ЖАДО РИНБҮЧИ БАГШ СЭЛЭНГЭ МӨРӨНД ЛУС АРГАДАХ ЗАН ҮЙЛ ХИЙЛЭЭ

Дээрхийн Гэгээн XIV Далай ламын “Намжил” дацангийн Хансүр, Лхаарамба, Агримба Жадо Ринбүчи багш хоёр дахь өдрөө Эрдэнэтчүүдэд номын хур буулгав.
Тэрбээр айлтгалдаа: “Та бүхэн хоёр өдөр ном сонсож, Манал бурхны Ван авшиг хүртлээ. Үүнээс хойш Манал бурхныг бясалгах, шүтэх, тарнийг нь тоолох, эмийн судар номыг нь судалж унших албан ёсны эрх олголоо. Цаашлаад энэ бүгдийг гүйцэлдүүлснээр гэгээрэлд хүрэх эрх олж авлаа гэсэн үг. Нөгөө талаар бие, хэл, сэтгэлээр үйлдэх нүгэл хилэнцийг хатуу цээрлэж явах ёстой юм” хэмээн тодотгов.
Түүнчлэн, Жадо Ринбүчи багш, дагалдан яваа лам хуврагуудын хамт Манал бурхны үүднээс Сэлэнгэ мөрөнд Хот мандал бүтээсэн түлцэнгийн элс тэргүүтнийг цацаж, лус аргадах зан үйл үйлдсэнээр энэхүү Ван авшиг хүртээх номын ёслол өндөрлөлөө.

ЖАЛДАНЖАНЧҮВЛИН ХИЙДИЙН ЛОВОН ЛАМ Б.ГАНЗАМ: 
“Гэгээрэлд хүрсэн бурхад цөвүүн цагт амьтанд туслахын тулд ерөөл тавьсан байдаг. Тухайлбал, бидний сайн мэдэх “Цагаан шүхэрт” бурхан хэл ам, хэрүүл тэмцлийн харшлах шалтгаан бүхнийг дарах ерөөлтэй. Ногоон дарь эх амьтан бүхний үйлсийг бүтээх тангараг тавьсан байх жишээтэй. Үүнтэй адил Манал бурхан цөвүүн цагт амьтны өвчин эмгэгийн ерөндөг болох ерөөл тавьсан гэж үздэг. Өөрөөр хэлбэл, амьд бүхний өвчинг илааршуулах тусыг бүтээх ерөөл тавьсан байдаг. Хоёр өдөр Манал бурхны түлцэн жанхартай ван тавилаа. Ван тавих гэдэг нь эрх олгоно гэсэн үг. Энэ нь их том өргөн хүрээний ойлголт. Нөгөө талаар түлцэн жанхарын тухай хэдэн үг хэлье. Эхлээд чулуугаа буталж гурил шиг болгодог. Үүнийгээ 12 өнгийн будганд оруулж “Хот мандал” бүтээдэг уламжлалтай. Төвдөөр Жанхар, Монголоор Хот мандал гэдэг. Тэгэхээр Манал бурхны хот мандалыг бүтээсэн явдал их онцлогтой. Энэ нь Манал бурхны гэр орныг бүтээж байна гэсэн үг. Ийм учир утгатай ванг өндөр түвшний эрдэмтэй дээдийн номын багшаас хүртэж байгаа нь лам хувраг, сүсэгтэн олонд маш ховор буяны аривдлагатай ариун үйлс юм.

ӨНДӨР НАСТАН ГОНЧИГИЙН ТУНГАЛАГ:
Манай аав лам хүн байлаа. Багадаа ааваасаа сурсан маань, мэгзмийг түмэн олныг эрүүл саруул байгаасай гэдэг үүднээс уншиж залбирч суулаа. 
Сүсэгтэн олонд адис жанлавтай рашаан тарааж, улаан зангиа өгсөн. Энэ нь их учир утгатай юм байна. Тусгай зан үйл хийлээ. “Хот мандал”-д мөргөж, ам бүл, хамаатан садан, зон олныг даатган залбирлаа. Сэтгэл их сайхан байна. Энэ сайхан үйл ажиллагааг зохион байгуулсан бүх хүмүүст баярлалаа гэж хэлье.

ИРГЭН ДАВААГИЙН БАТБАЯР:
Би Ховд аймгийн харьяат хүн. Энэ том хуралд Улаанбаатар хотоос ирж оролцлоо. Бид бурхны шашин номын үйл хэрэг хаалттай нийгэмд амьдарч байлаа. Миний хувьд, хүний үзэл бодлоо илэрхийлэх, шашин шүтэх явдал чөлөөтэй болсонд баяртай явдаг. Ер нь бурхны "Хот мандал"-д мөргөснөөр аливаа хүний гай барцад, түйтгэр арилдаг гэж үздэг. Энэ утгаараа сайхан номын дуу сонсож, "Хот мандал"-д мөргөсөндөө сэтгэгдэл маш өндөр байна.

АХМАД НАСТАН ЕГНЭНГИЙН ЦЭГМИД:
Гурван цаг номын хуралд суулаа. Маш сайхан байна. Эгч нь Увс аймгийн Өлгий суманд шүтлэг бишрэлтэй гэр бүлд өссөн хүн л дээ. Энэ утгаараа багаасаа бурхан номд сэтгэлээрээ ойрхон явсан. Жадо Ринбүчи багш номын утга учрыг маш сайхан тайлбарлалаа. Гандантэгчэнлин хийдийн Дэд хамба С.Гантөмөр гавж ч маш сайхан ойлгомжтой орчуулж өгсөн. Эрдэнэтчүүд их азтай хүмүүс. Ийм сайхан шашны том зүтгэлтнээс номын авшиг хүртлээ.