Шуурхай зөвлөгөөний тойм мэдээлэл

        Эрдэнэт үйлдвэрийн удирдлагуудын даваа гаргийн ээлжит шуурхай зөвлөгөөнийг Үйлдвэрлэл, техникийн бодлогын газрын дарга П.Батболор удирдлаа.

        Үйлдвэрлэлийн тасралтгүй, найдвартай ажиллагаа, бэлэн байдлыг хангах хүрээнд үйлдвэрийн хэмжээнд эрчим хүчний болон технологийн нөөцгүй ажилладаг үндсэн тоног төхөөрөмжүүдэд засвар үйлчилгээ хийх зорилгоор “Их зогсолт”-ыг жил бүр зохион байгуулдаг. Энэ жилийн тухайд, өнгөрсөн 7 дугаар сарын 27-оос 29-ний өдрүүдэд ээлжит “Их зогсолт” амжилттай хийгдэж дууссаныг шуурхай зөвлөгөөнд онцлов. “Их зогсолт”-ын хугацаанд хийхээр төлөвлөсөн засвар үйлчилгээний 482 багц ажлыг чанартай гүйцэтгэж, бүрэн дуусгаж ажилласан нийт цех, хамт олон, ажилтнуудад үйлдвэрийн удирдлагын зүгээс талархал илэрхийллээ.  

       Сүүлийн өдрүүдэд бороо хур ихсэж, байгаль, цаг уурын нөхцөл байдлаас шалтгаалан үйлдвэрлэлийн зарим үйл ажиллагаанд хүндрэл үүсэж байгаа тул цаг тухай бүрд нь шуурхай арга хэмжээ авч, урьдчилан сэргийлж, анхаарал сэрэмжтэй ажиллаж буйг шуурхай зөвлөгөөний үеэр онцолсон. Тухайлбал, усархаг бороо их хэмжээгээр орсон нь Баяжуулах үйлдвэрт хүдэр хүлээн авах, дамжуулах шат дамжлагад хүндрэл үүсгэсэн байна. Хүн хүч, машин техник дээр хөдөлмөр зохион байгуулалт хийж ажиллаж байна. Хөдөлмөрийн аюулгүй байдал, эрүүл ахуйн хэлтэс эдгээр өдрүүдэд онцгой анхаарал тавьж, хамтран ажиллаж буйгаа мэдээлэлдээ дурдав. Тус хэлтсээс нийт бүтцийн нэгжийн удирдлага болон ХАБЭА хариуцсан мэргэжилтнүүдийн дунд хөдөлмөрийн аюулгүй байдал, эрүүл ахуйн сэдэвт зөвлөгөөн энэ сард зохион байгуулахаар төлөвлөж байна. ХАБЭА-н 4-р шатны үзлэг энэ сарын 12-ноос Цахилгаан цех, Баяжуулах үйлдвэрт хийгдэх ажээ.

        Сэлэнгэ аймгийн нутагт байгалийн нөхөн сэргээлтийн ажил өнгөрсөн сарын 10-наас эхлэн, хэвийн үргэлжилж байна. Өнөөдрийн байдлаар, 185 га талбайд нөхөн сэргээлтийн ажил хийж гүйцэтгэжээ.

        Энэ долоо хоногт Эрдэнэт үйлдвэрийн 2024 оны эхний хагас жилийн үйлдвэрлэл, эдийн засаг, үйл ажиллагааны тайлангийн хурал болно. Мөн НҮБ болон Авлигатай тэмцэх газрын хамтарсан ажлын хэсэг Үйлдвэрийн дэргэдэх “Энэрэл” хүүхдийн төвийн үйл ажиллагаатай танилцах юм байна.

        Үйлдвэрийн хэмжээнд намар, өвөлд бэлтгэх ажлын төлөвлөгөө батлагдан хэрэгжиж байна. Үйлдвэрлэл, техникийн хэлтэс үүнд хяналт тавьж ажиллах чиглэл шуурхай зөвлөгөөнөөс өглөө. Мөн ДЦС-ын Их зогсолтын бэлтгэл хангахад онцгой анхаарч, бүрэн чанартай зохион байгуулахыг цехийн удирдлагад үүрэг болголоо.