Сорилт, шалгалт тохируулгын лаборатори, техникийн хяналтын товчоод дөрвөн жилээр итгэмжлэгдлээ

“Эрдэнэт үйлдвэр” ТӨҮГ-ын Чанарын хяналтын хэлтэс үйлдвэрлэлийн технологийн горимын хэвийн ажиллагааг хангах, экспортын бүтээгдэхүүний өрсөлдөх чадварыг дээшлүүлэх, эдийн засгийн үр ашгийг нэмэгдүүлэх, хэрэглэгчийн шаардлага хангасан чанартай бүтээгдэхүүн үйлдвэрлэх, импорт орлох бүтээгдэхүүний тоог нэмэгдүүлэх зорилгоор MNS ISO/IEC 17020:2013, MNS ISO/IEC 17025:2018 стандартаар итгэмжлэгдсэн 12 тохирлын үнэлгээний байгууллагын үйл ажиллагааг нэгдсэн бодлогоор хангах, хөгжүүлэх, чадваржуулах, итгэмжлэлтэй холбоотой асуудлыг нэгтгэн зангидаж зохион байгуулах арга хэмжээ авч ажиллаж байна. 
Уг ажлын хүрээнд үйлдвэрийн газрын итгэмжлэгдсэн сорилт, шалгалт, тохируулгын лабораториуд болон техникийн хяналтын товчоодын итгэмжлэлийн эрхийг сунгах газар дээрх магадлах болон давтан үнэлгээг энэ оны III улиралд Үндэсний итгэмжлэлийн төв хийж гүйцэтгэсэн. 
Үүний үр дүнд Үндэсний итгэмжлэлийн төвийн даргын тушаалаар “Эрдэнэт үйлдвэр” ТӨҮГ-ын бүтцийн долоон нэгжид хамаарах MNS ISO/IEC 17020:2013 “Тохирлын үнэлгээ, Хяналтын ажил эрхэлдэг төрөл бүрийн байгууллагын ажиллагаанд тавих шаардлага”, MNS ISO/IEC 17025:2018 “Сорилтын болон шалгалт тохируулгын лабораторийн чадавхад тавих ерөнхий шаардлага” стандартын хүрээнд үйл ажиллагаа явуулдаг Химийн төв лаборатори, Металлын лаборатори, Шатах тослох материалын лаборатори, Түлшний лаборатори, Хэмжил зүйн товчоо, Техник хяналтын товчоо, Дулааны цахилгаан станцын Уур усны лаборатори, Ус хангамжийн цехийн Цэвэрлэх байгууламжийн Усны лаборатори, Хөдөлмөрийн аюулгүй байдал, эрүүл ахуйн хэлтсийн Хөдөлмөрийн эрүүл ахуйн лаборатори, Байгаль орчин, ногоон хөгжлийн хэлтсийн Байгаль орчны лаборатори, Судалгаа, шинжилгээний хүрээлэнгийн лаборатори, Механикийн хэлтсийн Техник оношилгооны товчоод 2028 оны 12 дугаар сарын 30-ны өдрийг хүртэл дөрвөн жилийн хугацаагаар магадлан итгэмжлэгдлээ.