Мөрөөдлөө гүйцээсэн залуу

Цоо шинэхэн цутгамал бүтээгдэхүүн бэлэн болоход догдлон, баясдаг энэ эр бол Засвар, механикийн заводын Цутгуурын цехийн гар хэвчин, Эрдэнэт үйлдвэрийн Хөдөлмөрийн аварга Гунгаагийн Анхбаатар. 
Өөлөх өөгүй, аварга том цутгамлыг хараад тэр бахдахаас аргагүй. Хэвний хэсэг бол Цутгуурын цехийн анхдагч нэгж. Хэвийг техникийн зургийн дагуу, хэдий чинээ нягт нямбай хийнэ, цутгамал тийм л гарна. Тиймээс цутгамлын чанар хэвчний “урсгасан хөлс”-тэй шууд хамааралтай. “Баяжуулахын тээрмийн хуягаас эхлээд уурхайн экскаваторын шанаганы том оврын, төвөгшил ихтэй хэвийг нарийн мэргэшсэн, өндөр зэрэгтэй, торгон мэдрэмжтэй нэгэн урладаг. Энэ л шаардлагад бүрэн нийцэж, төгс зохицсон ажилтан бол Г.Анхбаатар” хэмээн Хэвний хэсгийн дарга Н.Тугтөгс хэлсэн юм. Г.Анхбаатар энэ их үйл хэргийн төлөө 23 дахь жилдээ оюун бодлоо “ширгээж”, сэтгэл, зүтгэлээ шингээж яваа. 
Завхан аймгийн Тосонцэнгэл сумын унаган хүү аав, ээжээ даган, арван дөрөвтэйдөө Эрдэнэсийн хотод шилжин ирсэн гэдэг. Хөдөөгийн хөвгүүнд цэмцгэр хот, цэнхэр нүдэт орос хүмүүс, аварга үйлдвэрийн автобусны цуваа гээд бүхий л зүйлс гайхам содон. Энэ үеэс л өсгөлүүн хүүгийн цээжний гүнд өнөр их айлын гишүүн болохсон гэх далдхан мөрөөдөл хадагдав. Аравдугаар ангиа дүүргээд, ардын армийн байлдагч боллоо. Эр цэргийн албаа нэр төртэй хаасан тэр Эрдэнэтдээ ирж суралцаад “Цутгуурчин-хэвчин” гэх ховорхон мэргэжил эзэмшлээ. Нар гийсэн нэгэн сайхан өдөр Эрдэнэт үйлдвэр өндөр үүдээ түүний өмнө цэлийтэл нээж, Засвар, механикийн заводын Цутгуурын цехийн Хэвний хэсэгт хэвчнээр хөдөлмөрийн гараагаа эхэлсэн юм. Г.Анхбаатар “Аварга том цутгамлын хэв бүтээнэ гэдэг алдах эрхгүй ажил. Санамсаргүйгээр жижигхэн алдаатай хэв цутгаснаар эдийн засгийн үлэмж хохирол бий болно. Тиймээс анхаарал болгоомжтой, мэдрэмжтэй, бас тооцоолол сайтай, нягт нямбай байхыг миний ажил мэргэжил надаас шаарддаг. Хүндхэн гэлээ ч би ажилдаа дуртай. Миний хувьд хэвний хуучин технологиор 19 жил ажилласан. Энэ үед туузан дамжуулгын системээр ирэх холимгийг хүрздэж тараах, доргилтын хийн багажаар хэвээ чигжих зэрэг гар ажиллагаа ихтэй байсан. Энэ нь эрүүл мэндэд таагүй нөлөөтэй, ажлын байр маань шороо тоос, дуу чимээ ихтэй байлаа. Гэлээ ч бид халширч явсангүй. 2020 оноос манайд орчин үеийн, Хүйтнээр хатуурах холимгоор хэв хийх хагас автомат технологи бүрэн нэвтэрч, гар ажиллагаа багасаж, сайхан болж байна. Хэвний чанар сайжирч, дагаад цутгамал бүтээгдэхүүний чанар ч мөн дээшилж байна” гэв. 
Г.Анхбаатар бол Заводынхоо “тэргүүн фронтын байлдагч”. Орчин үеийн дэвшилтэт, Хүйтнээр хатуурах холимгоор хэв хийх шугамын нээлтийн ёслолын үеэр тэр Эрдэнэт үйлдвэрийн удирдлагуудын хамт кноп дарж, шинэ технологийн анхны хэв түүний гараар бүтсэн түүхтэй.
Тэр 20 гаруй жил хамт ажилласан Гар хэвчин Ц.Эрдэнэсүх, Ж.Нямдаваа, гол бэлтгэгч Д.Мөнхбаяр нартайгаа тун дотно. Харцаараа бие биеэ ойлгодог нөхөдтэйгөө хамтарсан ажил бүхэн урагштай байдаг тухай ярив. “Ж.Нямдаваа, Ц.Эрдэнэсүх нар маань маргааш ажиллаад л гавьяаныхаа амралтад сууна даа” гэж хэлэхдээ гуниглангуй харагдав. Хөдөлмөрийн аварга маань гурван ч залууг дагалдуулан мэдлэг, туршлагаа өвлүүлж яваа “өв тээгч”. 
Ажлын хамтрагч, дотнын анд, Гар хэвчин Ц.Эрдэнэсүх нь ийн ярьсан юм, “Бид цэл залуухнаасаа цуг ажилласаар 22 жилийг ардаа үджээ. Гурав, зургаа, найман тонн жинтэй цутгамлын хэвийг гар аргаар бэлддэг бидний ажил ур чадвар ихээхэн шаарддаг, өндөр эрсдэлтэй, хариуцлагатай. Олон жил төлөвлөгөө нормоо өндөр хувиар биелүүлж, гологдолгүй, нягт нямбай ажиллаж ирсэн миний найзын хөдөлмөр, зүтгэлийг үнэлсэнд би маш их баярладаг. Анхаа бол манай “нэг номер”-ын гар хэвчин. Цаашдаа ч илүү сайн ажиллаж, олон олон шагналын эзэн болно гэдэгт би эргэлздэггүй. Бид олон жил хамт ажилласан болохоор бие биеэ мэдэрч, эвтэй сайхан ажилладаг. Найз маань маш хүнлэг, даруухан, ёстой л гүндүүгүй сайхан эр дээ. Хамт ажиллахад ямар их түшигтэй гээч. Ямар ч үед асуудлыг эвээр шийднэ. Тайван, тогтуун, шударга, тусч гээд эр хүнд байх хамаг л сайхан чанар найзад минь бий. Дуу цөөтэй ч, хааяа жигтэйхэн хошигноно. Бид ажил дээрээ төдийгүй, чөлөөт цаг, гэр бүлийнхээ хүрээнд ч сайхан нөхөрлөдөг” гэв. 
Түүний амжилтын талаар Хэсгийн дарга нь, “Г.Анхбаатар Цутгуурын цехийн өргөтгөл хийгдэхээс өмнөх шингэн шилтэй хольцот аргаар гар хэвийг хэвлэх, угсрах, цутгалтад бэлтгэх, мөн шинээр нэвтэрсэн Хүйтнээр хатуурах холимгийн хагас автомат технологийн шугам дээр хэв барих, хатаах, будах, тэдгээрийн ажиллах зарчмыг мэргэжлийн өндөр түвшинд эзэмшин ажиллаж байна. Г.Анхбаатар Хэвний хэсгийн хамт олны дунд гар хэвчнээр ажиллаж эхэлснээс өнөөг хүртэл цутгамал бүтээгдэхүүний хэвийг хүйтнээр хатуурах холимгийн болон гар аргаар хэв барих, угсрах технологийн аргачлал, техникийн зургийн дагуу чанарын өндөр түвшинд гүйцэтгэж байна. 2023 оны онцгой даалгаварт ажлуудаас дурдвал, Баяжуулах үйлдвэрийн бөмбөлөгт тээрмийн 10 гаруй нэр төрлийн нарийн хийцтэй 180 гаруй цутгамал, мөн нунтаглах тээрмийн 3,3 тонн жинтэй 20 цутгамал, 6 тонн жинтэй 22 цутгамлын хэвүүдийг чанарын өндөр түвшинд хэвлэж, Ил уурхайн ЭКГ-10, 12 ба LEIHBERR-ийн шанаганы урд, хойд хананы цутгамал бүтээгдэхүүний хэвийг хийхэд бригад хамт олноо манлайлан оролцсон юм” гэж ярив. 
Г.Анхбаатар Булнайн нурууны бэлд орших Завхан аймгийн Тосонцэнгэл сумын Модны үйлдвэрийн ажилчин Гунгаагийн зургаан хүүхдийн тав дахь нь. Идэрийн голдоо шумбаж өссөн жаал хүү үхрээ хариулах, түлээ түлшээ бэлтгэх зэргийг хэнээр ч хэлүүлэхгүй хийчихдэг ажилсаг хүү байв. Одоо тэрбээр аз жаргалтай айл гэрийн намба төрхтэй өрхийн тэргүүн. Түүний гэргий А.Алтанчимэг англи хэлний багш, орчуулагч мэргэжилтэй, хувийн бизнес эрхэлдэг хөдөлмөрч бүсгүй бий. Хүү нь дунд сургуулийн 12-р анги, охин нь 10-р ангийн сурагч. Тэрбээр, “Арыг минь бат даадаг ханьдаа үргэлж талархаж явдаг. Заримдаа ч ээлжээс бууж, унтаад, эзгүй хойгуур нь ажилдаа гарсаар, гэрийнхэнтэйгээ тааралдахгүй байх ч үе бий. Гэсэн ч хань минь халуун хоол, цайг байнга бэлэн байлгаж, сайхан амрах нөхцөлийг минь бүрдүүлдэг юм. Амралтын өдрүүдээр гэр бүлээрээ агаар салхинд гарах, цагийг зугаатай сайхан өнгөрүүлэхийг хичээдэг. Бас унаган нутгаа зорих дуртай. Солонготын даваагаа даваад л явахад сэтгэл цэлмээд л мөн сайхан даа. Нутгийн маань агаар, усны цэнгэг, жимс самрын амттайг ярих ч юм биш” хэмээн инээмсэглэв. 
Ийнхүү Г.Анхбаатар гуч шахам жилийн өмнөх мөрөөдлөө гүйцээж, “Эрдэнэт үйлдвэр” хэмээх их айлын нэр хүндтэй гишүүн болж, уул уурхайн аварга том цутгамал бүтээгдэхүүн үйлдвэрлэх их үйлсэд үнэтэй хувь нэмрээ оруулсаар явна.