Эрдэнэт үйлдвэрийн удирдах ажилтнуудын ээлжит шуурхай зөвлөгөөн үйлдвэрлэлийн төлөвлөгөөний биелэлт болон цаг үеийн бусад асуудалд анхаарал хандууллаа.
Энэ сарын 24-ний өдрийн байдлаар, үйлдвэрлэлийн төлөвлөгөөт үзүүлэлтүүд биелж, уулын цул гаргалт 227 мянган метр куб, хөрс хуулалт 278 мянган метр куб, хүдэр олборлолт 30 мянган тонн, хүдэр боловсруулалт 52 мянган тонныг төлөвлөгөөнөөс тус тус илүү гүйцэтгээд байна. Сарын эхнээс 9022 тонн цэвэр зэс агуулсан 40.1 мянган тонн зэсийн баяжмал, 395 тонн молибдены баяжмал үйлдвэрлэж, төлөвлөгөөнөөс 19 вагон илүү зэсийн баяжмал экспортод гаргасан гэж Үйлдвэрлэл, техникийн хэлтсээс мэдээллээ. Энэ сарын 28, 29-ний өдрүүдэд ирэх сарын уулын ажлын болон үйлдвэрлэлийн төлөвлөгөөг хэлэлцэх юм байна.
Ил уурхайд үйлдвэрлэлийн эрчимжүүлсэн төлөвлөгөөний биелэлтийг ханган ажиллаж байна. Энэ долоо хоногт Тэсрэх бодисын үйлдвэрт Уул уурхайн яамны мэргэжлийн зөвлөл ажиллаж, ашиглалтад хүлээж авахаар бэлтгэж буйг цехийн удирдлага онцлов.
Авто тээврийн цехийн уулын тээвэрлэлтийн ажил хэвийн үргэлжилж, намар, өвлийн бэлтгэл 97 хувиар хангагдаад байна. Тус цехийн нийт ажилтны 808 буюу 92 хувь нь эрүүл мэндийн урьдчилан сэргийлэх үзлэгт хамрагджээ. Энэ оны хөрөнгө оруулалтын төлөвлөгөөний дагуу хийгдэж буй парк шинэчлэлтийн хүрээнд Комацу маркийн найм дахь өөрөө буулгагч буюу самосвал машиныг ажилд гаргахад бэлэн болсон бол үлдсэн хоёр техникийг ирэх сарын эхээр угсарч дуусган, ашиглалтад оруулах юм байна.
Баяжуулах үйлдвэрт технологийн процесс харьцангуй сайжирч байгааг цехийн удирдлага мэдээлэлдээ онцоллоо. Зарим гэмтэл эвдрэл гарсан тээрэм, тоног төхөөрөмжийг Засвар, механикийн заводтой хамтран засварлах ажлыг үргэлжлүүлж, бусад ажлууд төлөвлөгөөний дагуу хийгдэж байгааг танилцуулав.
Засвар, механикийн завод хөдөлмөрийн аюулгүй байдлын чиглэлээр хэвийн, өргөтгөл шинэчлэлийн ажил төлөвлөгөөний дагуу хийгдэж байна. Механик цехийн өргөтгөлд шаардлагатай тоног төхөөрөмж, сэлбэг материалын худалдан авалтын тендер шалгаруулалт хуулийн хүрээнд зарлагдсан байгааг заводын удирдлага мэдээлэлдээ дурдлаа.
Геологи хайгуулын экспедиц хайгуулын ажлаа үргэлжлүүлж, Оюутын ордын төлөвлөгөөт өрөмдлөгийг гурван өрмийн машины тусламжтайгаар гүйцэтгэж байна. Одоогийн байдлаар 19838 тууш метр өрөмдсөн бол үлдэж буй 162 тууш метрийг энэ долоо хоногт бүрэн дуусгахаар төлөвлөжээ.
"Эрдэнэт үйлдвэр" ТӨҮГ-ын Эмэгтэйчүүдийн холбооны ээлжит чуулган энэ сарын 29-ний өдөр болж, үйлдвэрийн 400 эмэгтэй ажилтан төлөөлөгчөөр оролцоно. Иймд цех, нэгжийн удирдлагууд өөрийн цехийн эмэгтэй ажилтнуудаа оролцуулахад идэвх санаачилга гаргахыг тус холбооноос хүслээ.
Нар минутад мандаж минутад жаргана.
Үс засуулвал: 
Суудал: 
