Ш.ДАВААХҮҮ: 44 дэх спартакиадын нээлтийн үйл ажиллагааг энэ баасан гарагт шинэлэг хэлбэрээр зохион байгуулна

Эрдэнэт үйлдвэр” ТӨҮГ-ын Спорт цогцолборын дарга Ш.Даваахүүгээс ажилтнуудын 44 дүгээр спартакиадын талаар тодрууллаа.
-Манай үйлдвэрийн ажилчдын дунд зохион байгуулдаг уламжлалт спортын наадам удахгүй эхлэх гэж байна. Энэ удаагийн спартакиадыг өмнөхөөсөө арай өөр, сайжруулсан хэлбэрээр зохион байгуулна. Урьд нь бүтэн жилийн турш спартакиадын төрлүүд хуваарийн дагуу явагддаг байсан. Тэгэхээр тухайн цехийн хөгжөөн дэмжигчийн тоо бага, нэг тамирчин олон төрөлд оролцохоор спартакиадын тамирчдын тоо цөөхөн, урт хугацаанд явагдахаар хүмүүсийн идэвх сонирхол буурах байдал ажиглагдсан. Үүнээс үүдэлтэйгээр өрсөлдөөнтэй тоглолтуудад оролцогч, хөгжөөн дэмжигчдийн тоог нэмэгдүүлэх зорилгоор спортын тоглолт хэлбэрээр богино хугацаанд буюу 10 хоногийн дотор спартакиад явагдана. Спортын 14 төрөлд цех, нэгжийн нийт 18 баг тамирчид оролцож, хурд хүч, авхаалж самбаа, авьяас билгээ сорин өрсөлдөнө. Бүтцийн нэгжүүдийн эрэгтэй, эмэгтэй ажилчдын тоог адил түвшинд оролцуулах зорилгоор хуваарилалт хийсэн. Цехүүдийг 300-аас доошгүй ажилчинтайгаар хуваарилсан. Зарим цех дан эрчүүдтэй. Нөгөө нэг цехэд нь дан эмэгтэйчүүд байх жишээтэй. Үүнийг харгалзан ажиллагчдын нас хүйс, тооны харьцааг нягтлан үзэж хуваарилалт хийгээд байна.  
-Заал танхимын хүрэлцээ аль хэр байгаа вэ?
-Эрдэнэт үйлдвэрийн ажилчдын 44 дэх спартакиад богино хугацаанд явагдах болохоор заалны хүрэлцээг зохицуулах шаардлага гарсан. Үйлдвэрийн материаллаг бааз боломж нөөцөөс гадна аймаг орон нутгийнхаа заал танхимыг тэмцээн явагдах хугацаанд ашиглах хүсэлт гаргасан. Хүсэлтийг хүлээн авснаар нийт долоон зааланд тэмцээн явагдана. 
-Та 44-р спартакиадыг шинэлэг хэлбэрээр зохион байгуулах талаар дурдсан. Энэ талаараа жаахан тодруулахгүй юу?
-Спартикиад тоглолт хэлбэрээр явагдах учраас нээлтийн ажиллагааг олон нийтэд хүртээмжтэй хэлбэрээр 10 дугаар сарын 18-ны баасан гаргийн 17:00 цагт Хангарди паласт зохион байгуулах бэлтгэл ажлаа хангаад байна. Тодруулбал, үйлдвэрийн удирдлагууд, үзэгч, хөгжөөн дэмжигчдийн дунд бооцоот тэмцээн зохион байгуулна. Үүнээс гадна үзэгчдийн дунд азын сугалаа явагдана. Энд бөмбөгний иж бүрэн цуглуулга, биеийн тамирын хувцас хэрэглэл гэх мэт зүйлсийн эздийг сугалаагаар тодруулж, шагналыг нь гардуулна. Мөн удирдлагуудын болон хөгжөөн дэмжигчдийн дунд зохион байгуулах тэмцээнүүдэд байр эзэлсэн хүмүүсийг усан бассейн, бадминтон, бодибилдингийн секцэд гэр бүлээрээ нэг жил үнэ төлбөргүй явах эрхийн бичгээр шагнана. 
-Энэ жил Спорт цогцолборт хэчнээн дугуйлан хичээллэж байна. Үйлдвэрийн ажилчид хэр хамрагдаж байна вэ?
-Манай цогцолборын үндсэн үйл ажиллагааны нэг зорилго нь хичээллэгсдийн тоог нэмэгдүүлэх. Ялангуяа үйлдвэрийн ажиллагчдын спортоор хичээллэгсдийн тоог өсгөх явдал байдаг. Энэ үүднээс шинэ спортын төрлүүдийг хичээллүүлж, ажиллагсдыг хамруулж байна. Тухайлбал, ширээний хөл бөмбөгийн хэрэглэл материалыг бүрдүүлсэн. Энэ спортоор хичээллэх сонирхолтой хүмүүсийн тоо нэмэгдсэн. Уг спортын дэлхийн аварга шалгаруулах тэмцээн хүртэл явагддаг боллоо. Манай улсын тухайд шинэ спортын төрөл. Хөгжиж буй спорт. Мөн Корнхолын спорт их хөгжиж байна. Нийтийн биеийн тамирын чиглэлээр маш үр дүнгээ өгч байгаа спортын төрөл юм. Энэ спортын хэрэглэл материалыг өөрсдийн дотоод нөөц боломжоо ашиглан бүрдүүлж, үйлдвэрийн аварга шалгаруулах тэмцээнийг явуулж байгаа. Улмаар 44-р спартакиадын төрөлд энэ спортыг оруулсан. Үйлдвэрийн удирдлагуудын дунд энэ спортын аварга шалгаруулах тэмцээнийг зохион байгуулсан. Ер нь хурдтай хөгжих хандлагатай спортын нэг төрөл л дөө. Мөн дартс болон гадна талбайн одон бөмбөг гэх мэт шинэ спортыг хөгжүүлж, хичээллэгсдийн тоог нэмэгдүүлэх зорилго тавин ажиллаж байна. Манай Спорт цогцолборт 23 төрлийн секц дугуйлан үйл ажиллагаагаа явуулдаг. Энд үйлдвэрийн нийт 1200 гаруй ажилчид тогтмол хичээллэдэг. Ер нь бид тогтмол хичээллэгч, идэвхтэй оролцогч гэсэн чиглэлээр спортын үйлчилгээг ажилчдад хүргэж байна. Одоогоор тогтмол хичээллэгчдийн тоо харьцангуй бага байгаа тул эхний ээлжинд 25 хувьд хүргэнэ. Идэвхтэй оролцогчдын хувьд үйлдвэрийн ажиллагчдын 80 гаруй хувь нь ямар нэгэн спортын тэмцээн уралдаанд оролцож байна. 
-Цаг гарган ярилцсанд баярлалаа.