Удирдах ажилтны шуурхай зөвлөгөөн

Эрдэнэт үйлдвэрийн удирдах ажилтнуудын ээлжит шуурхай зөвлөгөөн ШУТИС-ийн “Дэд профессор”-ын эрдмийн цол хүртсэн цех, хэлтсийн дарга нарт цолны үнэмлэх, жуух гардуулснаар эхэллээ. “Эрдэнэт цогцолбор” дээд сургуулийн Эрдмийн зөвлөлийн гишүүн, Ил уурхайн дарга, доктор Д.Нямдорж, ХАБЭА-н хэлтсийн Албаны дарга, доктор Б.Баттайван нар ШУТИС-ийн “Эрдмийн ба хүндэт цол олгох журам”-ын шаардлагыг хангасан тул тус сургуулийн Эрдмийн зөвлөлийн шийдвэрээр “Дэд профессор” цол олгосон байна. Ерөнхий захирал Г.Ёндон, Ерөнхий инженер Т.Батмөнх нар эрдмийн цолны үнэмлэхийг гардуулан баяр хүргэж, амжилт хүслээ. 
Эрдэнэт үйлдвэрийн үйл ажиллагаанд нэвтрүүлж буй хиймэл оюун ухааны ERP технологийн үйл явц, ач холбогдлын талаар Мэдээллийн технологийн хэлтсийн дарга Б.Гансүх шуурхайд танилцууллаа. Монгол Улсын хэмжээнд анх удаа инженер техникийн ажилтнуудынхаа хүчээр санаачлан хөгжүүлж буй уг системийн ач холбогдлыг гаднын байгууллагууд ихээхэн үнэлж, хамтран ажиллах санал тавьж буйг тэрээр мэдээлэлдээ онцлов. Өнөөдрийн байдлаар 95 хувийн гүйцэтгэлтэй байгаа ERP систем нэвтрүүлэх ажил энэ ондоо дуусаж, ирэх оноос бүрэн хэрэгжиж эхлэх боломжтой болжээ. Иймд энэ ажилд бүтцийн нэгжийн удирдлагууд идэвхтэй, зөв ойлголттойгоор хамтран ажиллахыг уриалж байна, гэлээ. 
2024 оны төлөвлөгөөний хэрэгжилтийг дүгнэж, цэгнэхэд ганцхан сар үлдэж байгаа тул үйлдвэрлэл болон эдийн засгийн үзүүлэлт, хөрөнгө оруулалт, бүтээн байгуулалтын ажлуудаа бүрэн дуусгах, биелэлтийг хангаж ажиллах чухал шаардлагатайг Ерөнхий инженер анхааруулсан бол энэ сарын 11-ний өдөр Улаанбаатар хотод болох “Монгол Улсын нийгэм, эдийн засагт “Эрдэнэт үйлдвэр” ТӨҮГ-ын оруулсан нөлөөлөл, хувь нэмэр” сэдэвт эрдэм шинжилгээний бага хуралд өндөр бэлтгэлтэй, үр дүнтэй оролцохыг Ерөнхий захирал чиглэл болгов. 
Шуурхай зөвлөгөөний төгсгөлд, Эрдэнэт үйлдвэрийн Ус хангамжийн цехийн дарга Г.Батмөнх өнөөдрөөс хуулийн дагуу өндөр насны тэтгэвэртээ гарч байгаа тул гар, сэтгэл нийлж хамтран ажилласан нийт удирдлага, удирдах ажилтнууд, хамт олондоо талархал илэрхийлсэн. Тэрээр, “Эрдэнэт үйлдвэрт 32 жил ажиллахдаа 19 жилд нь удирдах алба хашиж, үйлдвэрлэлийн тасралтгүй үйл ажиллагааг хангах, шинэ техник технологи нэвтрүүлэх зэрэг чиглэлээр та бүхэнтэйгээ хамтарч, олон төсөл хөтөлбөр хэрэгжүүлж, сэтгэл зүтгэл, инженерийн ур чадвар, мэдлэг туршлагаа зориулсандаа бахархаж байна” гэлээ. Энэ үеэр Ерөнхий инженер Т.Батмөнх, “Үйлдвэрийн нэгэн үеийнхэн өндөр насны тэтгэвэртээ гарч, ингэхдээ дараагийн үеэ бэлдэн, арга туршлага, өндөр мэдлэгээ өвлүүлэн үлдээж буйд баяртай байна” гэсэн бол Ерөнхий захирал Г.Ёндон, “Хийсэн ажилтай, хэлэх үгтэй байна гэдэг том бахархал. Хамт олондоо хийсэн бүтээснээ яриад, чин сэтгэлийн үгээ хуваалцсанд талархаж, цаашдын ажил амьдралд нь амжилт, сайн сайхныг хүсэн ерөөе” хэмээгээд, үйлдвэрийнхээ дурсгалын зүйлийг гардууллаа.