Б.Алтангэрэл: Төслийн дэд бүтцийн ажил 60 орчим хувьтай явна

Эрдэнэт үйлдвэр ТӨҮГ-ыг түшиглэн  Үйлдвэрлэл,  технологийн парк барьж байгуулах төслийн дэд бүтцийн  ажил ид  өрнөж байна. Энэхүү бүтээн байгуулалтад зориулан Засгийн газраас Орхон аймгийн Жаргалант сумын нутаг дэвсгэр дэх “Хөөврийн хөндий”-д  1217 га газрыг Улсын тусгай хэрэгцээнд олгосон юм. Төслийн дэд бүтцийн  Үйлдвэрлэл, технологийн парк Төслийн  нэгжээс Эрдэнэт үйлдвэрийн ажилтнуудад  бүтээн байгуулалтын ажлын явц, гүйцэтгэлийн талаарх мэдээллийг шат дараатай хүргэж буй. Өнөөдөр Баяжуулах үйлдвэр, Ил уурхай, Авто тээврийн цех, Засвар механикийн завод, Дулааны цахилгаан станцын ажилтнуудад   мэдээлэл хийлээ.  
Бид энэ үеэр  Үйлдвэрлэл, технологийн парк Төслийн нэгжийн дарга Б.Алтангэрэлээс зарим зүйлийг тодрууллаа. 

-Үйлдвэрлэл технологийн парк Төслийн дэд бүтцийн бүтээн байгуулалтын ажлын явц ямаршуу явна вэ? 
-Төслийн дэд бүтцийн ажил 60 орчим хувийн гүйцэтгэлтэй явна. Ариутгал татуурга усан хангамжийн ажлын гэрээг энэ онд байгуулсан, гүйцэтгэл нь 40 хувьтай, Автозамын ажил 40 хувьтай, Төмөр замын ажил 85-90 хувьтай явна. Энэ гурван ажлыг 2024 ондоо гүйцэтгэж дуусгаад, Улсын комисс хүлээлгэн өгөхөөр ажиллаж байна. Цахилгаан хангамжийн хувьд Инженерийн зураг төслийн хүрээлэн зураг төслөө боловсруулж дуусгаад, магадлангаар орж, ойрын хугацаанд гүйцэтгэгчийг сонгон шалгаруулснаар ажлаа эхлүүлэхээр төлөвлөж байна. Үйлдвэрлэл, технологийн паркийн дэд бүтцийг барьж байгуулах ажлын санхүүжилтийг “Эрдэнэт үйлдвэр” ТӨҮГ 100 хувь хариуцан ажиллаж байгаа.
-Хэдэн км урттай төмөр зам, авто зам  тавигдах вэ?
-Зураг төслийн дагуу  өртөө, ачиж буулгах, өндөр нам  тавцантай, 4,4 км урттай төмөр зам тавигдана. Авто замын хувьд сайжруулсан, асфальтан хучилттай 12,6 км урттай авто замыг барьж байгуулах ажил өнгөрсөн жилээс эхэлсэн. 

-Үйлдвэрлэл технологийн паркийн хүрээнд ямар бүтээн байгуулалт хийгдэх вэ?
-Засгийн газраас Эрдэнэт үйлдвэр ТӨҮГ-ыг түшиглэн Үйлдвэрлэл, технологийн паркийг барьж байгуулахаар заасан. Энэ паркийн хүрээнд Зэсийн баяжмал хайлуулах, боловсруулах үйлдвэр, Исэлдсэн хүдэр боловсруулах катодын зэсийн үйлдвэр, Молибденийн баяжмал боловсруулах үйлдвэр, Засвар механикийн заводын өргөтгөл шинэчлэл гэх зэрэг ажлуудыг төлөвлөсөн. 
-Зэсийн баяжмал хайлуулах, боловсруулах үйлдвэрийн бүтээн байгуулалтын ажил ямар шатанд яваа вэ?
-Бид 2022 онд техник, эдийн засгийн үндэслэлээ боловсруулж, батлуулсан. Одоогийн байдлаар бид  өнгөрсөн оноос эхэлсэн элементийн хүдрийн туршилтын ажлын үр дүнг нэгтгээд,  тодотгол хийж яваа. Үүнийгээ Эрдэс баялгийн мэргэжлийн зөвлөлөөр хэлэлцүүлэх шаардлагатай. Энэ ажлыг хийж гүйцэтгэсний дараа ойрын хугацаанд үйлдвэрийнхээ үндсэн бүтээн байгуулалтын ажил эхлүүлэхээр зорин ажиллаж байна. 
-Засвар механикийн заводын өргөтгөлийн хувьд....?
-Механик цехийн болон Цутгуурын цехийн өргөтгөлийн санхүүжилт тодорхой хэмжээгээр шийдэгдээд явж байгаа. Машин үйлдвэрийн бүтээгдэхүүн үйлдвэрлэлийн кластер байгуулах  “Засвар механикийн завод-2” төслийн  техник эдийн засгийн үндэслэлийг хэлэлцүүлж, батлуулсан.  
-Үйлдвэрлэл технологийн паркт шинээр хэдэн ажлын байр гарч байгаа вэ?
-Техник эдийн засгийн үндэслэл, урьдчилсан тойм судалгаагаар 1830 үндсэн ажлын байр шинээр бий болох дүр зураг харагдаж байгаа. Мэдээж эдгээр ажлын байранд  Эрдэнэт үйлдвэрийн боловсон хүчнээсээ хангах, шаардлагатай мэргэжилтнүүдийг гадаадад сургах зэргээр төлөвлөн ажиллаж  байгаа.