Төрөлжсөн архив шинэ байрандаа нүүж орлоо

“Эрдэнэт үйлдвэр” ТӨҮГ архивын түүхэн үнэ цэнтэй баримт бичгийнхээ хадгалалт, хамгаалалтад онцгой анхаардгийн нэгэн тод илэрхийлэл нь томоохон хөрөнгө оруулалт хийж Төрөлжсөн архиваа зориулалтын байртай болгосон явдал юм. Төрөлжсөн архивын мэргэжлийн барилгыг саяхан ашиглалтад хүлээн авч, өнгөрсөн баасан гарагт архиваа нүүлгэн шилжүүлэх их ажил өрнөсөн. 
Хүний нөөц, захиргааны хэлтсийн дарга О.Отгонбаяр өнөөдөр удирдах ажилтнуудын шуурхай зөвлөгөөнд мэдээлэл хийхдээ, нийт 81184 хадгаламжийн нэгж баримт, ойролцоогоор 100 орчим тонн ачааг есөн тээврийн хэрэгсэл ашиглан, 90 хүний бүрэлдэхүүнтэйгээр нүүлгэлтийн ажлыг зохион байгуулсныг онцоллоо. 
Архивын Ерөнхий газрын удирдамжийн дагуу “Эрдэнэт үйлдвэр” ТӨҮГ-ын Ерөнхий инженерээр батлуулсан Ажлын хэсэг, 47 жилийн түүхтэй Эрдэнэт үйлдвэрийн төрөлжсөн архивын сан хөмрөгийг нүүлгэн шилжүүлэх ажлыг найман цагт багтаан гүйцэтгэжээ. 
Тус ажилд хамтарсан Үйлдвэр, техникийн хэлтэс, Гамшгаас хамгаалах штаб, Авто тээврийн цех, Баяжуулах үйлдвэр, Засвар, механикийн завод, Тээвэр, ложистикийн төв, Аж ахуй, үйлчилгээний цех, Хэвлэл мэдээлэл, олон нийттэй харилцах алба, Гэрээт байгууллагуудын бие бүрэлдэхүүн, удирдлагуудад Хүний нөөц, захиргааны хэлтсээс талархал илэрхийлсэн юм.