Даваа гаргийн ээлжит шуурхай зөвлөгөөний эхэнд тус үйлдвэрийн Захиргаа, удирдлага, санхүүгийн газрын дарга асан, УИХ-ын гишүүн Д.Үүрийнтуяа үйлдвэрийн удирдлагууд, тэднээр дамжуулан Эрдэнэт үйлдвэрийн нийт уурхайчин хамт олонд мэндчилгээ дэвшүүлж, талархлаа уламжиллаа. Тэрээр, Эрдэнэт үйлдвэрийн баялаг бүтээгч хамт олонтой 8 жилийн хугацаанд мөр зэрэгцэн хамтран ажилласан нь хамгийн их эрч хүчтэй, өсөж хөгжсөн он жилүүд байсныг онцлоод, цаашид Эрдэнэт үйлдвэр, уурхайчдын ажил үйлс, нийгмийн асуудал, санал санаачилгыг төрийн дээд байгууллагад хүргэх, шийдвэрлүүлэхэд хичээн ажиллаж, уурхайчдаа төлөөлөн “гал хамгаалагч”-ийн үүрэг гүйцэтгэнэ гэдгээ онцлов.
Мөн Улсын Их хурлын гишүүний хувьд шинэ бүрдсэн УИХ-ын анхдугаар болон ээлжит бус чуулганд бүрэн оролцож, Эрдэнэт үйлдвэрийг түшиглэн Үйлдвэрлэл, технологийн паркийн хүрээнд Зэс хайлуулах, боловсруулах үйлдвэр байгуулах, "Эрдэнэт цогцолбор" дээд сургуулийг бүс нутгийн хэмжээнд өргөжүүлэн хөгжүүлэх гэсэн хоёр асуудлаар Засгийн газрын үйл ажиллагааны мөрийн хөтөлбөрт “Эрдэнэт” гэсэн хаягаар оруулахад анхааран, санал бодлоо хэлж, эдгээр асуудлууд тодорхой тусгагдсан болохыг танилцуулсан юм.
Баяжуулах үйлдвэрийн технологийн үйл ажиллагаа хэвийн үргэлжилж, хүдэр боловсруулалтын төлөвлөгөө 9 сар гарсаар 7 мянган тонноор биелсэн дүнтэй байна. Хэдийгээр сарын эхэнд төлөвлөгөө биелж байгаа ч нийт дүнгээр төлөвлөгөөт үзүүлэлт хоцрох төлөвтэй тул оны эцэс хүртэл тухайн сар бүрийн үндсэн төлөвлөлт дээр 100 мянган тонн хүдэр нэмж боловсруулахаар төлөвлөж буйгаа Баяжуулах үйлдвэрийн дарга М.Отгон мэдээлэв. Засвар, механикийн заводын өргөтгөл шинэчлэл, хөрөнгө оруулалтын ажлын хүрээнд Цутгуурын цехэд хийгдэж буй өргөтгөлийн ажил 80 гаруй хувийн гүйцэтгэлтэй байна.
Эрдэнэт үйлдвэрийн 2025 оны хөрөнгө оруулалтын төлөвлөгөөний төслийг урьдчилсан байдлаар боловсруулж, бүтцийн цех, нэгжүүдээр хэлэлцүүлэхэд бэлэн болгосон байна. Энэ хүрээнд хийгдэх нийт ажлын 52.4 хувийг өргөтгөл шинэчлэл, засварын ажлууд эзэлж буй аж. Түүнчлэн, Монгол Улсын Төрийн хэмнэлтийн тухай хуулинд заасны дагуу зураг төсөл, ТЭЗҮ-г боловсруулаагүй шинэ төсөл хөтөлбөрт санхүүжилт хийх боломжгүй тул эдгээр ажлууд бүрэн хийгдсэн байх шаардлагатайг Хөрөнгө оруулалт, худалдан авах ажиллагааны бодлогын газраас удирдлагуудад анхааруулав.
Хамтын ажиллагаа, нийгмийн харилцааны бодлогын газраас 2025 оны эрүүл мэндийн урьдчилан сэргийлэх үзлэгийн багц, сонголтын талаар санал нэгтгэж ирүүлэхийг цех нэгжүүдэд даалгасан. Энэ үүрэг даалгаврыг заасан хугацаанд ирүүлээгүй цех, нэгжийн урьдчилан сэргийлэх үзлэгийн төсөв зардал үйлдвэрийн ирэх оны хөрөнгө оруулалтын төлөвлөгөөнд тусгагдах боломжгүй болох тул үүнд онцгой анхаарч, ажилтнуудын саналыг нэн даруй нэгтгэж ирүүлэхийг бүтцийн нэгжүүдэд санууллаа.
Намар, өвлийн бэлтгэл ажлыг эрчимжүүлэх шаардлагатайг хурлын төгсгөлд Ерөнхий инженер Т.Батмөнх онцолж, ялангуяа шаардлагатай тоног төхөөрөмжийн хангамж, нийлүүлэлт удаашрах хандлагатай байгааг анхаарч, төлөвлөсөн ажлуудаа цаг хугацаанд нь багтаан гүйцэтгэж ажиллах чиглэл өглөө.
Нар минутад мандаж минутад жаргана.
Үс засуулвал: 
Суудал: 
