартыг үйлдвэрлэлд нэвтрүүлж байна. Өнгөрсөн оны наймдугаар сараас энэхүү стандартыг хэрэгжүүлэх ажлыг эхлүүлсэн. Зөвлөх үйлчилгээгээр “Обзерв стар” ХХК ажиллаж байгаа юм. Тус компани өмнө нь Эрдэнэт үйлдвэрт ISO 9001 стандартыг нэвтрүүлэхэд зөвлөх үйлчилгээ өгч байсан туршлагатай. Түүнчлэн, ISO 50001 стандартыг нэвтрүүлэх ажил нэг жилийн турш үргэлжилнэ. 2025 оны наймдугаар сард энэ стандартын баталгаажуулалт хийгдэх аж. Энэ хугацаанд тус стандартад тавигдах шаардлагуудыг хангах зорилгоор үйлдвэрийн хэмжээнд 100 гаруй хүний бүрэлдэхүүнтэй төслийн баг ажиллаж байна. Төслийн багийг Ерөнхий инженер Т.Батмөнх удирдаж байгаа бөгөөд уг стандартын 4, 5, 6-р бүлгийн шаардлагуудыг хангажээ.
“Бүтцийн нэгжүүдийн удирдлагуудаас санал авч Эрчим хүчний бодлогоо тодорхойллоо. Ингэснээр эрчим хүчний талаар баримтлах үйлдвэрийн бодлоготой боллоо. Энэ нь стандартын бас нэгэн шаардлага юм. Мөн эрчим хүчний хамрах хүрээг тодорхойллоо. Засгийн газраас тогтоосон үүрэг хүлээсэн хэрэглэгчийн хязгаар байдаг. Энд уул уурхайн аж ахуйн нэгжүүд 4000 мВт/ц, бусад аж ахуйн нэгж 2000 мВт/ц гэсэн хязгаартай. Уг хязгаарыг үндэслээд бүтцийн нэгжүүдээс хамгийн өндөр хэрэглээтэйг нь хамрах хүрээнд оруулж байна. Энд 13 бүтцийн нэгж орсон. Эрчим хүчний ойлголтод цахилгаан болон дулааны эрчим хүч, үүнээс гадна түлш гэсэн ойлголт багтдаг. Иймээс түлшний өндөр хэрэглээтэй бүтцийн нэгжүүд энэ стандартын хамрах хүрээнд орсон. Цаашид гүйцэтгэлээ сайжруулаад явах үндсэн зорилготой. Стандартаар тавигддаг хамгийн гол үзүүлэлт нь эрчим хүчний хувийн зарцуулалт байдаг. Өөрөөр хэлбэл цахилгаан, дулаан, түлшний хувийн зарцуулалтыг жил бүр сайжруулж ажиллана. Ингэснээр эрчим хүчний хэмнэлттэй, үр ашигтай ажиллах, зардал буурах, зөв зохистой хэрэглээг бий болгох үр дүн гарна” гэж Эрчим хүчний хэлтсийн дарга-Ерөнхий эрчим зүйч Л.Ариунболд ярилаа.
Нар минутад мандаж минутад жаргана.
Үс засуулвал: 
Суудал: 
