Баяжуулах үйлдвэрийн ҮЭ-ийн хороо шилдгээр шалгарчээ

“Эрдэнэт үйлдвэр” ТӨҮГ-ын Үйлдвэрчний Эвлэлийн холбооноос тодруулсан “Шилдэг хороо” номинацид Баяжуулах үйлдвэрийн ҮЭ-ийн хороо шалгарсан байна. Баяжуулах үйлдвэрийн 1200 ажилтан, гишүүдийнхээ хөдөлмөрлөх эрх, хууль ёсны ашиг сонирхлыг төлөөлж ажилладаг тус хороо 2024 оныг “Ажилтны эрүүл мэндийг дэмжих жил” болгон зарлаж, цехийн хэсэг, нэгж бүрд болзолт уралдаан зохион байгуулан зорилтот сургалтад хамруулжээ. “Ажилтны эрүүл мэндийг дэмжих жил”-ийн хүрээнд “Эрдэнэт” сувиллын цогцолбортой хамтран “Тамхинаас татгалзъя”, “Хамт хасъя” зэрэг эрүүл амьдралын хэв маягийг хэвшүүлэх аяныг өрнүүлж, 100 гаруй ажилтныг оролцуулан үр дүнд хүргэсэн байна. Ажилтнуудаа нарийн мэргэжлийн эмч нарын цуврал сургалтад оролцуулж, “Ясны эрдсийн түвшин нэмэгдүүлэх”, “Тэгш нуруу”, “Эрүүл зүрх”, “Цусаа хандивлая” зэрэг хөтөлбөрүүдийг хэрэгжүүлсэн нь ач холбогдолтой болсон байна. 
Түүнчлэн, Орхон аймгийн Хүүхэд, гэр бүлийн хөгжил, хамгааллын газар, цехийн Эцэг эхийн зөвлөлтэй хамтран “Гэр бүлийн боловсрол олгох” багш бэлтгэж, “Хүүхдээ сонсъё” чуулганыг зохион байгууллаа. Энэ чуулганаар хөдөлмөрийн хэвийн бус нөхцөлд, уртасгасан цагаар ажилладаг ажилтны хүүхдүүд ямар хүсэл мөрөөдөл, зорилготой суралцаж буйг нээлттэй сонсож, санал бодлыг сонссон нь хүүхдүүдэд урам зориг өгсөн байна. 
Хүнд хөдөлмөр эрхэлдэг ажилтнууддаа зориулан долоо хоног бүрийн баасан гаргийг “Сэтгэл зүйч”-тэй өдөр болгон, мэргэжлийн сэтгэл зүйч, ажилтнуудын хамтарсан уулзалт, сургалт зохион байгуулжээ.