Эрдэнэт үйлдвэрийн удирдах ажилтны 2025 оны эхний шуурхай зөвлөгөөн боллоо. Оны эхний долоо хоногт үйлдвэрийн хэмжээнд хөдөлмөрийн аюулгүй байдлын чиглэлээр хэвийн ажиллаж, өндөр эрсдэлтэй 34 ажил гүйцэтгэсэн байна. Ажиллагсдад хувийн хамгаалах хэрэгсэл хуваарийн дагуу олгож, Эрдэнэт цогцолбор дээд сургууль, Судалгааны шинжилгээний хүрээлэнд хөдөлмөрийн аюулгүй байдлын 4-р шатны үзлэг явагдаж байгааг ХАБЭА-н хэлтсээс мэдээллээ. ХАБЭА-н ээлжит сургалтад 235 хүн хамрагджээ.
Байгаль орчин ногоон хөгжлийн хэлтсээс Эрдэнэт үйлдвэрийн 2025 оны байгаль орчны менежментийн төлөвлөгөөг боловсруулан Байгаль орчин, уур амьсгалын өөрчлөлтийн яаманд батлуулахаар ажиллаж байна.
Оны эхний 5 хоногт үйлдвэрлэлийн ажил хэвийн үргэлжилж, уулын цул гаргалт, хөрс хуулалтын төлөвлөгөөний үзүүлэлт нэмэх гүйцэтгэлтэй буйг Үйлдвэрлэл, техникийн хэлтсээс мэдээлэв. Түүнчлэн хүдэр боловсруулалтыг төлөвлөгөөнөөс 47.1 мянган тонн илүү боловсруулсан байна. Шинэ долоо хоногт 673 мянган метр куб, хөрс хуулалт 284 мянган метр куб, хүдэр өгөлт 814 мянган метр куб гүйцэтгэхээр төлөвлөж буй аж.
Баяжуулах үйлдвэрт зарим тээрмүүд дээр тохируулгын ажлууд эхлэх юм байна. Үүнтэй холбоотойгоор тээрмүүдийг богино хугацаанд зогсоох, задлах ажлууд хийгдэнэ гэж цехийн удирдлага мэдээлэлдээ дурьдлаа. 3 дугаар секцийн угсралт дуусаж, одоогоор программ суулгах, тохируулах ажил хийгдэж байгаа ажээ.
Ус хангамжийн цехийн Эргэлтийн усны 10 мянган тоннын усан санг дүүргэх, тохируулах, зүгшрүүлэх ажил эхэлж, энэ долоо хоногт дүүргэж дуусгах төлөвлөгөөтэй ажиллаж байна. Ирэх долоо хоногт дараагийн шатны буюу тохируулга, зүгшрүүлэлтийн ажлууд эхэлнэ гэдгийг тус цехээс мэдээллээ.
Механикийн хэлтсээс үйлдвэрийн эдийн засгийн үр ашгийг нэмэгдүүлэх, хөдөлмөрийн аюулгүй ажиллагааг хангах чиглэлээр зорилт дэвшүүлсэн байна. 2025 онд хүний нөөцийн чиглэлээр шилжилт хөдөлгөөн харьцангуй олон хийгдэж буйтай холбоотойгоор дотоод нөөц бололцоондоо түшиглэн мэргэжлийн зорилтот сургалтуудыг Эрдэнэт цогцолбор дээд сургуультай хамтран зохион байгуулахаар төлөвлөжээ. Залуу ажилтныг засварчин, гагнуурчин, оосорлогч зэрэг нарийн мэргэжлээр дадлагажуулж, залуу мастеруудын манлайлал, удирдан зохион байгуулах чадвар эзэмшүүлэх чиглэлээр сургалт зохион байгуулах зорилттой ажиллаж буйг хэлтсийн дарга Б.Чинзориг танилцуулав.
2025 онд Эрдэнэт үйлдвэр, олон томоохон бүтээн байгуулалтын ажил төлөвлөсний дотор Үйлдвэрлэл, технологийн парк байгуулах ажил үргэлжлүүлэхээр багтсан. Мөн Зэс хайлуулах, боловсруулах үйлдвэрийг барьж эхэлнэ гэдгийг Стратеги, хөгжлийн бодлогын газрын дарга П.Энхбат мэдээлэлдээ онцоллоо.
Нар минутад мандаж минутад жаргана.
Үс засуулвал: 
Суудал: 
