“Эрдэнэт үйлдвэр” ТӨҮГ-ын дэргэдэх, ШУТИС-ийн харьяа, Ш.Отгонбилэгийн нэрэмжит “Эрдэнэт цогцолбор” дээд сургуулийн хичээлийн 50 дахь жилийн нээлт өнөөдөр боллоо. 2024-2025 оны хичээлийн шинэ жилийн нээлтийн үйл ажиллагаанд “Эрдэнэт үйлдвэр” ТӨҮГ-ын Ерөнхий инженер, Аж үйлдвэрийн Гавьяат ажилтан Т.Батмөнх, Стратеги, хөгжлийн бодлогын газрын дарга П.Энхбат, Хүний нөөц, захиргааны хэлтсийн дарга, Эрдмийн зөвлөлийн гишүүн О.Отгонбаяр, ШУТИС-ийн Хүндэт профессор, Монгол Улсын Гавьяат багш Ш.Ганбат, П.Оюунсүрэн, Соёлын Гавьяат зүтгэлтэн Ч.Ариунаа нарын хүндэт зочдоос гадна Ш.Отгонбилэг агсны хүү О.Содбилэг, ач С.Гэсэр нар оролцлоо. Мөн тус сургуулийн ТУЗ болон Эрдмийн зөвлөлийн гишүүд, эрдэмтэн багш, ажилтнууд, хамтран ажиллагч түнш байгууллагуудын төлөөлөл, оюутан сурагчид хичээлийн 50 дахь жилийн нээлтээ хамт хийлээ.
Энэ хичээлийн жилд “Эрдэнэт цогцолбор” дээд сургууль бакалаврын хөтөлбөртөө хамгийн олон буюу 320 орчим оюутан шинээр элсүүлжээ. Тэдний 40 гаруй хувь нь Орхон аймгаас бусад орон нутгаас ирсэн нь “Эрдэнэт цогцолбор” дээд сургууль бүс нутгийн хэмжээнд өргөжин хөгжиж байгааг илтгэнэ. Мөн тус сургууль магистр, бакалавр, Коосэн технологийн коллеж, Кембриджийн хөтөлбөртэй ахлах сургуульдаа элсэлт авснаар нийт 1000 гаруй оюутан, суралцагч, 160 орчим багш, ажилтантайгаар хичээл сургалтын үйл ажиллагаагаа эхлүүлж байна.
Өнгөрсөн жил Ашигт малтмал, баяжуулалтын технологи, Уул уурхайн машин, тоног төхөөрөмж, Нягтлан бодох бүртгэл гэх гурван хөтөлбөрөө магадлан итгэмжлүүлсэн нь олон оюутнуудад тусламж дэмжлэг авах давуу боломж олгож байна гэж “Эрдэнэт цогцолбор” дээд сургуулийн захирал Д.Зоригтхүү ярьсан юм.
Энэ үеэр, өнгөрсөн хичээлийн жилийн ололт амжилтуудаа онцлон танилцуулж, шилдэг 22 оюутан, суралцагч, багш нарт уламжлалт тэтгэлэг, урамшууллаа олголоо. Тухайлбал, Эрдэнэт үйлдвэрээс сургалтын төлбөрийн 30-100 хувийн тэтгэлэг буюу нийт 29 сая төгрөгийн тэтгэлгийг 17 оюутан, сурагч, Ш.Отгонбилэг агсны үүсгэн байгуулсан “Монгол 21” сангаас нийт 8.4 сая төгрөгийн тэтгэлгийг хоёр оюутан, нэг багш, “Капитрон” банкны нэрэмжит хоёр сая төгрөгийн тэтгэлгийг нэг оюутан хүртсэн. Харин Төгсөгчдийн холбооны 1.5 сая төгрөгийн тэтгэлгийг элсэлтийн шалгалтын хамгийн өндөр оноотой шинэ элсэгчид олгосон юм.
Хичээлийн 50 дахь жилийн босго давж буй нийт оюутан, суралцагчид, багш, сурган хүмүүжүүлэгч нартаа сурлага, хөдөлмөрийн өрнүүн амжилт хүсэн ерөөе!
Нар минутад мандаж минутад жаргана.
Үс засуулвал: 
Суудал: 
