Эрдэнэт үйлдвэрийн түүхт 45 жилийг ойн босгон дээр Ил уурхайн хамт олон гавьяаныхаа амралтад гарсан ахмадуудаа хүлээн авч хүндэтгэл үзүүлэв. Энэхүү хүндэтгэлийн уулзалтад “Эрдэнэт үйлдвэр” ТӨҮГ-ын Ерөнхий инженер Т.Батмөнх, Техникийн хэлтсийн дарга Б.Мөнхнасан, Монгол Улсын Хөдөлмөрийн баатар Д.Жаргалсайхан, Т.Нямжав, Монгол Улсын гавьяат уурхайчин Т.Батсайхан, Д.Даваа, Н.Чулуунгэрэл нарын тэргүүтэй 120 гаруй ахмад ажилтан оролцлоо.
Ил уурхайн дарга, Техникийн ухааны доктор Д.Нямдорж Ил уурхайн түүхэн замнал, техник технологийн шинэчлэл, ажлын амжилт, цаашдын зорилтын талаар хийсэн мэдээлэлдээ: “Өнгөрсөн хугацаанд үйлдвэрлэлийн төлөвлөгөөт үзүүлэлтүүдийг жил бүр давуулан биелүүлж, улс орныхоо нийгэм, эдийн засагт жинтэй хувь нэмэр оруулж ажилласан явдал нь үе үеийн чадварлаг, мэргэшсэн, хөдөлмөрч уурхайн хамт олны зөв зохион байгуулалт, сахилга бат, нөр их хөдөлмөрийн үр дүн байлаа. “Эрдэнэт үйлдвэр” ТӨҮГ-ын түүхт 45 жилийн хугацаанд Ил уурхайн хамт олон 14,055.2 мян.уртааш метр өрөмдлөгийн ажил хийж, 751,4 сая.м3 уулын цул олборложээ. Түүнчлэн өөрийн өртгийг батлагдсан түвшинд барих, техник зохион байгуулалтын арга хэмжээ авч ажилласны үр дүнд өртөг зардлыг бууруулж, үйлдвэрлэл, эдийн засгийн үр ашгийг нэмэгдүүлэхэд жинтэй хувь нэмэр оруулж ирснийг тэмдэглэхэд нэн таатай байна” гэв.
Энэ үеэр маршал Юмжаагийн Цэдэнбалын нэрэмжит шагнал “Эрдэнийн алтан очир” одонгоор Монгол Улсын Хөдөлмөрийн баатар Түвдэнпунцагийн Нямжав, Ил уурхайн анхны маркшейдр Паалайн Маам нар энгэрээ мялаав. Мөн Уул уурхайн салбар үүсэн байгуулагдсаны 100 жилийн ойн медалиар тус цехийн ахмад ажилтан Д.Уламмандах, С.Адъяабаатар, Ш.Батчулуун, Ш.Эрдэнэбаяр, Д.Чулуунбаатар нарын 11 хүнийг шагнав. Ил уурхайн удирдлагууд ахмадуудаа цехийнхээ нэгж, хэсгийн ажил байдалтай танилцуулж, үдийн зоог барьснаар энэхүү дурсамж уулзалт өндөрлөлөө.
Нар минутад мандаж минутад жаргана.
Үс засуулвал: 
Суудал: 
