Монгол Улсын даяар дуурсах мэргэн Л.Отгонбаяр Улсын аваргаар гурав дахь удаагаа тодорлоо

Монгол Улсад Биеийн тамир, спортын салбар үүсэж, хөгжсөний 100 жил, Дорнод аймгийн Баян-Уул сумын 100 жил, Үндэсний сурын спортоос төрсөн анхны Хөдөлмөрийн баатар, Монгол Улсын гавьяат тамирчин, Монгол Улсын дархан мэргэн А.Цэвээн агсны мэндэлсний 100 жилийн ойн нэрэмжит Үндэсний их цуваа харвааны Улсын аварга шалгаруулах тэмцээн тус суманд саяхан болж өндөрлөлөө. Энэхүү тэмцээнд 1030 харваач цэц мэргэнээ сорьсноос  Эрдэнэт үйлдвэр ТӨҮГ-ын Хангарди спорт клубийн тамирчин, Баяжуулах үйлдвэрийн Шүүн хатаах хэсгийн кранчин, Монгол Улсын даяар дуурсах мэргэн Л.Отгонбаяр хасаа харвааны төрөлд 20 онооноос 18 онож тэргүүлэн, нийлбэрээр 40 сумнаас  37 онож түрүүлж, Улсын аваргаар гурав дахь удаагаа тодорлоо. 
Тэрбээр  мөн Сүхбаатар аймагт энэ сарын эхээр болсон “Mergen cup-2024” Есүхэй харвааны тэмцээнийг мөн л манлайлав. Энэ тэмцээнд Үндэсний сурын харвааны Улсын цолтой 64 харваач цэц мэргээ сорьжээ. 
Монгол Улсын даяар дуурсах мэргэн Л.Отгонбаяр Улаанбаатар хотын Налайх дүүрэгт 6-р сарын 13-нд болсон 600 гаруй харваач оролцсон тэмцээнд 40 сумнаас 39 онож мөн л тэргүүн байр эзэллээ. 
Түүнчлэн Сэлэнгэ аймгийн Ерөө суманд энэ сарын 8,9-нд болсон Үндэсний сурын харвааны Багийн Улсын аварга шалгаруулах тэмцээнд “Хангарди” спорт клубийнхэн  хүрэл медаль хүртсэн байна. Монгол Улсын Дархан мэргэн Ш.Даваахүүгийн ахалсан уг багт Монгол Улсын даяар дуурсах мэргэн Л.Отгонбаяр, Монгол Улсын Даян мэргэн Д.Дэмбэрэлсайхан, Монгол Улсын мэргэн Д.Оюунханд болон улсын зэрэг цолтой 12 харваач оролцсон байна.